#لارين_تحكي
سكرت السبالة بعد ماكلمت غسلت الماعون.. مسحت يدي وتلفتت لعمتي وين شفتها تحضر ف القهوة العربي.. قربتلهاا شوي وعديت بعينيا عليهاا نحكي
انا :" عمتي انت ماكش متغششة مني مش هكا ؟"
تلفتتلي بالوقت وعدات بعيناها علياا تحكي
غالية :" علاش بش نتغشش عليك ياماما؟"
انا :" خاطر كذبت وخبيت عليك البارح "
مسحت على شعري تحكي
غالية :" انا ماتغششتش والله اما تقلقت شوي.. خاطر ف بالي رينو ماتخبي شي على عمتهاا ولي احنا هنا صحاب وسرك عندي "
عضيت على شفايفي نحكي
انا :" عمتي انا والله لا قصدت نخبي عليك.. ونوعدك هاذي بش تكون آخر مرة.. انا مانحبكش تتقلق ولا تتغشش.. خاطرك كبير عندي والله "
تبسمت تحكي
غالية :" وانا مصدقتك وعارفة انك ماتقصدش..اما رينو اسمع مني كلمتين انا نحب بنتي هنا احسن من لكل.. ماتخلي حد يشد عليك حاجة.. انا نعرفك ماتكذبش وماتقصدش ونعرفك عاقلة اما غيري لا.. مالا معادش تعمل حاجة بش مايقولوش شوف رينو كيفاه تعمل "
هزيتلها براسي باهي نحكي
انا :" باهي عمتي "
غالية :" وزادة اي حاجة تحب تعملهاا وحتى كان ماتحبش تقول لبوك يكفي انك تقلي وانا بش ناقف مع بنتي مهما يكون قدام شكون.. وحتى أسرارك كان تحب احكيلي وانا بش نسمعك ونحافظ علاهم خاطرك بنتي رينو.. خلي عندك ثقة فياا "
عديت بعينيا عليها وقربت عنقتها بالقوي.. تبسمت على يداها لي دارت علياا وبقات تمسح على ظهري نحكي
انا :" ربي يخليك ليا عمتي.. انت احلى حاجة هناا من غيرك ماكنتش عارفة شنوة بش نعمل.. نحبك برشة والله "
باستني من راسي تحكي
غالية :" ويخليك ليا انت زادة..حتى انا نحبك وربي يشهد انت عندي اكثر من بنتي "
شديت دمعتي وبعدت علاها شوي نحكي
انا :" كان تشوفنا مايا تو تقول تعنقو ف بعضكم ونسيتوني "
ضحكت تحكي
غالية :" هههه حتى مايا كيما بنتي ونحبها.. ربي يعطيكم الوقت الطيب ونفرح بيكم الزوز"
تبسمت نحكي
انا :" برا انت ارتاح وانا تو نكمل القهوة ونجي "
غالية :" باهي مالا خليني نمشي نبدل حوايجي.. متأكدة ماتخافوش وحدكم ؟"
انا :" مانخافوش والله.. برا انت تفرهد شوي عندك قداه ماخرجتش "
غالية :" باهي ياروحي "
تبسمت وغزرتلها ك خرجت.. بقيت واقفة قدام القهوة نستنى فيهاا تطيب وفرد وقت نخمم ف لي صار بكري وين حسيت روحي فرحت خاطر الأمور تعدات لباس ومالقيتش مشكلة معاهم.. عوجت شفايفي وقت تفكرتو هو كالعادة من دون لكل مايفرحش.. طفيت عالقهوة لي بدأت تفور وسكبتها ف الفناجن.. هزيت الطبق وخرجت وين شفتهم لكل لبسوا.. عقدت بحواجبي وغزرت لعمتي نحكي
انا :" ياخي خارجين من تو ؟ والقهوة ؟"
سميحة :" خلاها تو ك نروحو نشربوهاا "
قحرتلها وقربت حطيت الطبق عالطاولة وغزرت لعمتي لي كانت تحط ف فولارتها على شعرها نحكي
انا :" عمتي مش قتلي بش تخرجوا بعد صلاة العشاء "
غالية :" اي ف بالي هكاا.. اما بعد قلت مدامني خارجة نمشي لجامع نصلي التراويح وبعد نخرجو "
عديت بعينيا عليها نحكي
انا :" ياعمتي علاش ماقتليش حتى انا نحب نمشي لجامع "
تبسمت تحكي
غالية :" غدوة تو نهزك صلي التراويح معانا.. خليك الليلة صلي لعشاء هناا "
انا :" باهي عمتي "
قربت باستني من خدي تحكي
غالية :" ايا ايجا سكر الباب ورانا وردو بالكم تخرجوا وسكرو دبوزة الغاز "
ضحكت نحكي
انا :" باهي تهني "
عقدت بحواجبي مستغربة رانية لي قحرتلي وخرجت طول مش فاهمة شبيهاا هاذي حسيت روحي بديت نتقلق منها ومن غزرتهاا لياا لي خلاتني نحس بعدم الراحة.. قربت سكرت الباب بعد ماخرجو لكل ورجعت هزيت الطبق رجعتو للكوجينة ومشيت فيسع للبيت بش نشوف مايا.. اول مادخلت تبسمت ك ريتها حاطة البيسي قدامهاا وغاطسة معاه.. قربتلها نحكي
انا :" فاش غاطسة ؟"
هزت راسها معاياا وعدات بعيناها عليا وغزرتلي درا كيفاه تحكي
مايا:" لا شي.. قاعدة نتفرج ف تصاور خدمتي انا ومادلين.. وشوي فيديوهات جديدة بش كان بديت نقرأ نلقى روحي حاضرة "
قعدت بجنبها وغزرت للبيسي وين شفت تصويرة تاتا مادلين قديمة وهي تخدم ف المحل .. عديت بعينيا عليها نحكي
انا :" بقدرة ربي بش تحل محل كيف هذا بالضبط هناا زادة وبش تسميه باسم مادلين "
تبسمت وتكات براسها على كتفي تحكي
مايا :" انشالله رينو "
انا :" الجماعة خرجو..شرايك نطلعوا للسطح ؟"
بعدت علياا شوي تحكي
مايا :" اي فكرة "
قمت من بلاصتي نحكي
انا :" مالا خليني نهز ادوات الرسم ونخدم شوي لفوق وانت معايا "
قربت للخزانة جبدت الأوراق والاقلام وتلفتت لمايا ك وقفت تحكي
ماايا :" انا تو نحضر Popcorn ونجيب البيسي ونخلط عليك "
انا :" باهي وجيت معاك شيبس وشكلاطة "
ضحكت تحكي
مايا :" باهي "
تبسمت وريتها ك سكرت البيسي وخرجت.. قربت لساكي جبدت ملف لي عطاهولي نزار هزيتو مع الأوراق وخرجت وين حسيت روحي تحمست اني نبدأ خدمة اصلا لقيت روحي نستنى وقتاه نشد لقلم ونشوف شنوة بش نحضر.. خرجت وبقيت طالعة ف الدروج دبة دبة وفرد وقت نسترجع ف كلام نزار بش نلقى فكرة فيسع.. تهزيت وتحطيت من لفجعة لي حسيتها اول ماوصلت للطابق الثاني وريتو واقف قدامي.. بلعت ريقي وطبست راسي بش نتعداه.. هزيت راسي وغزرتلو ك وقف قدامي منعني نتعدا عديت بعينيا عليه نغزر لوجهو وين لقيت روحي مش فاهمة ملامحو الباردة لي ماتعبر على شي لا غش ولا العكس.. نحكي
انا :" ميسالش نتعدا ؟"
قلبي ضرب بقوة وقت قربلي شوي..عدا بعينيه علياا وغزرلي درا كيفاه ساكت وين لقيت روحي جمدت فبلاصتي مش عارفة كيفاه نبعد عليه تو بش نهرب من دقات قلبي لي حاستها بش تفضحني قدامو..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
