#لارين_تحكي
طبست راسي ناكل وفرد وقت نغزرلو كيفاه كل مرة يخطف غزرة مني وين حسيت روحي حشمت وتربثت قدامو..خذيت نفس طويل حاولت أنظم دقات قلبي لي عمال تقوا وين حسيت روحي خفت من الفرحة لي انا حاستها خاطر عمري ماحسيت هكاا..للحظة حسيت كانو الدنيا لكل بين يديا ف البلاصة هاذي.. غزرت لصحنو نحكي
انا :" تحب نزيدك ؟"
هزلي براسو لا ومسح يديه يحكي
عيسى :" لا صحة "
انا :" صحة شنوة ؟ وهذا شكون بش يكملو؟ تو يتلوح"
عض على شفايفو وقحرلي يحكي
عيسى :" يعني نغصب على روحي بش مايتلوحش ؟ وخليه لغدوة علاش تلوح فيه ؟"
انا :" باهي تو نخليه لغدوة تفطرو وتتعشاه زادة "
تنهد بالشوي يحكي
عيسى :" باهي "
مسحت يدي انا زادة وتبسمت نحكي
انا :" مالا كلمت عشا؟"
هزلي براسو اي وعدا بعينيه عليا يحكي
عيسى :" اي علاش زادة؟"
قمت من بلاصتي وقربت وين الملحفة هزيت تاليفوني لي خليتو فوق لمخادد.. حليت لغناية لي حضرتها ورجعتلو نحكي
انا :" بش نشطحو "
عدا بعينيه عليا وغزرلي مستغرب يحكي
عيسى :" شنوة ؟"
مديت يدي ناحيتو نحكي
انا :" شوف المفروض انت لي تاقف هكا وتمد يدك وانا لي نبقى نخمم مش انت اصلا.. مالا قوم خاطر شكلي صار خايب... "
قص علياا يحكي
عيسى :" اسكت شوي.. لارين انا مانعرفش نشطح ومانحبش نشطح "
ذبلت عينيا فيه نحكي
انا :" امان عيسى.. نوعدك انو هاذي بش تكون اول وأخر رقصة ليناا "
غزر ليدي ورجع غزرلي يحكي
عيسى :" لارين.... "
قصيت عليه نحكي
انا :" علاش ماتاخذش بخاطري فيسع.. شوف انا شنوة حضرت.. هذا أقل شي لياا.. وقتلك هاذي اول واخر رقصة "
تنهد بالشوي وحط يديه ف يدي ووقف.. عدا بعينيه علياا يحكي
عيسى :" شوي كهو "
تبسمت نحكي
انا :" باهي شوي كهو "
هزلي براسو باهي وتبسم.. قربنا شوي وين الشط مقابلين قناديل الشمع.. وقفت قدامو وين غزرت لعينيه بالوقت لي كانت كاني تلمع مع ضو القمرة والشمع.. تبسمت اول هز يديه قدامي وين شديتو بالوقت.. بدني رعش على يديه لخرى لي دارت على جنب وجبدني عندو..للحظة حسيت قلبي بش ياقف من الاحساس لي تملكني.. هزيت راسي وغزرتلو كيفاه كان قريب مني ومفماش حتى مسافة بيناتناا وين حسيت بحرارة بدنو غير انفاسو لي تخلطت مع انفاسي.. كرشي دغدتني اول مادورت يدي انا زادة وجبدتو عندي شوي وين ريحتو تغلغلت فياا اكثر.. للحظة حسيت كاني اول مرة نقربلو..كل شي حسيتو ف اللحظة هاذي كان جديد علياا..قلبي دق بقوة مع لغناية لي بدأت وين بديت نتمايل معاه كاني ريشة طايرة ف الهواء.. عدا بعينيه علياا وغزرلي درا كيفاه من غير حتى كلمة.. لحظتهاا غزرت لعينيه كاني حبيت نشوف هو ف شنوة يخمم تو اما ماعرفتش.. غزرتو كانت جديده هي زادة اول مرة يغزرلي هكاا كانو اول مرة يراني وين قاعد يثبت ف كل ملامح وجهي كانو يحفظ فيهم.. عضيت على شفايفي نحكي
انا :" رقصك مش خايب مسيو عيسى..توقعت انك ماتعرفش "
تبسم يحكي
عيسى:" بلحق مانعرفش.. هاذي اول مرة نشطح هكاا وانشالله تكون آخر مرة "
ضحكت نحكي
انا :" احساسي يقلي انها اخر مرة..مالا خلينا نشطحو كيما جاء.. خاطر حتى انا هاذي اول مرة لياا "
تبسم وهزلي براسو باهي من غير حتى كلمة.. عديت بعينيا عليه نحكي
انا :" عجبتك لغناية ؟"
عيسى :" حلوة "
انا :" انت قاعد تفهم ف كلماتهاا ؟"
هزلي براسو لا يحكي
عيسى:"مش برشة..نفهم كلمات وكلمات لا بالفرنسي "
انا :" خسارة.. خاطر حبيتك تفهم المقطع الجاي "
ضيق عينيه فيا يحكي
عيسى :" علاش؟ شنوة يقول المقطع الجاي "
عديت بعينيا عليه وركزتهم مع عينيه.. كبست على يديه وبقيت نتمايل ونغني
انا :" prends ma main.. promets moi que tout ira bien.. serre-moi fort.. près de toi je rêve encore.. oui je veux rester..mais je n'sais plus aime... "
سكتت وقت شفتو دوب تبسم وغزرلي درا كيفاه.. بلعت ريقي نحكي
انا :" غناية عاديه اما كلامها محلاه "
عيسى :" تو بعد نقرأ ترجمتها... "
قصيت عليه نحكي
انا :"لا لا مش لازم..اصلا هي مش جوك اسمعها كهو "
هز بحاجبو يحكي
عيسى :" باهي "
تكيت براسي على صدرو وبقيت نتمايل معاه.. تبسمت نحكي
انا :" زعمة قداه مازالت من ليلة لينا هنا ؟"
عيسى :" مانعرفش "
انا :" نقلك حاجة؟ "
بعدت عليه شوي ورجعت نحكي
انا :" حاسة انو الليلة هاذي غير كل ليلة.. حتى من الطقس محلاه على غير العادة..النجوم ظاهرة اكثر والنسمة خفيفة..موج لبحر راكح والقمرة ضاويةاكثر"
تبسم يحكي
عيسى :" هذا لكل صاير الليلة هاذي ؟"
هزيتلو براسي اي نحكي
انا :" اي علاش مالاحظتش هذا انت زادة؟"
عدا بعينيه عليا وغزرلي درا كيفاه يحكي
عيسى :" مالاحظتش خاطر ماغزرتلهمش "
عضيت على شفايفي وضحكت نحكي
انا :" مالا لشنوة قاعد تغزر من بكري ؟"
ضحكت بالقوي على يديه لي دورتني وين حسيت بالنسمة تحركت معايا.. اول مادورني ليه حط يديه وراء ظهري وتكاني لتالي شوي وين هو طبس عليا.. عديت بعينيا عليه وسرحت معاه مش مصدقة انو هذا عيسى لي عرفتو اول مرة.. كاني قدام عيسى اخر جملا.. رغم اني نحب النسختين منو اما النسخة هاذي اكثر وحدة خاطرني متأكدة اني شفتها كان اناا وانهاا ظهرت كان قدامي انا كيما متأكدة انو الفرحة لي حاستها انا تو هو زادة حاسس بيها رغم انو ماقالهاش اما انا قريتها من عينيه...
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
