#عيسى_يحكي
تكيت بظهري لتالي وغمضت عينيا وانا نسمع فيه يحكي بجنبي.. نفخت بالشوي وحليت عينيا نحكي
انا :" يا ادم هاذي المرة الثانية تحكيلي انك شريتلها الخبز.. عاريتناا على 5 باڤات "
ضحك يحكي
ادم :" بش تعرفو خيري عليكم.. خاصة هي جاية من تالي وتعيط يامالي.. ف عوض تقلي يعطيك الصحة واقفة تتشوحر وتطول ف لسانها "
قمت من بلاصتي نحكي
انا :" انت بالك واسع ليوم.. هياا قوم "
عقد بحواجبو يحكي
ادم :" وين عندي نقوم ؟"
انا :" بش تتعشى حذاياا..وزيد تفقد الخبز لي شريتو "
ضحك يحكي
ادم :"هههه لا تفقدو انت.. انا بش نمشي نضربلها تو صحفة مثوامة معاها صحن تونسي.. بش كان طلع غدوة رمضان نكون هزيت شبعتي منهم.. كان تحب هياا معاياا خوذ صحفة كفتاجي ماك تحبو "
عديت بيديا الزوز على وجهي نحكي
انا :" لا ماعينيش..انا بش نطلع نتعشى لفوق ونرتاح "
وقف من بلاصتو وقربلي يحكي
ادم :" كان غدوة رمضان اهبط نتسحرو مع بعضنا ونمشيو نصليو الفجر "
ضيقت عينيا فيه نحكي
انا :" ناوي تتسحر بعد لي بش تاكلو هذا.. ربي معاك يا خوياا "
ضربني ببونية على كتفي يحكي
ادم :" **** بعين خليني نهبط نطصكك "
دوب تبسمت وخرجت نحكي
انا :" عمر لكلاب طويلة "
رسيت على سنيا بالقوي ك حسيت بحاجة ضربتي ف ظهري.. تلفتت وغزرت للمفك لي ضربني بيه.. قحرتلو نحكي
انا :"قاعد نلملك فيهم..نهار لي نهبل عليك ماتلومنيش "
رمالي بوسة ف الهواء يحكي
ادم :" نحبك وانت مهبول "
قحرتلو وعطيتو بظهري وشديت ثنية الدار.. دقيقتين من زمان ووصلت.. اول ماطلعت تنهدت بالشوي وغزرت للباب نخمم كان ندخل ولا نطلع طول.. اصلا كان مش على خاطر امي لي تطلب وتوصي وتعاود بش تروح نتعشى راني بقيت مع ادم خاطر بلحق حسيت روحي فديت من الوضع هذا كيما حسيت روحي باقي مكرز من الطحان خالد لي طلبتو بكري وماهزش علياا اما حسابو معايا مش تو..وخلي لي ف مخي يطلع صحيح كان مانسافرلوش لفرنسا ونحاسبو انا مانيش راجل..تونوريهم الزوز شمعناها أمور خاصة وهي زادة هاني مازلت موسع بالي معاها خاطر عارفها متغششة وعارف روحي انا سبب غشها اما هذا مايعنيش اني نسكت وانا نرا ف الشي هذا قدامي كان لزم نخلاهاا تسمعني بالسيف بش نفضو ** لحكاية هاذي.. عديت بيديا على رقبتي من تالي ودخلت وين شفتهم لكل قاعدين على طاولة لعشاء.. عديت بعينيا عليهم مستغرب ماريتهاش معاهم.. نحكي
انا :" صحة ليكم "
كلهم :" يعطيك الصحة "
غزرت لخالي ك اشرلي بيديه يحكي
جابر :" ايجا ولدي تعشى.. تو كنت بش نطلبك "
هزيتلو براسي باهي نحكي
انا :" خليني نغسل يدي ونجي "
خليتهم قاعدين ودخلت لتوالات غسلت حالتي وريقلت أموري وخرجت.. اول مارجعت حذاهم هزيت راسي على صوت خطواتها وين شفتها جاية من لكوجينة و ف يداها صحن تحكي
لارين :"كملت قليت لفريت وقريت حسابكم معايا "
دوب تبسمت على وجهها لي حمار اول ماغزرتلي.. جبدت الكرسي وقعدت وين شفتها ك قريت وحطت الصحن..غزرت لأمي تحكي
غالية :" رينو بنتي مدامك واقفة.. جيت صحن ومغرفة لعيسى "
تكيت بظهري لتالي نغزرلها ك ضغطت على يداهاا تحكي
لارين :" باهي عمتي "
غزرت لخالي يحكي
جابر :" الورشة محلولة ولا سكرتها؟"
انا :" لا محلولة ادم غادي و عبودة قال بش يسهر زادة.. كان غدوة رمضان يش يصبحو "
جابر :" فهمتك "
غزرتلها ك رجعت وقربت ناحتي..خذيت نفس من ريحتها اول ماطبست وحطت الصحن قدامي.. دوب هزيت راسي شوي وعديت بعينيا على شعرهاا لي طاح قدامي وقت طبست..للحظة حسيت انو تفاصيلها لكل قاعدة تشد فياا على غير العادة..رغم انهاا كانت معايا وبجنبي وقدام عينيا فترة طويلة اما المرة هاذي غير.. خذيت نفس طويل وغزرت للامي ك غرفتلي ف صحني تحكي
غالية :" تعشى مليح يابابا.. وكان غدوة رمضان بش تهبط تتسحر معانا.. ماتقليش خارج "
تبسمت نحكي
انا :" امي والله وعدت ادم بش نهبط نتسحر انا وهو"
غالية :" ميسالش مالا.. اما الليلة هاذي كهو "
هزيتلها براسي باهي ومديت يدي هزيت شوي من لفريت متاعهاا ناكل فيه.. ريتها ك غزرتلي وطبست راسهاا فيسع.. ضيقت عينياا فيها وغزرت لخالي نحكي
انا :" خالي كلمك جمال ولا خالد؟"
عالكلمة هزت راسها معاياا وعدات بعيناها عليا.. رجعت غزرت لخالي يحكي
جابر :" حكيت مع جمال وت لبارح خالد لا.. علاش ؟"
رجعت ناكل من لفريت ونحكي
انا :" لا نسال.. خاطر الشحنة بعد غدوة توصل حبيت نعرف "
تكيت بظهري لتالي ناكل ونغزرلها كيفاه تڤحرلي وتحرك ف المغرفة على عصابهاا.. تلفتت على صوت امي تحكي
غالية :" عيسى بعد حاجتي بيك ولدي.. ماتخرجش حتى نحكيو "
عديت بعينيا عليها مستغرب نحكي
انا :" لباس امي ؟"
تبسمت تحكي
غالية :" لباس ياروحي ماتخافش "
هزيتلها براسي باهي ورجعت طبست راسي ناكل ونسمع فيهم يحكيو.. اول ماكملت مسحت يدي وقمت من بلاصتي نحكي
انا :" صحة ليكم.. امي انا هاني ف البلكونة بش نتكيف "
غالية :" باهي يابابا هاني بش نخلط عليك "
هزيتلها براسي باهي ومشيت غسلت يدي وتعديت طول للبلكونة.. قعدت عالكرسي جبدت سيقارو شعلتو وبقيت نتكيف وفرد وقت نسمع فيها كيفاه صارت تحكي وتضحك عكس وقت كنت انا قاعد كانت ساكتة.. تنهدت بالشوي وتكيت بظهري لتالي نخمم شنعمل.. كيفاه بش نخليها ترجع كيما قبل وقتلي انا مش عارف شنوة نحكي ولا كيفاه نجبدلها المبرر لي عندي وقتلي انا رافض حتى بيني وبين روحي نحكيه.. للحظة خفت كان فعوض نرجع نكسبهاا نلقى روحي خسرتهاا مرة اخرى..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
