#لارين_تحكي
عضيت على شفايفي وبعدت عليه شوي.. هزيت راسي معاه وغزرتلو نحكي
انا :" ياخي شكون لي طلبك الوقت هذا ؟"
بعد عليااا وعدا بيديه على شعرو يحكي
عيسى :" واحد صاحبي "
عديت بعينيا عليه مستغربتو كيفاه هرب عينيه مني نحكي
انا :" شكون صاحبك ؟ ادم ؟؟"
غزرلي يحكي
عيسى :" لا مش ادم.. واحد ماتعرفوش "
قربتلو اكثر ووقفت قدامو نحكي
انا :" عيسى ماتقليش خالد كلمك وقلك حاجة على السخطة لآخر "
عيسى :" لا مش خالد "
انا :" احلف "
حل عينيه فيا يحكي
عيسى :"علاش بش نحلف؟قتلك ماهوش خالد وكهو "
عديت بعينيا عليه مش فاهمة شبيه تقلب هكا فجاة نحكي
انا :" ياخي انا سألت عادي شبيك تغششت ؟"
غمض عينيه بالقوي ورجع حلهم.. خذا نفس طويل يحكي
عيسى :" ماتغششتش..اما ماهوش خالد قتلك واحد صاحبي انت ماتعرفوش "
انا :" باهي انا ماقصدتش نسأل.. اما خاطرك بطيت قلت بالك صارت حاجة "
قربلي وشدني من يدي يحكي
عيسى:" ماصار شي.. ايجا خلينا نقعدو "
هزيتلو براسي باهي وقعدت معاه عالحافة..بقيت نغزر قدامي ساكتة نخمم ف شكون كلمو مانعرفش علاش حسيت روحي ماصدقتوش وحاسة انو فما حاجة.. تلفتت على صوتو يحكي
عيسى :" شبيك ساكتة ؟"
كبست عالكاب لي فوقي وبقيت نغزر قدامي نحكي
انا :" شي "
عيسى :" لارين ياخي تغششت؟ "
غزرتلو نحكي
انا :" لا ماتغششتش.... "
قص علياا يحكي
عيسى :" ماتكذبش "
انا :" اوكي تغششت.. وتعرف ماتغششتش خاطرك حكيت معايا بنرة هاذيكا انا تغششت خاطر نحسك تخبي فحاجات عيسى.. شوف انا معاك نحكيلك كل شي.. كان جيت انا طلبني شكون راني قتلك حتى على اسمها صاحبتي.. اما انت عمرك لا جاوبتني فحاجة.. ياتسكت.. ياترجع علياا بسؤال.. يا تجاوب كلمة وقص "
عدا بعينيه عليا وغزرلي درا كيفاه يحكي
عيسى:" لارين هذا لكل خاطر قتلك صاحبي طلبني ؟"
انا :" لاا مش على هذاا.. باهي اغزرلي..ك تشوفني قدامك تو ترا نقاط استفهام عليا..لا خاطر انا واضحة معاك.. نحكيلك كل شي ونجاوبك على اسالتك لكل.. اما انت لا.. ساعات نحس روحي مانعرفكش.. كانك مخبي حاجات وماتحبش تحكيلي "
غزر قدامو وعدا بيديه على وجهو ساكت.. تنهدت بالشوي وبقيت ساكتة انا زادة ماحبيتش نزيد نفسد الليلة هاذي.. شوي وسمعتو يحكي
عيسى :" فما حاجات تو تعرفهم فوقتهم خير.. وفما حاجات انا بيدي مانحبش نحكي فيهم حتى بيني وبين روحي.. خاطرهم مواضيع وتسكرو.. ونتصور انت تو تعرف عليا كل شي وأكثر حتى من غيرك.. مالا ماتلزليش لارين "
عديت بعينيا عليه نغزرلو كيفاه يحكي بلا مايغزرلي.. شديتو من يديه وقربتلو شوي نحكي
انا :" انا ماقصدتش نلزلك..اما حبيت نطمن انو مفما شي وزيد انا ك قلت هكاا حبيتك تحكيلي عليك اكثر.. ياخي احنا مش صحاب تو ؟"
غزرلي بالوقت وعدا بعينيه عليا يحكي
عيسى :" اي صحاب "
تبسمت نحكي
انا :" والأصحاب مايخبيو على بعضهم شي "
تبسم على جنب يحكي
عيسى :" مش ديما.. شوف معايا احكي عادي لي يجي فبالك قولو اما ننصحك مع غيري لا.. مش لي تعرفو تقوم تحكيلو لي عندك "
انا :" انا مانحكيش للي يجي... "
قص علياا يحكي
عيسى :" لا تحكي.. انت تمشي ولسانك يبدا يمشي معاك.. اقرب مثال خالد عرفتو من اول نهار حكيتلو على نور وجابر وتاريخكم لكل.. وهذا غالط "
عديت بعينيا عليه نحكي
انا :" انا حكيتلو خاطرها ظهرتلي حكاية عادية..انا فاهمة كلامك مليح ونعرف انو فما كلام مايتقالش ومش كل شي يتحكى.. خاطر كيما قلت انت مواضيع وتسكرت "
ضيق عينيه فيا وغزرلي درا كيفاه.. رجعت شعري لتالي وتكيت براسي على كتفو نحكي
انا :" ياخي منين جبتو الكاب هذا ؟"
عيسى :" لقيتو ف الكرهبة "
انا :" عيسى "
عيسى :" نعم ؟"
انا :" زعمة يتعدا الشهاب الليلة؟"
عيسى :" مانعرفش.. هانا قاعدين كان تعدا تعدا كان لا مش لازم "
ضحكت وهزيت راسي غزرتلو نحكي
انا :" انا نحبو يتعدا.. خاطر يقولو ك تراه وتتمنى حاجة.. تتحقق "
هز بحاجبو يحكي
عيسى :" اسمع ياسيدي "
انا :" ماكش مصدق ؟ شوف ادعي انو يتعدا وتمنى حاجة.. وتو تشوف كان ماتتحققتش انا مش لارين "
تنهد بالشوي يحكي
عيسى :" باهي "
رجعت تكيت براسي عندو وبقيت ندرجح ف ساقياا.. مانعرفش قداه تعدا علينا وقت واحنا هكا ساكتين.. هزيت روحي فيسع واشرتلو بيدي نحكي
انا :" عيسى شوووف.. اهوكاا تعدا تمنى فيييسع "
هز راسو وغزر ساكت.. ضحكت وبقيت نغزر للسماء غمضت عينيا وتمنيت لي ف خاطري..رجعت حليت عينيا وين شفتو يغزرلي ضحكت نحكي
انا :" تمنيت ؟"
عدا بعينيه عليا وغزرلي درا كيفاه يحكي
عيسى :" ماعنديش حاجة نتمناه.. لي نحب عليه نخطفو انا "
انا :"مش كل شي يتخطف..فما حاجات بعاد علينا وصعيب نخطفوهم..لازم معجزة تصير حتى ناخذوهم "
عيسى :" ممكن "
انا :" اكيد مش ممكن.. المهم انا تمنيت وكان تحققت امنيتي تو نقلك علاها "
ضحك يحكي
عيسى :" باهي انشالله تتحقق "
غزرتلو وعديت بعينيا عليه نحكي
انا :" انشالله "
رجعت تكيت براسي عندو نحكي
انا :" بردت "
تبسمت ك حسيت بيديه دارت علياا.. حشيت راسي عندو وبقيت نغزر للسماء ساكتة وين تمنيت انو النهار مايطلعش بش اللحظة هاذي ماتوفاش فيسع.. اصلا احساس غريب داخلي مخليني مانحبش الليلة هاذي توفى..غزرتلو وين شفتو سارح قدامو وساكت.. تنهدت بالشوي ورجعت غزرت قدامي وانا نحاول نخلي عينيا محلولة من النعاس لي بدأ يغلبني...
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
