#لارين_تحكي
دخلت للبيت وسكرت الباب ورايا.. تكيت بظهري عليه وبقيت ننهج من لعصب لي حسيتو منو..ضميت على شفايفي شديت دمعتي وقت حسيت بمرفقي وجعني من كبسة يديه..عديت بيديا عليهاا وين شفتها كيفاه حمارت فيسع.. خذيت نفس طويل وقربت للفرش تسطحت بحوايجي بكلي.. غزرت للسقف وبقيت نخمم ف تصرفات عيسى معايا.. مش عارفة علاش يعمل هكاا وقتلي انا ماعلمت شي.. ساعات نحسو يخليني اكثر وحدة فرحانة ومرتاحة وساعات نحسو كانو يستحلى لغشي بكلامو الخايب وتصرفاتو لي توجع.. كل مرة تحطلو عذر كيما آخر مرة على لبستي اما الليلة مش عارفة شنوة العذر.. اصلا مش عارفة انا علاش قاعده نلوجلو على عذر كاني نكره غشي منو.. نفخت بالشوي وقمت من بلاصتي دخلت لسالدوبان وقربت لسبالة حليتها وبقيت نغسل ف حالتي ونريقل ف اموري.. رجعت للبيت وهزيت تاليفوني والكيت وخرجت للبلكونة.. رسيت على سنيا بالقوي ك ريتو ساهر مع الجماعة ويضحك ومخليني انا مغزلة هكاا.. رجعت دخلت للبيت وترميت عالفوتاي نخمم شنوة بش نعمل غدوة.. مستحيل نخليه يتمادى معاياا هكاا.. كل مرة وانا معديتلو كيفاه يكركر فياا وراه ويصيح.. ف بالو بيا بش نخاف منو.. حطيت لكيت ف وذنياا وتكيت براسي لتالي.. غمضت عينيا وسرحت مع صوت ام كلثوم
"انا وانت ظلمنا الحب بالغيره وجبنا للظنون سيره.. وقطعنا الامل مرات ما بين الشك والحيره..وكان الحب بينا كبير صغر لما ابتدينا نغير..انا وانت نسينا نتعاتب ونتصارح..وعز عليك تسيب العند وتسامح.. وعز علي اكون البادي واتصالح "
حطيت يدي على مرفقي لي بقى يوجع وين رجعت تفكرت كل شي صار مع عيسى من اول ماقابلتو.. بين الباهي والخايب متاعو حسيت روحي بقيت عالقة.. لقيت روحي كاني مجبورة إذا بش نتقبل الباهي لازمني نتقبل الخايب متاعو خاطر هو هكاا.. اما انا عمري لا كنت هكاا مانحبش لي يتصرف معايا هكاا وهو ماحبش يفهم.. مانعرفش قداه بقيت قاعدة هكاا.. نحيت الكيت حطيتو على جبت وقمت.. حسيت النوم طار علياا.. لميت شعري لفوق وقربت وين الشباك طليت وين شفتهم مفماش.. لحظتهاا حبيت نهبط شوي ناخذ نفس مدامهم مشاو يرقدو.. هزيت تاليفوني وخرجت.. اول مانزلت عديت بعينيا عالفيلا لي كانت ظلمة.. قربت وين الشباك لكبير حليتو وخرجت تبسمت من غير مانشعر ك حسيت بنسمة دغدغتني..بقيت ندور حتى وصلت قدام البيسين.. ضيقت عينياا وانا نشوف ف شكون قاعد..قربت شوي وين شفت خالد متكي عالشازلونج.. رجعت خصلة شعري لتالي وقدمت بخطواتي ناحيتو نحكي
انا:" bonsoir "
هز راسو غزرلي وتبسم يحكي
خالد :" احكي عربي يرحم بوك "
ضحكت نحكي
انا :" سلام وعليكم.. هكا باهي ؟"
ضحك يحكي
خالد :" هههه هكاا عسل.. اقعد شبيك واقفة "
قعدت مقابلتو وغزرت للبيسين.. رجعت غزرتلو نحكي
انا :" انشالله مايكونش قلقتك ؟"
هزلي براسو لا يحكي
خالد:" مفما حتى قلق.. ساعة بكري سألت عليك.. عيسى قلي تاعبة بش ترقد "
عديت بعينيا عليه وين حسيت روحي غزلت من عيسى اكثر.. تبسمت نحكي
انا :" اي ف بالي بش نرقد ياخي طار النوم "
رجع تكا بظهرو لتالي يحكي
خالد:" حتى انا طار علياا النوم "
انا :" محلاها لبلاصة.. لهواء يرد الروح خاصة مع صوت خوليو لي يغني بجبنك "
حل عينيه فيا يحكي
خالد:" تسمعوا انت زادة؟"
هزيتلو براسي اي نحكي
انا :" اي نسمعو ساعات.. نحب غناه لقديم "
خالد :" حتى انا نحبو.. نسمع كان هو "
ضحكت نحكي
انا :" عجبني ذوقك "
رجع استواء ف قعدتو يحكي
خالد :" ماحكيتليش شتعمل ف حياتك ؟"
انا :" انا رسامة.. مازالت ك فتحت المعرض متاعي ومتاع نور ف باريس "
ضحك يحكي
خالد :" اسمع ياسيدي.. معرض ضربة وحدة ؟ رغم انك تظهر صغيرة "
فركت يديا ف بعضهم وتبسمت نحكي
انا :" اي صغيرة اما مغرومة بالرسم من لي انا صغيرة.. عندي برشة لوحات ونور زادة كيفي رسامة "
خالد :" مالا لازمني نمشي نشوف المعرض متاعك.. متأكد رسمك بش يعجبني "
تبسمت نحكي
انا :" انشالله "
عدا بعينيه عليا يحكي
خالد :" وغير الرسم شتعمل ؟"
انا :" شي "
خالد :" شبيك ماكش تقرأ؟"
عضيت على شفايفي من سؤالو لي دخلني بعضي نحكي
انا :" وقفت لقرايا الفترة هاذي.. بعد موت نور حبيت نركز ف المعرض اما ممكن نرجع نقرأ ف تونس "
خالد :" قررت تستقر ف تونس ؟"
هزيتلو براسي اي نحكي
انا :" اي.. قلي وانت شتعمل ف حياتك "
ضحك وتكا بظهرو لتالي.. حط يديه وراء رقبتو يحكي
خالد :" انا نعمل برشة حاجات.. نخدم مع جمال ف الكراهب وعندي مشروع جديد بديت فيه "
انا :" مشروع شنوة ؟"
خالد :" هذا هو المفاجأة لي محضرها للحوت.. تو تعرفوها ف وقتها "
ضحكت نحكي
انا :" تحمست نعرف.. ساعة قلي عيسى وافق نبقاو ؟"
خالد :" ماعندوش حل آخر معايا "
ضحكت نحكي
انا :" هههه باهي "
اشرلي بصبعي يحكي
خالد :" وانت حضر روحك غدوة ماشين للمعرض وبعد نمشيو نفطرو.. فما ريستو هناا ماكلتو بنينة "
عضيت على شفايفي نحكي
انا :" مانعرفش.. خلي نهار آخر مانحبش نعطلكم على خدمتكم "
خالد:" خدمة شنوة ؟.. كان تعطلو تو نخليو عيسى وجمال ونفصع انا وانت "
بلعت ريقي بالسيف نحكي
انا :" اما... "
قص علياا يحكي
خالد:" مانحبش اما.. انتوما هناا حذايا مالا سيبولي رواحكم "
ضحكت وهزيتلو براسي باهي.. غزرلي يحكي
خالد :" تحب نجيبلك تيراميسو معايا؟ حضرتو آنجيلا بكري خلينا نسهرو بيه "
انا :" باهي ميسالش "
هزلي براسو باهي ووقف.. تكيت بظهري لتالي اول ماريتو دخل..لحظتهاا رجعت سرحت فعيسى مانعرفش علاش بقى فمخي..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
