#عيسى_يحكي
هزيت المنشفة لفيتها على نصي وخرجت من بيت البانو طول لبيتي.. جبدت حوايجي لبستهم وريقلت أموري وهزيت التاليفون بش نشوف ادم وينو.. هكاكا وسمعت الباب ك دق.. خرجت فيسع حليتو وين شفت ادم قدامي.. ضحك يحكي
ادم :" بصراحة لازمني مفتاح انا زادة "
تبسمت نحكي
انا :" فاتتنا هاذي.. ادخل ادخل "
سكرت الباب بعد مادخل واشرتلو ناحية الصالة نحكي
انا :" تي ادخل شبيك واقف "
غزرلي يحكي
ادم :" وحدك هنا ؟"
انا :" اي امي اللوطة حذا الجماعة... "
قص علياا ك ريتو دخل فيسع وتكا عالفوتاي يحكي
ادم :" تي ماو تكلم وانا لي كنت حاشم "
قحرتلو وخلطت عليه.. ترميت عالفوتاي مقابلة نحكي
انا :" جديدة هاذي.. مشيت وجيت نلقاك وليت تحشم من وقتاه طول عمرك بلاطة "
ضحك يحكي
ادم :" شبيك حلبت علياا اا الحوت..ساعة انا نحشم من غاليوتة نقدرها "
هزيتلو براسي باهي من غير حتى كلمة.. هز روحو وغزرلي يحكي
ادم :" اي وينو لعشا؟ طالع بش نتفرج ف ڤدك "
تكيت بظهري لتالي نحكي
انا :" هاو طالع اصبر شوي "
هز الكوموند حل التلفزة ورجع تكا.. غزرتلو نحكي
انا :" بنت اختك لباس تحاليلها؟"
ادم :" اي لباس شوي فقر دم كهو "
انا :" انشالله لباس "
ضحك يحكي
ادم:" طالعة لخالهاا.. فقيرة من صغرتها مسكينة "
عديت بيديا على شعري وضحكت نحكي
انا :" ربي يصبرها.. مزية بعيدة عليك "
قحرلي ورجع غزر للتلفزة ساكت.. تنهدت بالشوي نحكي
انا :" اا ديزل "
ادم :" شتحب "
انا :" قوم عندي ما نسألك "
هز روحو شوي وغزرلي يحكي
ادم :" اسال "
انا :" مفما حتى خبر على بلبل؟؟ "
هز روحو أكثر واستواء ف قعدتو.. عدا بعينيه علياا وغزرلي درا كيفاه يحكي
ادم :" فكرتني.. لا فما خبر "
حليت عينيا على وسعهم وقربتلو نحكي
انا :" وشبي *** ساكت.. احكي خبر شنوة ؟"
ادم :" ولد العونية وزع رجالو لكل يلوجو عليه.. عاد مرة لمحوه ف سوق سيدي عبد السلام.. الطحان شافهم ڤطع يجري.. دخل بيهم بين الزناقي ومن غادي فص ملح وذاب "
كبست بيديا على ركبتي نحكي
انا :" هاني رجعت وماوراياا شي غيرو هوو.. كان مانجيبوش نبدأ نكركر ف دين *** من ساڤيه ك البرشني ف الحومة انا مانيش راجل "
ادم :" تي مصيرو يرجع ك الطحان وحدو..لوقتاه بش يبقى متخبي ك الجربوع.. انا بطبيعتي نستنالو فيهاا خليه يطيح ف يدي برك تو نشد نكفخوو نوريه الديزل شيعمل "
حكيت على جبيني وضيقت عينيا فيه نحكي
انا :" غدوة تو نبعث واحد من الرجال يضرب دورة ف سوق سيدي عبد السلام.. يسأل غادي ممكن يوصل لحاجة "
ادم :" سبقتك وعملتها.. قالو ماشي سلعة لطاستو ك العادة من غادي اما الطحان حلب بيناا باز تو يشوف كبران اخر يشري من عندو "
انا :" اي الكبرانة لكل نعرفوهم احناا.. تو نبعثولهم بالواحد بالواحد لي يشوفو يشد **** اموو ويكلمناا "
هزلي براسو باهي يحكي
ادم :" باهي باهي.. اما تعرف انا لي مبهتني شنوة ؟"
انا :" شنوة ؟"
ادم:" شكون قاعد يعطي فيه ف حق السلعة.. بلبل ماهوش يخدم تو.. انا سقسيتهم لكل وكلهم قالولي بلبل ماظهرش من وقتها.. حتى الخنابة لي يداهم تلعب قالولي بلبل ماكلمهش عندو أكثر من شهر..مالا منين قاعد يجيب ف الفلوس بش يجيب السلعة "
مطيت شفايفي نحكي
انا :" راو قاعد ينطر كالعاده ف الميتروات والكيران بش يحير الم**** هذاكا "
حك على لحيتو وهزلي براسو لا يحكي
ادم :" تؤ.. بلبل مش وحدو "
عدا بصبعو عالطاولة ورجع غزرلي يحكي
ادم :" هاي مرشومة هناا كان مايطلعش وراه شكون.. راني معاشرهم أكثر منك يا الحوت وماتنساش اني كنت واحد منهم قبل.. بلبل بالمستحيل ينطر 300د بش يجيب طرف لشيختو.. تي ولد العونية هو لي كان يعطي فيه شبيك "
عديت بعينيا عليه بقيت نخمم ف كلامو.. هزيت بحاجبي نحكي
انا :" خلي يطلع كلامك صحيح.. كان مانڤلبش الحومة على رأسهم لكل انا مانيش الحوت.. بلبل ولي تابعو مهما كان هو شكووون غلطو ك وحلو معاياا.. تو نخلاهم عبرة لغيرهم بش لي يخمم يدور بيااا يفكر الف مرة "
رجع تكا وعلا ف صوت التلفزة يحكي
ادم :" ايا فك عليناا من **** جاي بش نتفرهد حذاك مش بش نحكي علاهم "
قحرتلو نحكي
انا :" كافيشانطاا هناا جاي تتفرهد "
ضحك وغزرلي يحكي
ادم :" والله ياريت نمشيو لكافيشانطاا.. عندي قداه عالجوو هذاكاا "
كمل كلامو وغمزني.. هزيت لمخدة ضربتو بيها نحكي
انا :" طحان هامل "
ادم:" قوم قوم حل الباب ياعاقل انت يامتربي "
قحرتلو وقمت حليت الباب لي بقى يدق وين شفت امي..غزرتلي تحكي
غالية :" بابا هذا عشاكم "
خذيت القفة من يداها نحكي
انا :" عيش امي..تعبتك معايا "
غالية :" تعبك راحة.. صحة عشاكم "
تلفتت على صوت لي صاح يحكي
ادم :" وييينك ياا غاليوووتة ياا مزيانة "
ضحكت وطلت عليه تحكي
غالية :" ادم بابا شنحوالك "
ادم :" الحمدالله.. ربي يخليك ليناا غاليوتة ريحة ماكلتك لهناا وصلة "
غالية:" صحة وبالشفاء لولدي.. اياا قوم تعشا مدامو سخون "
غزرتلي تحكي
غالية :" افرح بصاحبك مانوصيكش "
ادم :" اي وصيه علياا راو عامل فياا "
ضحكت وخرجت.. سكرت الباب وراهاا وقحرتلو نحكي
انا :" قوم حط الطاولة هاني بش نعمل فيك على قاعدة "
رجع تكا وحط ساق على ساق يحكي
ادم :" انا ضيف والضيف مايعمل شي.. وهات نتعشاو هناا مش لازم طاولة وكرسي.. مانيش غريب انا "
انا :" ثبت روحك.. ضيف ولا ماكش غريب "
ادم :" الزوز "
دوب تبسمت ودخلت حطيت حذاه القفة..جبدت لعشا وين هو قام وبقينا نتعشاو مع بعضناا وكل مرة نحكيو ف موضوع..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
