#لارين_تحكي
هزيت راسي وغزرت للباب لي تحل وين شفت عمتي دخلت.. عديت بعينيا عليها نحكي
انا :" هياا يا عمتي راني ماتعشيتش نستنى فيك"
ضحكت تحكي
غالية :" عيشلي بنتي.. نغسل يدي ونجي "
هزيتلها براسي باهي وغزرت لسميحة تحكي
سميحة :" مانيش عارفة علاش يتعب ف امو هكاا.. علاش ماهبطش تعشى هناا معانا جميع "
طبست راسي وبقيت نحرك ف المغرفة.. سمعت عمتي ك رجعت وجبدت الكرسي بجنب مايا تحكي
غالية :" قتلك معاه ادم.. يحبو يبقاو على راحتهم.. وزيد انا ماتعبتش "
جابر :" يعطيك الصحة غاليتي.. خير خلاهم على راحتهم "
سميحة :" ياخي فاطمة ناوية تطول حذا أميرة؟ ماو تروح حذا ولدهاا "
غالية :" بنت اميرة مريضة واميرة حبلة ماتنجمش وحدهاا مشات تعاون ف بنتها "
سميحة :" اي وولدها ؟ رمضان مازالو 5 ايام ناوية تخليه وحدو "
ريتو ك نفخ وقحرلها يحكي
جابر :" انت شيهمك فيهم؟ وزيد ادم ولد الدار حتى كان امو بقات تو يعدي رمضان حذاناا "
ريتها كيف ضحكت وعدات بعيناها علينا تحكي
سميحة:" ك هكاا برا اشري طاولة أخرى ما اكبر.. مانيش ناوية نعدي رمضان واحنا فوق بعضناا "
كبست على مغرفتي بالقوي بش نتمالك اعصابي ومانجاوبهاش.. سمعتو ك علا ف صوتو شوي يحكي
جابر :" كلمة اخرى مانخليك تمشي تعدي رمضان ف دار خوك.. وقتها تو يفضل كرسي زايد "
طبست راسي وتبسمت من غير مانشعر.. ريتها ك قحرتلي ورجعت غزرتلو تحكي
سميحة :" علاش كلامي غالط.. ماتنساش رمضان معانا عيسى وعزيز وهاو خلط ادم.. لازمك تشري كراسي اخرين "
غالية :" سميحة تو هذا حد عقلك.. تو نهبط انا لكراسي لي عندي لفوق.. وكان تضايقتو ياسر تو نطلع انا وولادي لداري"
تهزيت وتحطيت على يد جابر لي ضربت عالطاولة يحكي
جابر :" ماعندك وين طالعة..انت وولادك بش ترمضنو هناا حذاياا ك العادة وكيما تعودنا..هاذي دارك غالية قبل ماتكون داري.. وانت سميحة للاخر مرة انبه عليك كلمة اخرى حنك لباب لدار خوك وورحمة لعزيز علياا كان خرجتي لا عاد تعفسي الدار.. واااضح "
عضيت على شفايفي وانا نغزرلو كيفاه متغشش ويصيح علاهاا.. اول مرة نشوف وجهو هكاا.. خذيت كاسة الماء عبيتها وعطيتهالو نحكي
انا :" جابر شد اشرب "
خذاها من يدي من غير حتى كلمة وعمل رشفة.. سمعت عمتي تحكي
غالية :" سيدي خوياا ماتتغشش تو الدم يطلعلك.. ماصار شي وانا هاني حذاكم.. كلام يتقال وكهو "
هزلها براسو باهي ورجع ياكل ساكت.. غزرت لمايا لي كانت مطبسة راسها كاني حاشمة.. تنهدت بالشوي وهزيت صحن السلاطة نحكي
انا :" مايا خليني نزيدك سلاطة ياروحي.. نعرفك تحبها "
هزتلي براسها باهي ورجعت تاكل بعد ماغرفتلها.. للاول مرة مانتغشش من سميحة على روحي على قد ماتغششت كيفاه حكات هكاكا قدام ماياا كاني تقصد فيهاا.. مانعرفش كيفاه شديت روحي وسكتت ماحبيتش نكبر لحكاية مدام جابر جاوبهاا..غزرت لعمتي تحكي
غالية :" رينو هاني حضرتلكم طبق فيه شوي غلة وتاي وحلو هزو معاك ك تطلعو "
جابر :" وين طالعة ؟"
انا :" انا ومايا بش نسهرو شوي ف السطح.. ميسالش؟"
طبطب على يدي وتبسم يحكي
جابر :" بالطبيعة ميسالش.. مانحبكش تسالني ف شي تصرف على راحتك وانت زادة ماياا الدار داركم "
ماايا :" عيشك عم جابر "
ريتو ك غزرلها يحكي
جابر :" رنوش اطلع معاهم شوي بدل الجو مع اختك وصاحبتها "
عدات بعيناها علينا وغزرتلو تحكي
رانية :" لا بابا انا بش نرقد.. غدوة نقرأ بكري "
هزلها براسو باهي ورجع ياكل.. مسحت يدي وغزرت لمايا نحكي
انا :" كان كملت خلينا نطلعو "
مايا :" اي هيااا امان "
هزيتلها براسي باهي وعديت بعينيا علاهم نحكي
انا :" صحة ليكم.. احنا هانا لفوق "
غالية :" باهي ماما براو "
تبسمت ومشيت انا ومايا غسلنا يدينا وريقلنا أمورنا تعدينا للكوجينة هزيت الطبق وخرجناا.. شدتني من مرفقي تحكي
مايا :" سميحة قد ماتاكل بخص قد ماتزيد تحكي "
ضحكت نحكي
انا :" هذاكا عشاها كل ليلة "
مايا :" والله توتر لعصاب.. ربي يصبرهم "
انا :" ماتركزش معاها.. خلاهاا تحكي كيما تحب "
مايا :" اي اي تهنى "
حليت عينيا على وسعهم اول ماوصلنا للسطح وشفت الضو لي يشعل.. حطيت الطبق على جنب وغزرت للامبوبة مانعرفش علاش ف اللحظة هاذي تفكرتو وحسيت انو هو لي بدلهاا ممكن عمتي تكون بعثتو على خاطري.. تنهدت بالشوي وتلفت لمايا تحكي
ماايا :" ايا ايجا اقعد "
هزيتلها براسي باهي وطبست قعدت فوق الزربية لي كانت ف القاعة بجنبها.. ربعت ساقياا وعبيت كيسان التاي.. خذات الكاس من يدي تحكي
ماايا :" ياخي الدار لي تحتنا متاع شكون؟"
عملت رشفة من الكاسة وهزيت كعبة حلو نحكي
انا :" متاع حتى حد..من لي جيت وهي مسكرة هكاكا حد مايسكن فيها ؟"
ماايا :" علاش؟"
هزيت بكتافي نحكي
انا :" والله مانعرف.. ماسالتهمش لحق "
هزتلي براسها باهي تحكي
ماايا :" فهمتك "
حطيت الكاسة ودرتلهاا بكلي نحكي
انا :" اياا نطلبوه تو خالد ؟"
ماايا :" اي اي.. كلمو مدام مازال بكري "
انا :" باهي دقيقة "
شهقت بالقوي اول ماجبدت تاليفوني نحكي
انا :" نسيت الكارط اللوطة "
قحرتلي تحكي
مايا :" مخك وينو رينو ؟"
قلبت شفايفي نحكي
انا :" سميحة العو خلات فياا مخ.. خليني نمشي نجيبها فيسع ونرجع.. خليك هنا حبي "
مايا :" باهي برا ماتبطاش "
عطيتها بظهري ونزلت نجري فيسع.. اول ماوصلت لطابق الثاني وقفت ف بلاصتي ك ريتو طالع قدامي.. دمي فور مني وانا نشوف ف غزرتو لياا لي نكرهاا غير تبسيمتو لي نحسها كلها خبث.. للحظة تفكرت آخر موقف عشتو معاه هناا فالدروج وكيفاه هددني وقالهالي صريحة..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
