#لارين_تحكي
تبسمت على يداها لي كبست على يدي.. هزيت راسي وغزرتلها كيف دارتلي.. عدات بعيناها عليا تحكي
مايا :" رينو انت مليحة؟ شعاملة ؟"
تبسمت نحكي
انا :" انا صرت مليحة تو ك شفتك.. ماعندكش فكرة قداه توحشتك يامايا.. حسيت دنيتي فرغت من وقت لي انت مشيت "
حطت يداها على خدي وغزرتلي درا كيفاه تحكي
مايا :" شبي اختي ؟ رينو متأكدة انت مليحة؟ ماتحيرنيش عليك "
انا :" والله مليحة ماتخافش.. اما بلحق توحشتك.. الفترة لي فاتت عديناهم بعاد على بعضنا.. انا سافرت لتونس وك رجعت انت سافرت.. حسيت روحي فقدتك"
تبسمت وقربت باستني من خدي تحكي
مايا :" حتى انا والله فقدتك.. وبقيت نستنى وقتاه نرجع نشوفك.. من اللحظة هاذي انا معادش بش نبعد عليك.. المهم ماتخلينيش نشوفك هكا "
هزيتلها براسي باهي وتبسمت نحكي
انا :" احكيلي انت لباس ؟ وداركم غادي شعاملين ؟"
تنهدت بالشوي تحكي
مايا :" لباس كلنا لباس "
عقدت بحواجبي نحكي
انا :" شبيك تقول فيها هكا ؟ صارت حاجة ؟"
مايا :" ماصار شي.. اما الفترة لي عديتها حذا بابا ومرتو خلاتني نزيد نتأكد اني ماعنديش بلاصة حذاهم.. صدقني بقيت من لزز.. حتى العيد غادي عديتو مش مرتاحة "
درتلها بكلي نحكي
انا :" علاش ماقتليش هذا لكل ك حكينا؟ علاش ماجيتش حذايا ؟"
مايا :" ماحبيتش نقلقكم.. وزيد انت بيدك ضيفة عند الجماعة نزيد انا نخلط عيب "
كبست على يداهاا نحكي
انا :" كيفاه تخمم هكا مايا.. كان قتلي راني سيبت كل شي وجيتك.. رانا رجعنا لباريس مع بعضنا.. انت اهم من اي حاجة عندي.. علاش ماقتليش"
تبسمت تحكي
ماايا :" ميسالش رينو.. فترة وتعدات وهاني لباس ورجعتلك.. ماتحط شي ف بالك "
شديت دمعتي بالسيف وهزيتلها براسي باهي.. حسيت روحي مالقيت مانقول وقت تخيلت انو حتى مايا ماكنتش مرتاحة خاصة اني انا اكثر وحدة نعرف قداه عائلتها غادي خايبة وين لقيت روحي ندمت خاطر سمعت كلامو ومامشيتش معاهاا..من جرتو انا خليت اختي وحدهاا.. فقت من سرحتي على يداها لي تعدات فوق شعري تحكي
مايا :"ساعة قلي شنوة الزين هذا لكل؟ كسبة قصيت شعرك وحدك..مستانسة انا نبدأ نحاول فيك "
تبسمت على جنب نحكي
انا :" حبيت نغير شوي.. فديت من شعري لقديم "
هزت بحاجبها تحكي
مايا :" ماصدقتكش.. قاعدة تكذب علياا انت تو "
استويت ف قعدتي نحكي
انا :" مانيش نكذب.. اما شعري فسد من الشمس حبيت نصلحو وقصيتو كهو "
هزتلي براسها باهي تحكي
مايا :" هاك زدت غرقت روحك اكثر معايا.. مانيش بش نشد صحيح تو خلينا نوصلو وتو نحكيو "
تبسمت وهزيتلها براسي باهي.. عدات بعيناها عليا تحكي
مايا :" شبيه عيسى ساكت بكري ؟"
غزرت قدامي نحكي
انا :" مانعرفش عليه.. هو ديما ساكت "
ماايا :" تعاركتو؟"
غضمت عينيا بالقوي و رجعت حليتهم.. تلفتلها نحكي
انا :" ميسالش نأجلو لكلام هذا مايا.. ماعينيش نحكي تو..اول مانوصلو ونبقاو وحدناا بش نحكيلك كل شي"
هزتلي براسها باهي تحكي
مايا :" باهي رينو كيما تحب.. قلب كلمت عمتك وبوك؟"
عوجت شفايفي نحكي
انا :" امم.. كلمتهم "
مايا :" وقلتلهم اني جاية معاك؟ خايفة كان يتقلقو "
درتلها بكلي وحليت عينيا فيها نحكي
انا :" وبرا كان تقلقو كان مش عاجبهم طز فيهم لكل.. تو نمشي انا وياك ونشوفو بلاصة نبقاو فيها ماناش بش نضيعو "
عدات بعيناها علياا وغزرتلي مستغربة تحكي
مايا :" شبيك تغششت ؟ شقتلك انا ؟"
خذيت نفس طويل ورجعت شعري لتالي نحكي
انا :" ماتغششتش.. اما كلهم غادي لازم يعرفو انو كان انا بش نبقى ف الدار هذيكاا راو انت بش تبقى معايا..مستحيل نبقى وحدي ونخليك وانت مش بش تخليني "
تبسمت تحكي
مايا :" اما انت وليت تخوف.. جاية تصيح علياا انا مافهمتش علاش "
ضحكت نحكي
انا :" مانيش نصيح عليك.. انا قاعدة نقلك لي بش يصير "
شدتني من يدي وضحكت تحكي
مايا :" وشكون قلك انا بش نخليك.. كان تقلقو انا وحدي وحدي بش نهزك ونمشيو.. مانيش بش نخليك غادي وحدك "
انا :" اي هكا نحبك.. اصلا هوما ماعندهم مايقولو.. عمتي تستنى فيك من اول ماحكيتلها عليك وجابر قلي عادي اعمل لي يريحك.. والباقي لكل طزّ فيهم واحد واحد.. حبلهم ربي يقولو حاجة "
حلت عيناها فيا تحكي
مايا :" يابنتي شنوة لكلام هذا.. متأكده هاذي رينو "
ضحكت وتكيت براسي على كتفها نحكي
انا :" اي هاذي رينو "
غزرت لخالد لي رجع وحدو.. قرب ناحيتنا يحكي
خالد :" لبنات ايا هاتو بسبوركم وقومو بش نكملو إجراءات "
هزيتلو براسي باهي وقمت مع ماايا.. قربنا معاه وين الشباك وقدمنا بسبوراتناا.. كملنا إجراءات لكل ورجعنا لبلاصتناا.. قعدت بجنب ماياا ومعانا خالد.. بقينا نحكيو ونفدلكو وين مايا تعرفت على خالد اكثر ولقات راحتها شوي ف الحديث معاه..هكاكا وغزرتلو كيف رجع حذانا وف يديه طبق.. حطو فوق الطاولة وقعد ساكت.. غزرت لخالد كيف حط القهوة قدامي والكيك يحكي
خالد:" شد كول حاجة قبل ماتطلع للطيارة "
وخرت الكاس لتالي نحكي
انا :" ماعينيش "
مايا :" رينو اشرب عالاقل قهوتك "
غزرتلها نحكي
انا :" ك نجوع تو نقوم نشري قهوتي وحدي.. افطر انت كان تحب "
اول ماتلفت ريتو كيف كان يغزرلي.. دورت وجهي فيسع وغزرت لخالد نحكي
انا :" خالد بش نسألك.. ياخي انت تجي لتونس ؟"
حط الكاس من يديه يحكي
خالد:" اي نجي ف الشتاء "
انا :" مالا بش نرجعو نتقابلو "
ضحك يحكي
خالد:" عندك شك.. اول مانجي تو نكلمكم "
ضحكت وهزيتلو براسي باهي.. تكيت بظهري لتالي وبقيت نسمع ف خالد وماياا لي قاعدين يحكيو..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
