#لارين_تحكي
اول ماكملت طبقت اخر مريول سكرت الفاليز وقمت.. حطيتها على جنب ورجعت قربت للفرش بقيت أنظم فيه..هكاكا وتلفتت على صوت الباب لي تحل وين شفتو كمل حضر روحو..عديت بعينيا عليه نحكي
انا :" احم.. صحة "
تبسم يحكي
عيسى:" يعطيك الصحة.. كملت ؟"
هزيتلو براسي اي نحكي
انا:" اي كملت.. هاني بش نمشي نجيب فاليزتي.. شوف عيسى اخرج فيسع ماتخلينيش نستنى فيك.. مكانش نخليك ونمشي وحدي "
قحرلي واشرلي بعينيه وين الفوتاي يحكي
عيسى :" اقعدي "
بلعت ريقي وتبسمت نحكي
انا :" صلي عالنبي والله نفدلك معاك.. نستناك حتى ساعة وكان تحب أكثر عا... "
قص علياا يحكي
عيسى:" اسكت واقعد "
هزيتلو براسي باهي ومشيت قعدت.. ريتو ك قرب ناحيتي وقعد عالطاولة قدامي.. عدا بعينيه علياا يحكي
عيسى :" شوفي بش نتفاهمو من تو.. مدامنا ماشين لشط لي سيادتك تحب تشوفو..مالا بش تسمعي كلامي "
هزيت بحاجبي نحكي
انا :" سمعني كلامك "
عيسى :" تعرفي الثنية من هناا للبحر قداه ؟"
ضيقت عينيا وبقيت نخمم شوي نحكي
انا :" طويلة نظن بين 10 سوايع و11 ساعة "
عيسى:" يعطيك الصحة.. واحنا بشنوة ماشين ؟"
انا :" مفهمتش ماو بالكرهبة "
قحرلي يحكي
عيسى :" صحيتي.. بالكرهبة وماناش وحدنا.. مالا طول الثنية مانحبش نسمع صوتك.. التفركيح لا.. والضحك بصوتك لي يبدأ لعلع لا.. والتفدليك الماسط لا "
ضغطت على يدي بالقوي ورسيت على سنيا بالقوي نحكي
انا :" شرايك كان تشربني منوم مش خير.. هكا ترتاح من صوتي جملا "
قحرلي يحكي
عيسى :" كان جا عندي راني عملتهاا.. المهم خليني نكمل.. ك نوصلو غادي.. تبقي قدام عيني..من حذاياا ماتتحركيش..مانبقاش نجري وراك ك الصغار.. كيفكيف الضحك لا والتفركيح لا.. لبستك مانوصيش علاها خاطر ظاهرلي حكينا فيه الموضوع.. ك نقول بش نروحو يعني بش نروحو ماتشديش صحيح قدام الناس.. مفهوم كلامي ؟"
عضيت على شفايفي من لعصب لي حسيتو نحكي
انا :" مش كان تربطني وراك مش خير؟ شمعناها مانتحركش من حذاكا ومانضحكش؟ ماشية لدار ميت انا.. الناس تمشي بش تتفرهد... "
قص علياا يحكي
عيسى:" تفرهدي بالمعقول "
هزيت حواجبي نحكي
انا :" المعقول عندك انت نهبط الكبي "
عيسى:" لي عندي قلتو.. موافقة ؟"
قحرتلو نحكي
انا :" عارفتها مشية نحسة "
حل عينيه فيا يحكي
عيسى:" مدامها مشية نحسة طرسي هناا ترتحي وترتاحي "
عديت بيديا على وجهي وقمت من بلاصتي نحكي
انا :" والله لا نبقى هناا.. ماشية ماشية.. نبقاش معاك فرد بيت ووجهي ف وجهك نهار كامل.. المهم نمشي "
وقف قدامي وهز بحاجبو يحكي
عيسى :" باهي امشي.. اماحبلك ربي تطيحي كلمة من كلامي "
ضيقت عينيا فيه نحكي
انا :" كانك نسيت وعدك ليا ؟"
نفخ بالقوي يحكي
عيسى :" اخرجي "
تبسمت وقربتلو نحكي
انا :" مانسيتوش مش هكا ؟"
حل عينيه فيا وعلا ف صوتو شوي يحكي
عيسى :" اخرجيييي "
هزيت ساكي من عالفوتاي وجريت من قدامو بالوقت خرجت.. سكرت الباب وراياا وغزرتلو نقلد فيه نحكي
انا :" ردي بالك تطيحي كلمة من كلامي.. مالا بش نضحك وبش نجري وبش نعوم ووريني شتعمل..."
تهزيت وتحطيت على صوتو ورايا يحكي
خالد:" ياخي تحكي وحدك ؟"
بلعت ريقي وتلفتتلو نحكي
انا :" اه لا.. علاش بش نحكي وحدي مهبولة انا ؟"
خالد:" ماقلتش هكا "
عديت بعينيا عليه نحكي
انا :" شمجيبك ؟ نقصد شتعمل هنا؟؟ اففف نقصد حاجتك بعيسى ؟"
ضحك يحكي
خالد :" ههه والله نسيت علاش جيت..المهم حضرتو ؟ معادش وقت "
هزيتلو براسي اي نحكي
انا :" انا حاضرة من بكري اما صاحبك مازال.. كان تحب ادخل شوفو "
ضحك يحكي
خالد :" باهي تو نشوفو..اسبقنا انت كان تحب افطر"
انا :" اي حتى انا جعت.. نخليك وماتبطاوش انتوما"
ضحك وهزلي براسو باهي.. خليتو واقف ودخلت فيسع لبيتي.. حطيت ساكي على جنب وقربت فيسع لميت البيت كيما جا وخبيت باقي حوايجي فالفاليز سكرتها هزيتها هي والساك الثانية لي فيها دبشي ومعاهم الساك لي فيها تاليفوني وخرجت.. بقيت هابطة دبة دبة من وراء السيكان..نفخت بالشوي خاطر ندمت ماقتلوش هو يهبطهم.. حطيتهم من يدي اول ماوصلت وقربت وين الطاولة وين شفت آنجيلا قاعدة.. تبسمت نحكي
انا :" bonjour Angela "
انجيلا :" بونجور لارين "
قربت جبدت الكرسي وقعدت قدامها..عدات بعيناها عليا تحكي
آنجيلا؛" cv؟؟ وينك لبارح حبيت نسهرو مع بعضنا "
انا :" désolé آنجيلا والله رجعت تاعبة "
انجيلا :" ميسالش chérie المهم انت سافا تو ؟"
خذيت فنجان القهوة من يداها نحكي
انا :" merci.. وي سافا قمت ف فورمة "
ضحكت تحكي
آنجيلا:" لازمك تكون ف فورمة مدام ماشية لسانتا جوليا "
انا :" ياخي انت مش ماشية معانا ؟"
هزتلي براسها لا تحكي
آنجيلا:" نو مانجمش.. لولاد بش يرجعو لازم نكون ف الفيلا "
عوجت شفايفي نحكي
انا :" dommage.. حبيتك تمشي معايا هكا نتونس بيك ومانقلقش "
ضحكت تحكي
آنجيلا:" ههه غادي مستحيل تقلق..صدقني بش تعمل جو وبش تعمل صحاب جدد.. ريستو خالد فيه جو محلاه وصحابو يهبلو"
طبست راسي وهمست نحكي
انا :" مسكينة هاذي ماتعرفش عيسى "
رجعت هزيت راسي وغزرتلها نحكي
انا:" نتمنى هذاا.. انشالله نعمل جو كالناس "
حطيت فنجان قهوتي وتلفتت على صوت ضحكهم.. تبسمت ك ريتهم يفدلكو مع بعضهم..قمت من بلاصتي وغزرتلهم نحكي
انا :" بش نخرجو تو ؟"
غزرتلهم ك قربو للطاولة وقعدوا..رجعت قعدت نحكي
انا :" بش تفطرو ؟"
خالد :" هههه كان كتب "
قحرتلو وغزرت لعيسى لي كان يشرب ف قهوتو ساكت.. بقيت قاعدة نغزرلهم ونستنى فيهم وقتاه يكملو بش نخرجو ونشدو الثنية...
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
