#خالد_يحكي
غزرتلو ك مشى من غير مايستناني نجاوبو.. للحظة استغربت تصرفات عيسى..مش فاهم شبيه من وقت ماجا وهو على عصابو.. غير لي عملو ليوم ف الريستو.. تنهدت بالشوي وغزرتلها وين شفتها مازالت قاعدة وساكتة.. عديت بعينيا عليها ورجعت غزرت لخيالو لي بعد وين بقيت نخمم ف شنوة وضعهم الزويز هاذم.. قربتلها شوي وقعدت بجنبها نحكي
انا :" اما انت غشك خايب ؟"
غزرتلي ورجعت غزرت قدامها تحكي
لارين :" برا امشي مع صاحبك كان مش عاجبك غشي "
ضحكت نحكي
انا :" لا يابنتي.. انت ارحم من الحوت بصراحة "
ريتها ك فركت يداها فبعضهم وبقات ساكتة.. تنهدت بالشوي نحكي
انا :" شوف لارين نعرف لي عملو عيسى ف الريستو مايجيش وصدقني انا قتلو لكلام هذاا.. اما زادة لي عملتو انت مايجيش.. كيفاه تخرج بلا ماتخبرنا..تصور كان صارتلك حاجة "
رجعت شعرها لتالي وغزرتلي تحكي
لارين :" انا كنت بحاجة اني نبقى وحدي "
انا :" نعرف.. اما حقك خبرتني عالاقل انا وانا كنت بش نخليك تخرج المهم نكونو عارفين بلاصتك "
ضمت على شفايفها تحكي
لارين :" بكري مانجمت نخمم ف شي.. حبيت كان نخرج من غادي ونبعد.. مانجمتش نرجع حذاكم خاطر حشمت من الناس ومنك "
دورتلها وعديت بعينيا عليهاا نحكي
انا :" عندك حق تخمم هكاا... "
قصت عليا وغزرتلي تحكي
لارين :" ياخي انا شقلت بكري حتى يعمل هكاكا.. كان ينجم يقلي لا وانا بش نسكت اما مش يصيح علياا بالطريقة هاذيكا "
انا :" ياخي عيسى جديد عليك.. انا نعرفو اكثر من 10سنين هذا طبعو.. شعندنا نعملولو.. صاحبنا ولازم نتحملوه"
ريت دموعها ك نزلو تحكي
لارين:" انا ديما متحملتو.. من وقت ماعرفتو وهو هكا معايا وانا نقول ميسالش.. حتى ك يغششني والله نرجع وحدي ونقول عادي المهم هو مش متغشش عليا..نسمع كلامو ف كل شي اما هو مش عاجبو شي.. قد مانعمل ديما يعيط علياا وانا مانحبوش يعيط علياا هكاكا "
عديت بعينيا عليها نغزرلها كيفاه تبكي وتحكي عليه.. ضيقت عينيا وانا نخمم ف كلامهاا وين ماوصلت كان لفكرة وحدة.. تبسمت نحكي
انا :" باهي هاو مشى هو تو..علاش مازلت تبكي فهمني "
مسحت دموعها بكف يداها تحكي
لارين:" خير ك مشى.. اصلا هو يستنى فيهاا "
انا :" هههه يابنتي وين يستنى فيها حرام عليك.. الراجل بقى يحاول فيك وانت قريب تضربو وتضربني معاه.. ريتي كان جا عبد اخر راو عيسى كلاه اما معاك انت بقى ساكت وخذا بخاطرك ومشى.. وحتى بكري والله خاف عليك وبقى يلوج عليك ك المهبول "
عدات بعيناها علياا وغزرتلي درا كيفاه.. عوجت شفايفها حكي
لارين :" حد ماقلو غششني حتى يوصل يلوج علياا "
انا :" عيسى هكا طبعو راجل نرفزوي ديما على عصابو..يحكي كلمة ونص.. و ك يحكي ساعات كلامو يجرح وانا ريت هذاا ف قداه من موقف.. اما صدقني قلبو باهي.. اصلا والله عمري فحياتي لا ريتو خايف كيما بكري "
عضت على شفايفها تحكي
لارين:" نعرف قلبو باهي.. اما انا مانحبوش يتعامل معايا هكاكا.. هاذي مش اول مرة "
تبسمت نحكي
انا :" بالك هو يتعامل معاك هكا خاطرك تهمو "
عقدت بحواجبها تحكي
لارين :" كيفاه؟"
انا :" مانعرفش يعني ممكن من خوفو عليك يتصرف هكا.. انا ريتو لبارح وليوم كيفاه لاهي بيك.. يعني مانظنش هو قاصد بش يجرحك بكري "
عدات بعيناها علياا ودرت وجهها.. ريتها ك سرحت قدامها تخمم.. تبسمت على تعابير وجهها لي قاعدة تتبدل.. رجعت غزرتلي تحكي
لارين:" مهما تقول مانيش بش نسامحو.. سايي انا قررت المرة هاذي "
ضحكت على كلامها كيفاه تحكي ك الصغار.. مش فاهم عيسى علاش مش قاعد يشوف ف هذاا.. حقو يوسع بالو معاها خاطرها صغيرة وتصرفاتها عادية متاع عمرها..نحكي
انا :" ميسالش ماتسامحوش تو.. خليه هكاكا "
عدات بعيناها علياا تحكي
لارين:" زعمة يكون روح هو ؟"
تبسمت وهزيتلها براسي لا نحكي
انا :" لا ماروحش "
لارين:" كيفاه عرفت ؟"
اشرتلها بعينيا على كرهبتي نحكي
انا :" اهوكا وين واقف..ماتحركش من بكري "
ريتها ك غزرت للكرهبة وين سرحت شوي فيهاا.. رجعت غزرتلي تحكي
لارين :" قلو يمشي.. خاطرني حلفت برحمة نور مانمشيش معاه "
هزيتلها براسي باهي نحكي
انا :" تهنى ماكش بش تمشي معاه.. تو هو يروح بالكرهبة واحنا على ساقينا "
هزتلي براسها باهي ورجعت غزرت للكرهبة.. ضيقت عينياا فيها نغزرلها كيفاه داخلة بعضها.. رغم انها تقول متغششة عليه اما مازالت تغزرلو كاني تستنى فيه.. رجعت غزرت للكرهبة وين شفتو هو زادة مازال واقف وعينيه علينا.. للحظة استغربت تصرفاتهم الزوز.. خاطر ماهيش تصرفات تاع مجرد ولد عمة مع بنت خالو حاسس فما حاجة أخرى اما ماحبيتش نركز خاطر ممكن نطلع غالط كيما ماحبيتش ندخل.. تنهدت بالشوي نحكي
انا :" ربي يهديك بقينا لشر لتو "
قحرتلي تحكي
لارين:" قوم اخلط على صاحبك "
انا :" صاحبي ربي معاه.. انا بش نهزك تو ونروحو.. راي آنجيلا مصنفة للعشاء خلينا نتعشاو "
تنهدت بالقوي تحكي
لارين :" ماعيني ف شي "
انا :" لارين نعرفك مازلت مغششة امامايجيش تبقى هناا "
هزتلي براسها باهي ووقفت.. وقفت بعدها نحكي
انا :" عيشو لي يسمع لكلام "
دوب تبسمت وبقات تمشي بجنبي.. تلفتت على صوت الكرهبة لي خدمت وين شفتو تحرك هو زادة.. بقيت نمشي بجنبها ماحبيتش نكلمها خاطر ريتها سارحة وظاهر مازالت متغششة وداخلة بعضها خاصة بعد كلامي معاهاا وين تاكدت انهاا تخمم فيه تو.. للحظة حسيت انها متقلقة خاطر التصرف جا من عيسى مش عالموقف بحد ذاته..كلامها متاع بكري وصلي قداه هو يعنيلها واي حاجة منو ممكن تقلقها...
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
