#لارين_تحكي
تململت شوي وحليت عينيا على صوت لحس برا.. هزيت روحي شوي وعديت بيديا الزوز على وجهي وكبست على راسي لي باقي يوجع..غزرت للوقت وين لقيت المغرب فات وهوما مخليني راقدة لتو.. تكيت بظهري لتالي وهزيت تاليفوني بش نتفقدو تنهدت ك مالقيت حتى شي وصلني ونزار ماطلبش وين حسيت روحي فشلت وندمت خاطر بقيت نستنى الايامات هاذم لكل ماطلبتوش.. للحظة حسيت انو كل شي تخيلتو طاح ف الماء خاطر كان ضاعت الفرصة هاذي مانعرفش شنوة بش نعمل ولا منين بش نبدأ وانا ف بلاد جديدة علياا.. كيما حسيت روحي تخنقت وقت عرفت اني هكاا بش ترصيلي ديما ف الدار ولاخر قدامي.. للحظة حسيت كأني خسرت فرصة هروبي وضيعت آخر طريقة ممكن تلهيني وتعاوني بش ننساه..نفخت بالشوي وقمت من بلاصتي قربت وين الشباك بعدت الريدو وين لقيت الدنياا ظلامت.. لبست سورية بيجامتي سكرتها وخرجت طول لتوالات غسلت حالتي وريقلت أموري وخرجت وين عرضتني ماياا قدامي.. عدات بعيناها عليا تحكي
مايا:" صحة النوم رينو.. كنت جاية تو بش نفيقك "
انا :" مايا علاش خليتني لتو راقدة ؟"
ضحكت تحكي
مايا :" والله اسأل روحك رينو.. من بكري وانا داخلة خارجة عليك وانت تقلي خليني شوي "
انا :" هههه والله لا فقت تالمون تاعبة وراسي يوجع "
حطت يداها على خدي تحكي
مايا:" اللطف على اختي.. ايجا تعشى واشرب حربوشة "
هزيتلها براسي باهي نحكي
انا :" باهي.. قلي وين مشيتو بكري ؟"
ضحكت تحكي
مايا :" مشينا شرينا سرفيس شربة فخار يهبل يارينو.. كيما لي كنت نخدمهم انا بالضبط.. تعرف ك دخلت للمحل تمنيت نحل محل هكاكا انا زادة ف الحومة ونخدم فيه "
عديت بعينيا عليها نغزرلها كيفاه تحكي وتضحك للحظة حسيت قلبي وجعني خاطر من جرتي انا هي تحرمت من محلهاا لي ف فرنساا وقتلي جبتها معايا هناا.. قربت بستها من خدها نحكي
انا :" نوعك بش يجي وقت ويصير عندك اكبر محل هناا.. والناس لكل بش تشوف خدمتك ويصيرو يشريو منك "
هزتلي براسها اي تحكي
مايا :" اي انشالله.. المهم قلي نزار ماطلبكش ؟"
تنهدت من عروش قلبي نحكي
انا :" لا "
عدات بعيناها علياا تحكي
ماايا :" ميسالش ممكن لاهي ولا بدل رقمو.. كان هكا تو نطلبو خالد نقولولو يدبرلناا رقمو الجديد "
تبسمت نحكي
انا :" زعمة مايا ؟"
عدات بصوابعها على شعري ورجعتو وراء وذنيا تحكي
مايا :" ياروح مايا.. المهم انت ماتأيسش.. هو مايعرفش رقمك بش نقولو ماحبش يهز عليك.. ممكن لاهي "
عديت بعينيا عليها نخمم ف كلامها وين حسيت روحي تنعوشت شوي وقلبي دق مرة أخرى نحكي
انا :" اي ممكن هكاا "
اشرتلي بعيناها تحكي
ماايا :" هياا ايجا للصالة هاو بوك هنا.. والعشاء قريب يحضر "
هزيتلها براسي باهي وقدمت معاها للصالة وين شفت جابر قاعد ورانية بجنبو معنقها.. عديت بعينيا عليهم نحكي
انا :" سلام "
هز راسو معايا وتبسم يحكي
جابر :" وعليكم السلام رينو.. شبي بنتي راقدة لتو ؟"
قعدت مقابلتو نحكي
انا :" لبارح سهرت مع عمتي برشة قمت ليوم ناقصة نوم "
جابر :" فهمتك.. المهم لباس تو ؟"
انا :" اي الحمدلله "
غزرت لرانية كيف شدتو من يديه تحكي
رانية :" باباتي كان خبرو انو غدوة رمضان.. تخرجني كالعادة بعد لعشاء نشريو السحور "
باسها من راسها يحكي
جابر :" اي رنوشة تو نخرجو "
غزرتلي وعدات بعيناها علياا.. تبسمت على جنب تحكي
رانية :" لارين كان تحب اهوكا اخرج معانا.. انا وبابا متعودين كل اول ليلة فرمضان نخرجو نشريو السحور وندورو شوي مع بعضمااا وزادة نقوم انا وهو ساعات نحضرو السحور مع بعضناا "
عديت بعينيا عليهم وخذيت نفس طويل نحكي
انا :" لا ميسالش اخرجو انتوما انا بش نسهر مع عمتي "
رانية:" كيما تحب "
تلفتت على صوتو يحكي
جابر :" رينو مانوصيكش نحبك تصلي فرمضان واهوكا كان ماتعرفش تعلم ومعاك عمتك تو توريك "
ضغطت على يدي نحكي
انا :" لا نعرف.. انا نور علمتني كل شي.. وكل رمضان نصليو ونقراو قرآن زادة "
عدا بعينيه عليا وغزرلي درا كيفاه يحكي
جابر :" باهي انا حبيت نوصيك وكهو اما مدام تعرف تهنيت تو "
قمت من بلاصتي نحكي
انا :" ماشية نشوف عمتي ومايا "
خليتهم قاعدين وخرجت من حذاهم.. للحظة حسيت روحي توترت من رانية وتعابير وجهها لي استفزتني غير نبرة صوتها معايا مش فاهمة شبيها تبدلت هكاا.. آخر مرة خليتها باهية معايا وعلى أساس تقربت مني ومن اول مارجعت المرة هاذي وهي جابدة روحها غير تصرفاتها لي مش مفهومة.. رجعت شعري لتالي ودخلت للكوجينة وين شفت سميحة زادة قدامي تظيب ف العشاء.. قربت لمايا لي مايا لي كانت قاعدة عالطاولة مع عمتي يقصو ف السلايط نحكي
انا :" خليوني نعاونكم "
رسيت على سنيا بالقوي ك سمعتها تحكي
سميحة :" يعطيك الصحة.. بعد ماكملنا كل شي جاية"
قحرتلها نحكي
انا :" ياخي انا كلمتك اصلا.. شكون دار بيك انت ؟"
غزرت لعمتي ك سبقتها تحكي
غالية :" سميحة مش تقربي لعشا وتعملي مشكلة.. نسيتي سيدي خوياا شوصاك ؟"
ريتهل ك قحرتلي ودورت خليقتهاا.. قمت من بلاصتي نحكي
انا :" عمتي انا هاني بش نحضر الطاولة "
هزتلي براسها باهي تحكي
غالية :" باهي ياماما "
تبسمت وهزيت الاصحنة والكاسات وخرجت.. بقيت نحضر ف الطاولة ومخي لكل ف كلام مايا زعمة نكلم خالد بعد ولا لا.. فقت من سرحتي على صوت ضحك رانية وجابر لي جاي من الصالة.. عوجت شفايفي وبقيت نسمع فيهم كيفاه يفدلكو ويضحكو وين حسيت قلبي وجعني وقت تفكرت كيفاه كنت مع نور انا زادة نفدلك هكاا وين حسيت روحي توحشتهاا عاللخر وتوحشت لحظاتي معاها لكل..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
