#لارين_تحكي
مانعرفش قداه تعدا وقت وانا هكاا ف حضن جابر نسمع فيه يحكيلي على جو الحومة ف رمضان وشنوة يعملو.. تبسمت ك سمعتو يحكي
جابر:" اما هذا احلى رمضان بش يتعدا عليا.. خاطر رينو بنتي معايا فيه وبش نبقى بجنبي فرد طاولة "
انا :" رمضان السنة بش تدلل يا جابر.. ناوية انا نطيبلك "
باسني من راسي وبعد عليا شوي يحكي
جابر :" والله مانقولش لا.. هذا احلى دلال "
ضحكت وتلفتت على صوت عمتي تحكي
غالية:" احنا غاطسين وللا رينو تضحك هناا "
دور بيديه علياا وجبدني عندو مرة أخرى يحكي
جابر :" سيبولي بنتي.. اقضيو وحدكم هي بش تبقى حذا بوها "
عدات بعيناها علينا وهزت بحاجبها تحكي
غالية:" امان رينو فيسع مابعتني "
عضيت على شفايفي نحكي
انا:" والله لا عمتي.. اماجابر ماريتوش صباح كامل حبيت نبقى حذاه شوي.. انت تو نسهر معاك ف الليل غاليتي "
جابر :" بنتي تعرف ترضينا الزوز.. وين بش نلقاو الدلال هذا "
ضحكت تحكي
غالية :" ربي يخليكم لبعضكم ونراكم ديما ملمومين هكاا ف الخير "
جابر :" امين "
غالية :" هياا قومو.. الطاولة حضرت ماياا مسكينة غطست معايا "
بعدت على جابر وغزرتلو نحكي
انا :" انا نمشي نشوف ماياا خليتها وحدها "
هزلي براسو باهي يحكي
جابر :" اي برا رينو "
قمت فيسع وجريت لداخل وين شفت تحط ف الكاسات.. قربتلها نحكي
انا :" مايا ياروحي سامحني خاطر خليتك وحدك "
تبسمت تحكي
مايا :" مانيش وحدي معايا عمتي.. وزيد عادي رينو ياخي مش انا معادش غريبة "
انا :" اي انت عمرك لا كنت غريبة "
طبست راسها وباستني من خدي تحكي
ماايا:" مالا كهو خلينا نتصرفو على راحتنا.. ماتبقاش تخمم فياا ياسر..عمتي معايا وزيد انا فرحانة بالقضية والجو هذاا هاني نوسع ف بالي "
انا :" باهي انا حبيت نطمن برك.. اما انا نفرح ك نلقاك تتصرف على راحتك "
تبسمت تحكي
مايا :" ايا برا اغسل يدك وايجا افطر.. انا لي كلمت قليت الفلفل والفريت "
ضحكت نحكي
انا :" جرية ونجي "
هزتلي براسها باهي ورجعت تحضر ف الطاولة.. مشيت فيسع غسلت يدي وريقلت أموري ورجعت حذاهم وين شفتهم قعدو عالطاولة بخلاف جابر مازال..جبدت الكرسي وقعدت نحكي
انا :" وينو جابر ؟"
غالية :" دخل يبدل ف حوايجو وبش يغسل حالتو ويجي "
هزيتلها براسي باهي وغزرت لمايا ك غرفتلي تحكي
مايا :" اياا افطر "
انا :" عيش أختي "
هزيت راسي على صوتها كيف تبسمت تحكي
سميحة :" والله مايا طلعت حرة عليك.. هاي تعرف كل شي مش كيفك "
هزيت بحاجبي نحكي
انا :" اي صحيح مايا خير مني فبرشة حاجات.. وانا نفرح ك نسمع هكاا "
مايا :" رينو كانت دلولة نوري ماتعمل شي.. وهي تو دلولتي انا "
تبسمت نحكي
انا :" ربي يخليك ليا "
غزرت لجابر كيف خلط عليناا وقعد معانا يحكي
جابر :" سميحة ويني رانية ؟ شبيها لتو لا روحت ؟"
سميحة :" قالت بش تتعدا للمكتبة مع صحبتها يراجعو للامتحان غدوة "
ريتو ك قحرلهاا وعلا ف صوتو شوي يحكي
جابر :" انااا شنوة نبهت عليهاا ؟ مش قتلها المشي للمكتبة مع لبنات لااا..تحب تراجع تراجع وحدها هناا.. المكتبة ف اخر الدنياا شمهزهااا غادي"
سميحة :" ياخي شنوة بش يصيرلهاا ؟ ساعة وتروح وزيد رانية يعرفوها لكل ف الحومة حد مايقربلهاا "
حل عينيه فيها يحكي
جابر :" تكمل تفطر وتطلبهااا تروح.. بااااهي "
سميحة:" باهي باهي "
قحرلهاا وطبس راسو ياكل.. سمعتها ك رجعت تحكي
سميحة:" توفيق خوياا يسلم عليك وقلك... "
قص علاهاا يحكي
جابر :" مانحبش نعرف شنوة قلي.. خووك لبراا هنااا اسمو مايتجبدش..مانبقاااش نعاااود ف كلامي ياسر"
كبست عالمغرفة متاعي وقت سمعت اسمو لي خلاني نتفكر كلام نور وين حسيت بقهرة فقلبي منهم لكل.. خذيت نفس طويل وغزرت لجابر نحكي
انا :" جابر ميسالش نطلب منك حاجة؟"
هزلي براسو اي يحكي
جابر :" اي بالطبيعة رينو "
تبسمت نحكي
انا:" انا ومايا نحبو نخرجو.. شاورت عمتي قتلي ميسالش اما شاور بوك قبل..واناهاني نشاور فيك تو"
حط لمغرفة وضحك يحكي
جابر :" وين بش تمشيو ؟"
انا :" مايا تحب تشوف لكنيسة لي هناا..."
تلفتت على صوتها ك قصت نحكي
سميحة :" رانا فرمضان شهر لعباده كنيسة شنوة؟ "
قحرتلها نحكي
انا :" ياخي فاش تحكي انت ؟؟ ريتناا بش نكفرو؟ "
جابر :" سميحة تلهى ف روحك "
غالية :" سميحة مايا من حقها تمشي للكنيسة فكل وقت..ماقتلكش هياا معايا هي "
تبسمت وغزرت لجابر يحكي
جابر:" باهي تو نوصلك انا "
انا :" لا جابر امان خلينا نمشيو وحدنا.. خاطر قلنا بش نعملو دورة فوسط لبلاد وزيد ممكن Joseph يمشي معانا "
تنهد بالشوي يحكي
جابر:" باهي ميسالش.. المهم ردو بالكم على رواحكم.. وماتبطاوش ومن حذا يوسف ماتتحركوش "
تبسمت نحكي
انا :" عيشك جابر وتهنى "
ماايا :" عيشك عم جابر "
جابر :" من غير مزية بنتي.. والمرة جاي ك تحب تمشي لبلاصة قلي انت.. انت هنااا كيفك كيف رينو بنتي.. ماتبعث حد احسبني كيما بوك "
عدات بعيناها عليه تحكي
مايا :" ربي يخليك لينا عم جابر "
تبسمت وتلفتت بش نهز طرف خبز.. على تلفيتي ريت سميحة ك قحرتلنا كلناا وطبست راسهاا.. ماركزتش معاها ياسر وطبست راسي بش نكمل فطوري فيسع بش نخرج.. بقيت نسمع ف ماياا وعمتي كيفاه يفدلكو ويضحكو مع بعضهم..حسيت روحي عملت جو علاهم ماتوقعتش مايا بش تتأقلم هكاا مع عمتي وتلقى راحتهاا ف الجو هذا الجديد علاهاا..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
