#رانية_تحكي
خرجت من لكلاس بعد ماودعت صحاباتي.. كبست عالساكادو متاعي وخرجت طول بش نروح.. نفخت بالقوي ك ريتو عرضني ووقف ف ثنيتي يحكي
يوسف :" وينك اا سمراء.. هكاا تتعدا من غير ماتسلم على djo "
قحرتلو نحكي
انا :" يوسف شتحب ؟ ابعد من قدامي معادش وقت عليااا "
طبس راسو شوي وعدا بعينيه عليا يحكي
يوسف :" نموت عليك وانت متغشش هكاكا يا لاسمر.. هياا شرايك نوصلك انا ونطفي ساعتين المات على خاطرك "
وخرت لتالي شوي نحكي
انا :" ماعندك علاش توصل فيااا نعرف الثنية وحدي.. مانيش بش نضيع من غيرك "
يوسف :" هذا كفوياا نخاف عليك.. ساعة وقتاه ناوية تحني عليناا وتفردي وجهك وانت نهار وطولو تتشوحري وتقحريلنا على جنب "
انا :" ماعندك علاش تخاف عليااا.. وزيد شيهمك انت ف وجهي كان عينك دور وجهك ماتغزرليش ياسيدي "
تبسم على جنب وحط يديه على قلبو يحكي
يوسف :" مانجمش مانغزرش لزين هذاا لكل.. انتوما بنات عم جابر ناوين تموتوني بزينكم.. ارحمووني "
انا :" ارحمني انت وابعدني.. برا للارين هي تحبك وتتفاهمو مع بعضكم "
قربلي شوي يحكي
يوسف :" شامم ريحة شياط.. تطلعش غايرة علياا "
قحرتلو نحكي
انا :" فاش قام حتى نغير عليك.. اشبعو ببعضكم كان علياا انا "
يوسف :" يجيك وقت وتطيب ياسفرجلة "
هزيتو وحطيتو بعينيا نحكي
انا :" ابقى استنى هكاكا"
ضحك يحكي
يوسف :" نستنى شنوة وراياا انا... "
عديت بعينيا عليه وقحرتلو.. عطيتو بظهري ومشيت.. دوب تبسمت ك سمعتو يغني ورايا بالقوي
يوسف :" حليييلي عشڤت البايع.. ملالي ڤلبي وجايع.. خلاني دمع فايع وجروحي مابرات.. يا متبع لبناااات "
تنهدت بالشوي وبقيت نمشي بش نبعد عليه مش فاهمة علاش نهار وطولو وهو شاد ثنيتي هكا قد مانبعد عليه نلقاه ف جرتي يتبولد.. حليت عينيا على وسعهم ك لمحتو جاي قدامي.. سرعت فخطواتي حتى وصلتلو.. نحكي
انا :" حمزة ؟ شتعمل هناا "
عدا بعينيه عليا وتبسم يحكي
حمزة :" توحشت مرتي وجيت بش نروح بيهاا.. ميسالش ؟"
ضحكت نحكي
انا :" حتى انا توحشتك.. اما نخاف كان يرانا شكون "
شهقت بالقوي ك ريتو شدني من يدي نحكي
انا :" ياحمزة سيب.. رانا ف الشارع "
حمزة :" ايجاا خلينا نقصو من الزنقة هاذي.. تو مايرانا حد "
عضيت على شفايفي وهزيتلو براسي باهي.. كبس على يدي وجبدني للزنقة.. بقيت نمشي بجنبو ساكتة.. قلبي ضرب ك حسيت بيديه دارت عليا.. جبدني عندو شوي يحكي
حمزة :" شبي رنوشتي ساكتة؟ قلقك حد من الليسي؟"
هزيتلو براسي لا نحكي
انا :" لاا ماقلقني حد "
حمزة :" مالا شبيك قالبة وجهك هكا ؟"
نفخت بالشوي نحكي
انا :" شي ياحمزة شي "
شدني من مرفقي ووقفني قدامو.. عدا بعينيه علياا يحكي
حمزة :" شنوة شي شي.. مسيب خدمتي على خاطرك بش نجي نشوفك نلقاك قالبة وجهك علياا هكاا "
قعدت على عتبة الباب لي كان ورايا نحكي
انا :" ياريت كان تعمل حاجات اخرى على خاطري زادة "
قعد بجنبي يحكي
حمزة :" حاجات كيما شنوة؟ شنوة ف يدي انا ماعملتوش "
غزرتلو نحكي
انا:" حمزة لوقتاه بش نبقاو هكا من زنقة لزنقة..لوقتاه بش نبقى ماشية بجنبك وانا يدي على قلبي "
نفخ بالقوي يحكي
حمزة :" رجعنا لنفس الموااال.. ياخي انا ف يدي حاجة وماعملتهاش.. هاك ترا ف حالتي نخدم ليل ونهار ومالحقتش "
انا :" ياخي مش قتلي قاعد تلم بش تحل ورشتك.. ويني "
حل عينيه فيا يحكي
حمزة :" شنوة ويني ؟؟ ياخي ف بالك فلوس بابا مكدسة عليااا.. هاني قاعد نلم بالشوي بالشوي وتو نحلهاا "
عديت بيديا الزوز على وجهي نحكي
انا :" تو انت عارف روحك ظروفك خايبة وشوف تنجم تحل ورشة شوف لاا.. تقوم تعمل مشاكل مع جبران وادم.. ف عوض ماتكسبهم ف صفك بش يعاونوك ويحكيو مع بابا وعيسى... "
قص علياا ك علا ف صوتو شوي يحكي
حمزة:" بلاهي فكني من *** لكل.. كلهم طحانة ك جبران ك ادم.. حاسبين رواحهم **** وهوما قوادين لبوك ولسي عيسى "
قحرتلو نحكي
انا :" حمزة اعرف شتخرج من فمك.. ماكش قاعد مع صاحبك "
دور بيديه علياا يحكي
حمزة :" باهي رنوش سامحني.. هياا اضحك عاد ويزي من التكشبير.. يا للا تو نلقى حل فيسع ونجي نخطب حبي "
عوجت شفايفي نحكي
انا :" حمزة بش يكون فعلمك راني تو معادش أنجم حتى نطلبك.. لارين رجعت وعارفتها بش تشد علياا العسة.. حتى وقت ليتود معادش أنجم نراك.. وانت لازمك تخفف مشي وجي علياا نخاف لا هي تعرضني "
عدا بعينيه عليا وغزرلي درا كيفاه يحكي
حمزة :" فكرتني.. توو وانا جايك ريت اختك تعارك ف رقية ام صابر والحومة تتفرج.. يطلع منها اللفعة.. صوتها جايب للاخر الشارع "
عقدت بحواجبي نحكي
انا :" علاش يتعاركو ؟"
حمزة :" مانعرفش.. اما ظاهر اختك مش متربية واقفة ف نص الكياس وتعيط.. لا وسي عيسى مشى يدافع علاهاا ف عوض مايلفهاا بكف يقلبلها خليقتها "
انا :" شيهمني فيهاا انا وف عيسى.. انا نحكي معاك على روحي.. رجوع لارين بش يخنقني تو لوقتاه بش نبقى نساير فيهاانا والمرة هاذي ماهيش وحدها معاها صحبتها "
عقد بحواجبو يحكي
حمزة :" صحبتها شكون؟"
انا :" قوم حمزة قوم معادش بكري علياا "
وقف وشدني من يدي قربني ليه يحكي
حمزة:" باهي باهي ماتتغشش انا سالت كهو.. شوف رنوش انت تو سايرها على خاطري انا وانا نوعد حبي بش نلقى حل وعلى قريب زادة "
عديت بعينيا عليه وهزيتلو براسي باهي.. طبس باسني من خدي يحكي
حمزة :" هياا خلينا نمشيو "
هزيتلو براسي باهي من غير حتى كلمة وبقيت نمشي معاه ونسمع فيه كيفاه يحكي عالخدمة وتفكيري لكل شنوة بش نعمل انا تو كيفاه بش انجم نتحمل وجود لارين عيناها لي تبع فياا..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
