#عيسى_يحكي
خليتها واقفة وخرجت فيسع من حذاها قبل مانفقد اعصابي لي بدأت تفلت مني من صباح ربي.. رسيت على سنيا بالقوي وقت تفكرت كذبهاا عيني عينيك وين حسيت روحي غزلت علاهاا اكثر من اي مرة خاطر هاذي اول مرة تكذب هكاا.. خذيت نفس طويل اول ماخرجت من العمارة وشديت ثنية الورشة وين لقيتها مسكرة مش عارف لآخر وين مشى زادة..حليت الڤراج وترميت عالكرسي لي كان لبرا نستنى فيه.. كبست عالبونية متاعي بالقوي ك رجعت تفكرت لي صار الصباح..
#فلاش_باك
حليت عينيا على صوت تاليفوني لي نوقز.. هزيت روحي شوي وخذيتو وين شفت نومرو كمال التاكسيستي.. هزيت روحي فيسع ورديت عليه نحكي
انا :" صباح الخير "
كمال :" صباح النور يا الحوت.. ظاهرلي فيقتك "
عديت بيديا على وجهي وقمت من بلاصتي نحكي
انا :" لا لا فقت من بكري "
كمال :" اي باهي.. انا طلبتك حبيت نقلك تهنى هاني وصلت بنت خالك وصحبتها كيما وصيتني لبارح "
رجعت الريدو وعديت بعينيا عالشارع لبرا نحكي
انا :" يعطيك الصحة ياكمول ياغالي.. وسامحني فيقت بكري من جرتي "
كمال :" صلي عالنبي ياحوت ياخي بيناتنا احناا..خيرك سابق "
انا :" يرحم والديك "
كمال :" من غير مزية وهاني واقف قدام البلاص نستنى فيهم اول مايخرجو تو نسوق قدامهم وتهنى كيما وصيتني الزوز على عينيا.... "
قصيت عليه فيسع نحكي
انا :" استني بلاص شنوة لي تحكي عليه ؟"
كمال :" مش بلاص يسكنو فيه بلاص كبير كيما الشركة "
عقدت بحواجبي مستغرب نحكي
انا :" ياخي انت وين وصلتهم ؟"
كمال :" lac 2 "
حليت عينيا على وسعهم وقت سمعت لبلاصة.. رسيت على سنيا بالقوي من لعصب لي حسيتو مكني وقت عرفتها كذبت كيما لقيت روحي مش فاهم هي شمهزها غادي وبلاص شنوة لي دخلت فيه.. للحظة كان لقيت نمشي انا ونوريهاا الكذب متاعهاا.. كيما حمدت ربي اني بعثت معاها شكون نعرفو بش يخليه عينيه علاهاا خاطرني كنت متأكد من البارح انها ماقالتش لحقيقة اما توقعتش تمشي لبلاصة بعيدة كيف هاذي وفوق من هذاا هي ماتعرفهاش.. خذيت نفس طويل نحكي
انا :" باهي كمال عيش خوياا.. مانوصيكش الزوز على عينيك وصلهم حتى للحومة "
كمال :" باهي تهنى "
علقت عليه ورميت التاليفون على طول يدي من العصب لي مكني منها..مانعرفش الفر/خة هاذي كيفاه تخمم كيفاه تمشي هي وصاحبتها زوز بنات وحدهم لبلاصة من غير ماتقول يعني كان تصيرلهاا حاجة نبقاو نلوجو وقتلي احنا فبالناا بيها فعنوان وهي ف عنوان اخر.. رغم اني لبارح تقلقت من فكرة اني نحط حد يعس علاهاا من غير علمهاا رغم اني عملت هكا من خوفي علاهاا مش على حاجة اخرى حبيت نبقى مطمن علاهاا حتى ف غيابي خاصة اني نعرف انهاا مش بش تخليني انا نوصلهاا ومانجمتش نطلب من ادم خاطر تعرفو زادة..مالا مالقيت حد غير كمال نعرفو من قبل وعندي ثقة فيه وزيد تاكسي هكا حتى ك تطلع معاه قدام الناس مالو الا تاكسي وهاذي خدمتو..بعد لي سمعتو تو عرفت انو هذا احسن حل قدام تصرفاتهااا لي ناوية تهبلني بيهم....
#باك_اند
رسيت على سنيا بالقوي ك تفكرت كذبهاا وقت سألتها مشات للمعرض ولا لا.. ف بالها بش تعديها علياا
الفر/خة اما مازالت ماتعرفنيش تو نعلمهاا كيفاه تخبي وتكذب هكاا خاطر اكره مانكره الكذب اناا..كيما بقيت نخمم زعمة شنوة لبلاصة لي مشاتلهاا وبقات فيها أكثر من ساعتين.. نفخت بالقوي وبقيت نخمم شنوة بش نعمل معاهاا خاطرني بلحق فديت من الوضع مش عارف لوقتاه بش تبقى هازة خشمها هكاا من غير ماتسمعني.. تكيت براسي لتالي نخمم انا ف الفكرة لي قاعدة تدور عندها نهارين ف بالي.. رغم اني مخمم فيهاا من قبل اما نظن جاء وقت اني نفذها بش نرتاح من القيد هذاا ووقتها نحكي مع لارين.. ماعندي حتي حل قدامي غير اني نحكيلها لي عندي خاطرني ماتربيتش نخبي ونتلوعب لي فما فما.. رغم اني ساعات نخاف من ردة فعلها وقت تعرف اما هذا بالنسبة لياا اهون من الوضع لمزبل لي احنا فيه خاطرني مانيش ناوي نبقى هكاا نتفرج فيهاا من بعيد كيفاه تفركح خاطرني معادش أنجم نبقى ساكت اكثر من هكاا اصلا بكري شوي ماعرفتش كيفاه شديت روحي قدامهاا بش مانزيدش نعقد الوضع اكثر.. اما خلي لحكاية هاذي تتفض وعلى قريب زادة ووقتها الوضع تو يتبدل كيما نحب أناا.. فقت من سرحتي على صوتو يحكي
ادم :" هاك هناا ؟"
انا :" هذا لي تقلي اهبط اهبط.. نهبط مانلقاش سيادتك ؟"
قعد بجنبي يحكي
ادم :" بلاهي اخطاني.. خوك كان يعمل فعركة تو "
استويت ف قعدتي وحليت عينيا على وسعهم نحكي
انا :" عركة شنوة ؟ شصار زادة؟"
قربلي شوي وبدأ يحكيلي وين حسيت روحي بدأت تطيرلي من رقية متاع لوذن هي وعيلتهاا لي مش فاهم منين طاحو عليااا لهموم هاذم..نفخت بالشوي نحكي
انا :" شيهمك فيهاا خلاها تنبح وحدهاا ماتحطش راسك براسهم "
ادم :" والله على مرتين كنت بش نلفها "
قمت من بلاصتي نحكي
انا :" فك عليك من المشاكل.. خلاهم كان مازالو يتكلمو وقتها لحساب انا من ربي نستنالهم فيهاا "
قام بعدي يحكي
ادم :" هيا ندخلو نشوفو الخدمة خليني نروح نرقد.. نهار على عمار ليوم "
دوب تبسمت ودخلت معاه للورشة..كملت معاه لحسابات لكل متاع شحنة ليوم وبعدها روح.. ترميت عالكرسي بش نبقى ف الورشة ماحبيتش نروح من تو بش مانزيدش نراهاا خاطر كان تزيد تكذب قدامي مانعرفش كيفاه بش نتصرف قدام أمي وخالي..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
