#لارين_تحكي
خذيت نفس طويل وغزرت ليد مايا لي شدتني.. تبسمت نحكي
انا :" هانا نسمعو فيك الزوز "
خالد :" وينك مايا شحالك ؟"
مايا :" الحمدالله لباس وانت خالد سافا ؟"
خالد :" سافاا عيشك.. هياا اسمعوني مليح.. كيما قتلك لارين انا اول حاجة عملتها شفت شكون من تونس سألي عليه قبل مايجي لفرنسا.. والاخبار كانت باهية.. كلهم يشكرو ف نزار..قالو انو طفل عاقل كان ديما ناجح فقرايتو يجي من الأوائل رغم ظروف دارهم لي كانت تحت الصفر اما هو ماوقفش كان يخدم ويقرا فرد وقت "
تبسمت نحكي
انا :" نفس لكلام لي قالهولي والله "
خالد :" اي.. و ف فرنساا نفس الشي.. كلهم يشكرو فيه.. هو كان موظف عادي ف دار ***** وبالوقت بدأ يترقى حتى صار مدير تنفيذي..بقى 10 سنين يخدم معاهم.. كلهم قالو عليه باهي ومفماش كيفو..اما زادة قالو انو مع الخدمة مايفهم شي..مايحبش اللعب ومايحبش الاستهتار على هذاكا كانو يعملو عليه "
انا :" باهي وسألت علاش هو قدم استقالتو ؟"
خالد:" اي اكيد.. حسب لي سمعتو انو امو العام لي فات تعبت برشة وهو معادش ينجم يبقى بعيد علاهاا.. مالا من وقتهاا قرر يعمل مشروع ف تونس بش يهبط ويستقر حذاهاا "
انا :" فهمتك.. وصحيح حكاية الشركة يعني ؟ متاع ازياء واعلانات ؟ وعرفت شريكو شكون ؟"
ضحك يحكي
خالد:" هههه يابنتي اصبري هاني بش نكملك.. اي صحيحة حكاية الشركة.. بقى عام وأكثر يحضر فيهاا واول ما حضرت قدم استقالتو..وشريك لي معاه صاحبو عرفو ففرنساا اسمو الاكس هو مسافر تو وخلا كل شي تحت يد نزار.. زادة سمعت انو نسبة نزار ف المشروع أعلى منو.. يعني نزار لكل ف الكل "
غزرت لمايا لي ضحكت تحكي
مايا :" يعني مسيو نزار جوو باهي ؟"
خالد:" هههه جوو ف النوار "
ضحكت نحكي
انا :" هههه يعني نكلمو ؟"
خالد:" شوف انا حبيت نسألك قبل.. تحب انا نقول لشكون يكلمو ويوصيه عليك ؟"
عضيت على شفايفي نحكي
انا :" نو امان خالد.. انا نحب نخدم معاه من غير توصية.. مانحبوش يقبلني خاطر شكون تكلم علياا.. نحبو يزيد يشوف خدمتي.. نعرف انت تحب تعاوني وعيشك على هذا اما انا نحب نكلمو "
خالد :" باهي كيما تحب.. اما شوف انا موجود ف كل وقت.. اي حاجة تصير ولا اي حاجة تحتاجهاا تاليفون واحد وانا نخلص كل شي "
تبسمت نحكي
انا :" عيشك خالد.. مستحيل ننسى وقفتك معايا "
خالد :" يزي من لكلام هذاا.. احنا خوات مابيناتناش "
انا :" باهي حسب رايك نكلمو ليوم ؟"
خالد:" اي اي ماتزيدش تضيع وقت.. اما لارين كيما قتلك راو صعيب كلهم قالو مع الخدمة مايعرفش بوه.. الوقت عندو هو فلوس..يعني لازمك تكون قد المسؤولية نحبك تثبت روحك قدامو.. هاذي فرصتك بش تحقق حلمتك انت ونور "
تبسمت اول ماسمعت اسمهاا.. شديت دمعتي بالسيف نحكي
انا :" من غير ماتوصي.. انا بش نكون قد المسؤولية وبش نحقق حلمة نور..غير ادعي انو العرض مازال قائم..تو فاتو 6 ايام "
خالد :" بقدرة مازال.. وانت شوف وكلمني "
تنهدت بالشوي نحكي
انا :" باهي خالد.. وعيشك مرة أخرى ربي يخليك "
مايا :" عيشك خالد.. انت فرحتنا تو عاللخر "
ضحك يحكي
خالد :" هههه حقكم فرحتو من قبل.. لي يعرفني لازمو يفرح "
ضحكت نحكي
انا :" ههههه صحيح والله "
خالد:" ايا نخليكم تو.. جمال يستنى فياا "
انا :"سلم عليه..مانزيدش نوصيك كلمة لا للاخر أمان "
ضحك يحكي
خالد:" هههه ياناري الحوت ولا لاخر.. يستاهل "
شديت ضحكتي بالسيف نحكي
انا :" ايا برا بش نعلق "
خالد :" هههه باهي باي "
انا ومايا :" بااي "
اول ما علقت عليه ترميت وعنقت ماياا بالقوي.. تبسمت على يداها لي دارت علياا نحكي
انا :" ماياا حااسة روحى فرحانة.. فرحانة عاللخر "
مايا :" انشالله ديما فرحانة رينو.. انا زادة فرحت بكلام خالد عاللخر "
بعدت علاها شوي وعوجت شفايفي نحكي
انا :" حسب رايك نزار ماحطش حد آخر ف البوست هذا ؟"
عدات بعيناها علياا تحكي
مايا :" انشالله لاا.. قوم انت فيسع هات الكارط واطلبو "
هزيتلها براسي باهي وتنطرت من بلاصتي.. جريت فيسع لساكي وبقيت نلوج عالكارط حتى لقيتهاا.. رجعت حذا مايا نحكي
انا :" ادعي ربي يكمللنا فرحتنا "
طبطبت على فخذي تحكي
مايا :" بقدرة ربي بش تكمل.. هياا اطلب "
خذيت نفس طويل حاولت نهدي دقات قلبي لي قوات وبقيت نكتب ف رقمو.. اول ماكملت طلبتو بالوقت وانا نرعش بكلي من التوتر وفرد وقت نخمم شنوة بش نقول.. نفخت بالشوي ك ماهزش علياا.. غزرت لمايا نحكي
انا :" ماهزش "
عضت على شفايفها تحكي
مايا :" تراه اطلب الرقم الثاني "
تنهدت بالشوي وهزيتلها براسي باهي.. كتبت الرقم الثاني وطلبتو وحطيت التاليفون يسمع بالقوي.. حسيت روحي فشلت واطرافي ترخفت وانا نسمع ف تاليفوني ينوقز وهو ماهزش.. علقت التاليفون وعوجت شفايفي نحكي
انا :" ماهزش "
عدات بيداها على وجهها تحكي
مايا :" ميسالش رينو.. بالك التاليفون مش حذاه تو.. لعشية اطلبو "
انا :" باهي "
تبسمت تحكي
مايا :" ايا فك التكشيرة.. والله حاسة انو بش يكلمك تو تشوف.. سبق لخير "
تبسمت نحكي
انا :" باهي هاني فكيتهاا.. وانشالله يطلب هو "
قامت من بلاصتها تحكي
مايا :" هياا قوم خلينا نفطرو.. وزيد خمم ف حكاية لخروج معانا "
حطيت التاليفون على جنب وقمت نحكي
انا :" لا انا بش نفطر ونجي نرقد لبارح عديتها ليلة نتقلب "
عدات بيداها على شعري تحكي
مايا :" باهي ياروحي ميسالش ارتاح..هياا نخرجو "
هزيتلها براسي باهي وخرجت معاها.. غسلت يدي وريقلت أموري ومشيت للطاولة.. قعدت معاهم وبقيت نخمم زعمة نزار بش يهز علياا اصلا زعمة مازالت عندي فرصة معاه ولا لا..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
