#لارين_تحكي
وقفت اول ماوصلنا لراس النهج.. تبسمت نحكي
انا :" الخرجة هاذي ماتتحسبش خاطر الوقت شوي.. نعملو نهار نخرجو بكري "
عدا بعينيه عليا وغزرلي يحكي
يوسف :" بالطبيعة دڤلتي.. هام مازالو الايامات تو نشيخو بالخروج "
تلفت لمايا وضحك يحكي
يوسف:" فرحت اني عرفتك مايا "
ضحكت تحكي
مايا :" وانا زاده فرحانة لي عرفتك..ولازم نتقابلو بش نعرف عزة "
يوسف:" هذا لي بيك.. كلمني ف اي وقت تو نهزك "
خذيت نفس طويل وقربتلو اكثر..مديت يدي قدامو نحكي
انا :" هذا متاعك "
عدا بعينيه عليا وغزر للساك..رجع غزرلي يحكي
يوسف :" شنوة هذا؟"
انا :" سبادريك.. انشالله يعجبك "
يوسف :" دڤلتي علاش تعبت روحك.. والله وقتها فدلكت معاك "
انا :" مفماش تعب.. وهذا اقل شي ليك.. غير هكاا انا زادة حبيت ناخذلك حاجة انت ديما تاخذلي "
يوسف :" مش مزية.. اي حاجة تحبها انا نجيبها لدڤلتي "
انا :" مالا شد رد بالك ترجع علياا.. تلبس بالصحة "
خذاه من يدي وطبس باسني من راسي يحكي
يوسف :" يخليك ليا ياقلب Joseph "
انا :" هياا خلينا نمشيو.. بيناتنا تاليفون "
هزلي براسو باهي وعطيناه بظهرها بعد ماسلم على ماياا مرة أخرى.. شديتها من مرفقها نحكي
انا :" عجبك Joseph "
تبسمت تحكي
ماايا :" عاللخر.. طفل محلاه وعاقل وظاهر رجولي زادة "
انا :" اي.. صحيح Joseph أصغر مني اما لقيتو برشة مرات بجنبي كانو راجل كبير "
ماياا :" ظاهر يحبك "
انا :" حتى انا نحبو "
مايا :" ياخي هاي الحومة لتو حافلة وانا قلت تو نرجعو نلقاوهاا فارغة وظلمة "
انا :" الحومة هاذي ماتفرغش.. لا ليل لا نهار.. تو تشوف غدوة صوت المرشي لي بش تقوم عليه "
ماايا :" غدوة بش نخرجو ؟"
انا :" مانعرفش.. غدوة خلينا نرتاحو نصبحو راقدين خير "
مايا :" اي خير "
هزيتلها براسي باهي وتلفتت ناحية الورشة وين لمحتو مازال ساهر هو صحابو.. ضغطت على يدي بالقوي وقت ريتو غزرلي وعدا بعينيه عليا.. دورت وجهي فيسع وكملت الثنية بلا مانرجع نغرز ناحيتو.. اول ماوصلنا للعمارة طلعنا فيسع.. حليت الباب لي كان مردود ودخلناا وين شفتهم كيف مازالو ساهرين.. قربنا حذاهم نحكي
انا:" احناا جيناا "
هز راسو معايا وتبسم يحكي
جابر:" الحمدالله على سلامتكم.. ايجاو اقعدوا "
قربت قعدت بجنبو ومايا حذايا.. عديت بعينيا علاهم نغزر لمرتو لي كانت متكية عالفوتاي تتفرج.. وعمتي بجنبو.. تبسمت على صوتها تحكي
غالية:" وين مشيتو رينو ؟"
انا :" مشينا كلينا عصيدة زڤوڤو.. ورجعنا فيسع.. هانا مابطيناش جابر "
مسح على شعري يحكي
جابر:" صحيت عيشلي بنتي العاقلة"
ضحكت وغزرتلو كيف تلفت لمايا يحكي
جابر :" انشالله حومتنا عجبتك بنتي ؟"
مايا :" اي عاللخر.. كل شي محلاه هناا "
غالية:" مازلت تو تشوفها ف النهار وقت المرشي والمحلات وهاو جاء رمضان زادة.. بش تزيد تحبها برشة "
مايا :" انشالله عمتي "
انا :" عمتي Joseph قلي لي فما طهور ولد احلام فرمضان.. احنا ماشين ؟"
ضحكت تحكي
غالية :" اي.. اصلا الطهور فالحومة كيما حنة فيصل "
غزرت لمايا نحكي
انا :" جوو هاك بش تحضر معايا المرة هاذي "
تلفتت على صوتها تحكي
سميحة :" ماياا ياخي انتي تصوم فرمضان؟"
عدات بعيناها علينا وغزرتلها تحكي
ماايا :" لاا مانصومش "
ريتها كيف استوات فقعدتها تحكي
سميحة :" ياشومي.. حرام يابنتي لازمك تصومي.. السنة بش تصومي معانا "
قحرتلها نحكي
انا :" كيفاه تصوم وهي ديانتها غير ديانتنا؟"
مايا :" انا ديانتي مسيحية وعناا وقت نصومو فيه غيركم.. مالا مانجمش نصيم معاكم ونتوما اكيد مش بش تصيمو معايا "
تلفتت على صوتو يحكي
جابر :" صحيح بنتي.. كل حد ودينو "
ضغطت على يدي بالقوي وقت سمعتها تحكي
سميحة:" ومش ناوية تولي مسلمة؟؟ مدامك ناوية تستقري هناا لازمك تصيري مسلمة "
ماايا:" لحقيقة ماخممتش ف الموضوع هذاا.. ونظن حتى كان بش نستقر هذاا موضوع ديانتي ماهوش مشكل.. علاش مفماش مسيحين وكنائس هناا"
غالية :" لا فما بنتي..وعناا كنيسة هناا فالعاصمة.. والموضوع هذاا يخصك انت مش حد آخر.. مش هكا سميحة؟"
ريتها كيف عوجت شفايفها ورجعت غزرت لتلفزة.. خذيت نفس طويل وتلفت لجابر.. فركت يديا فبعضهم نحكي
انا :" جابر حبيت نقلك عيشك عالبيت مرة أخرى.. عجبتني برشة وعجبت مايا زادة "
عدا بعينيه عليا ومسح على شعري.. تبسم نحكي
جابر :" صحة وفرحة لبنتي.. هذيكا أقل حاجة ليك وفرحت انها عجبت مايا زادة "
مايا :" عيشك عم جابر "
تبسمت من غير حتى كلمة وغزرت لعمتي نحكي
انا :" عمتي وين وصلتي فتحضيرات رمضان ؟"
غالية:" والله هانا مازلنا غاطسين والايامات تجري.. غدوة ناوية نحضر لهريسة العربي ونقص النواصر اهوكا بش تعاونوني انتوما الزوز هاني قلتلكم من تو"
مايا :" اي نعاونوك.. انت قلنا شنعملو برك "
ضحكت نحكي
انا :" اي عمتي.. الايامات هاذم تو نكملو معاك باقي التحضيرات "
عدات بعيناها علينا وضحكت تحكي
غالية:" عيشلي بناتي ياربي "
تبسمت وفركت عينيا.. غزرت لجابر كيف طبطب على يدي يحكي
جابر :" اياا قومو ارقدو.. عينيكم ذبالت الزوز"
قمت من بلاصتي مع مايا نحكي
انا :" اي والله تعبنا "
قربت بست عمتي نحكي
انا :" عمتي الصباح ك تجي فيقنا"
غالية :" باهي ياماما "
ريت مايا كيف باستها زادة تحكي
مايا :" تصبحو على خير "
انا :" تصبحو على خير "
كلهم :" وانتوما بخير "
خليناهم ودخلناا فيسع للبيت.. سكرت الباب وراياا وغزرت لمايا نحكي
انا :" أطول نهار شفتو "
ضحكت تحكي
مايا :" هياا ايجا ارتاح هاو تعدا "
هزيتلها براسي باهي وقربت نبدل ف حوايجي..اول ماكملنا تسطحناا وبقينا نحكيو حتى غفينا..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
