#عيسى_يحكي
فقت من سرحتي على صوت امي ورايا.. رميت السيقارو وتلفتت وين شفتها خرجت حذايا وف يداها كاس تاي.. حطتو قدامي تحكي
غالية :" هذا التاي لحمر لي يحبو ولدي "
شديتها من يداها وبستها منها نحكي
انا :" ربي يخليك ليا غاليتي ويطولي ف عمرك "
عدات بيداها على شعري وقعدت بجنبي تحكي
غالية :" ويخليك لياا يانور عيوني ونفرح بيك "
تبسمت نحكي
انا :" عيش امي "
هزيت كاسة التاي عملت رشفة وغزرتلها كيف عدات بعيناها علياا ساكتة.. حطيت الكاسة عالطاولة نحكي
انا :" امي فما حاجة ؟ شبيك ساكتة؟"
تنهدت بالشوي وعدات بعيناها علياا تحكي
غالية :" عيسى بابا حبيت نسألك حاجة؟"
درتلها بكلي وهزيتلها براسي اي نحكي
انا :" اي قلي "
غالية :" انت كلمت مريم؟"
غمضت عينيا بالقوي و رجعت حليتهم نحكي
انا :" هي كلمتني لبارح "
غالية :" شتحب ؟"
انا :" تسأل علياا وقتلي ايجا طل "
هزتلي براسها باهي تحكي
غالية :" فهمتك.. وانت ناوي تمشي تطل علاها ؟"
عديت بيديا على شعري وكبست على رقبتي نحكي
انا :" لاا "
غالية :" علاش يابابا ؟ ميسالش امشي طل علاهاا.. انت عندك قداه لا طليت ولا كلمتها.. ك كنت مسافر طلبتني وقتلي كيفاه انت نسيتها.... "
قصيت علاها وحليت عينيا على وسعهم نحكي
انا :" هي كلمتك ؟ علاش تكلم فيك ؟"
خذات نفس طويل تحكي
غالية:" طلبت تشكيلي كالعادة.. قتلي عيسى نسانا ومعادش متفكرني وكأني مانيش عيلتو انا زادة و... "
عديت بعينيا عليها نغزرلها ك سكتت.. هزيت بحاجبي نحكي
انا :" وعاودت جبدتلك موضوع الوصية مش هكاا ؟"
هزتلي براسها اي من غير حتى كلمة.. نفخت بالقوي وقمت من بلاصتي.. شديت ف الدربوز خذيت نفس طويل ورجعت غزرت للامي نحكي
انا :" امي راني تخنقت منو الموضوع هذاا.. فديت حاسو كيما لحمل لي بارك فوق ظهري وصدري.. من لي عمري 20سنة وهي ورايا بيه مرجتني.. خلاتني عايش بتانيب ضمير.. خلاتني كل مانرقد نحلم بيهاا ونخمم كان موضوع لوصية.. أكثر حاجة نفد منهاا ك عبد يجبرني على حاجة ويشدني من يدي لي توجع وهي عاملة هكاا.. شادتني من أكثر حاجة واجعتني "
قامت من بلاصتها وقربتلي.. حطت يداها على خدي تحكي
غالية :"اللطف على ولدي من لوجيعة..عيسى مفما حد ينجم يجبرك..انا مستحيل نخلي حد يجبر ولدي على حاجة هو مش رايدهاا.. اما هذا مايعنيش انك تنساها وتجبد روحك.. مريم من عيلتك تقبل ولا ترفض هاذي حقيقة "
عديت بعينيا عليها نحكي
انا :" وانا مانيش رافض هذا.. اما يا امي راني كل مانمشي بلحق نتضغط من حديثها.. ماهيش مخليتني نخمم ف راحتي "
هزت بحواجبها تحكي
غالية :" ياخي انت قاعد تخمم فيه ؟"
ضغطت على يدي بالقوي نحكي
انا :" اي ك نتفكر زهرة ولا ك نحلم بيها ساعات نصير نخمم ف الموضوع على خاطرهاا.. اما بعد فيسع مانفيق ونقول لا هذيكا بنت توفيق خو سميحة.. مستحيل نعرس بيها ولا ندخلهم لحياتي.. اصلا بعد ماخالي حكالي كل شي صرت نتخنق من فكرة انو واحد من عيلتي.. وكل مانتفكر كلام خالي لياا نلقى روحي بين نارين امي.. انا مانحبش نخسركم.. اصلا يكفيني من جرت لحكاية هاذي انا..."
ضيقت عيناها فيا تحكي
غالية :" انت شنوة؟"
غمضت عينيا بالقوي و رجعت حليتهم وين استرجعت كلامي لي تجبرت نقولو للارين ولي وجعتهاا بيه اما ورغم اني كنت عارف اما عملت هذاكا لكل على مصلحتها هي.. اصلا حتى كان ماقلتوش كنت بش نخسرهاا وقت تعرف شكون هوماا عيلتي الثانية.. غزرت قدامي نحكي
انا :" انا صرت على عصابي "
حطت يداها على ظهري طبطبت علياا تحكي
غالية:" ماعندك علاش تصير على عصابك.. وانت مستحيل تخسرناا يابابا..انا حياتي تكمل كان بيك ياعيسى..شوف انت ماكش صغير تو..شوف انا مانحبش نعطي رأيي ساعات بش ماتقولش امي تحب تحرمني.... "
قصيت علاها وقت غزرتلها وشديتها من يداها نحكي
انا :" انت ماعندك مناش تحرمني..امي رايك انت افهم رأيي.. انت امي هوما حتى شي.. لي يربطني بيهم مجرد الدم كهو عكسك أنت.. انت حياتي امي "
طبطبت على صدري وتبسمت تحكي
غالية :" وانت روحي ياعيسي وعينيا لي نرا بيهم.. وانا نحب نرا ولدي فرحان.. رأيي انك تعمل لي يريحك وماتنساش انا وخالك واقفين ف ظهرك.. لي بش تقررو انت كهو انا نعرف مخك كبير ورزين.. وبش تأخذ القرار الصحيح.. هذا عرس مش لعبة "
هزيتلها براسي باهي من غير حتى كلمة.. حطت يداها على خدي تحكي
غالية :" اطلب عمومك زادة هنيهم.. انت تعوض بوك تو الله يرحمو.. يزي سي خوك ماهو سأل على حد خلاناا ف الحشمة مع الناس لكل "
تبسمت نحكي
انا :" باهي امي تهنى تو نطلبهم لكل "
غالية :" عيشلي ولدي.. خليني ندخل نسخنلك كاسك برد وانت زادة ادخل "
انا :" باهي هاني وراك "
باستني من كتفي وبعدت علياا.. هزت الكاسة ودخلت.. خذيت نفس طويل وغزرت قدامي نخمم ف كلامي مع امي..رغم اني عارف قراري مليح اما ساعات نحس روحي نتراجع من وراء ضميري لي يأنبني وقلبي لي يوجعني.. ولي زاد علياا تو ظهورهاا هي ف حياتي لي خلاتني نراجع حياتي وقرارتي من اول وجديد.. يمكن قبل ماكان عندي شي نخسرو على هذاكا ماكنتش نخمم عكس تو وين لقيت روحي نرقد ونقوم عالموضوع هذاا.. للحظة حسيت بخوف كان نرفض على خاطرهاا وعلى خاطر بش تكون هي فحياتي نلقى روحي اذيتهاا أكثر ومن بعدها علياا وقت نحطها قدام مريم وتوفيق.. اما مهما بش يكون قراري انا بش نحميها ونكون ف ظهرها يكفي انهاا تتقبل شكون هوما عيلتي الثانية..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
