#لارين_تحكي
سكرت السبالة بعد ماكملت غسلت ماعون لفطور.. قربت وين الغاز وبقيت واقفة نستنى ف التاي يطيب.. تلفتت على صوت ماياا ورايا تحكي
مايا :" رينو لتو ماكملت ؟"
عديت بيديا على وجهي وغزرتلها نحكي
انا :" نستنى ف التاي يغلي "
قربتلي شوي ووقفت قدامي.. تكات بظهرها عالرخامة وعدات بعيناها علياا تحكي
مايا :" شبيك رينو ؟"
انا :" شي "
ماايا :" ماتقليش شي.. من لي رجعت وانت ساكتة.. حتى وقت لفطور كلنا نحكيو وانت سارحة وتو هربت للكوجينة بحجة الماعون والتاي.. شصار ؟"
ضميت على شفايفي من غير حتى كلمة.. حطت يداها على زندي وقربتلي تحكي
مايا :" عيسى عرضك بكري ؟ كلمك ؟"
عديت بعينيا عليها نحكي
انا :" تتفكرو البهلول لي حكيتلك عليه لي حب يخطبني ؟"
مايا :" اي شبيه.. ماتقليش هو قلقك ؟"
انا :" لا.. امو وقفتني وغزلتني بكلامها.. عاد انا ماسكتلهاش "
ماايا :" اي احسن ماعملت.. ماتخليهاش تقلقك "
انا :" هي ماقلقتنيش قد ماقلقني لآخر.. نلقاه قدامي جا يدخل ف روحو.. يسأل شفما على اساس بش يدافع علياا قدامهاا.. مانعرفش شمازال يحب مني.. ظاهرلي ف بالو اني مازلت بحاجتو ولا نحبو هو يحكي ف بلاصتي.. ومش هذا كهو.. مازال عاطي لروحو الحق بش يقلي شنعمل ومانعملش "
عدات بعيناها علياا وغزرتلي درا كيفاه تحكي
ماياا :" شيهمك فيه.. خليه يعمل لي يحب.. وانت اعمل لي تحب.. رد بالك ترخ قدامو لارين "
انا :" مستحيل نرخ.. اما انا معادش متحملة شوفتو ماياا.. ف الدار والحومة برشة علياا.. قلبي يوجعني كل مانراه "
حطت يداها على خدي تحكي
ماايا :" وراس اختي فترة وتتعدا.. خاطرك مازلت موجوعة منو تقول هكا..اما بعد بش تلقى روحك عادي.. شوفتو معادش بش تأثر فيك.. تحمل رينو وبش ماتبقاش تخمم فيه ميسالش ابقى لهي روحك هكاا.. وهاني انا معاك "
هزيتلها براسي باهي وتلفتت طفيت عالتاي نحكي
انا :" ماياا هات الطبق عيش اختي "
هزتلي براسها باهي ومشات جابت الطبق لي فيه الكاسات..سكبت التاي وحطيت صحن البندق والنعناع بجنبهم وهزيتو وخرجت مع ماياا للصالة وين شفت عمتي تغلف ف المخادد وسميحة كالعادة متكية.. تنهدت بالشوي وقريت حذاهم.. حطيت الطبق قدام عمتي نحكي
انا :"عمتي نحي لي فيدك واشرب التاي قبل مايبرد "
تبسمت تحكي
غالية :" راك تعبت رينو.. ياريت خليتنا نعاونوك "
عطيتها كاسها نحكي
انا :" ماتعبتش عمتي بالعكس.. هاني نبدل ف الجو ماعندي مانعمل "
غزرتلها ك استوات ف قعدتها وهزت كاسها تحكي
سميحة :" مدام ماعندك ماتعملي اول مانخرج الصابون من الماكينة اطلعلي انت للسطح انشريه "
قحرتلهاا بش نجاوبها اما وقفت على صوت مايا تحكي
مايا :" اي رينو تو نطلعو.. نحب نشوف السطح "
هزيتلها براسي باهي نحكي
انا :" باهي ياروحي.. شوي ونطلعو "
هزيت راسي على صوت رانية لي دخلت.. ريتها ك رمات سكادو متاعهاا ودخلت حذانا تحكي
رانية :" سلام "
كلنا :" وعليكم السلام "
دخلت قعدت بجنب امهاا باستها تحكي
رانية :" سموحتي جيعانة.. شنوة لفطور ؟"
مسحت على شعرها تحكي
سميحة :" مقرونة وكفتة..تو نقوم نسخن لبنتي "
عديت بعينيا علاهم الزوز وين حسيت ك الغصة شدتني.. تبسمت ك حسيت بيد ماياا تحطت فوق يدي تحكي
مايا :" رينو اشرب كاسك "
هزيتلها براسي باهي وغزرت لسميحة ك وقفت هي وبنتهاا.. تكيت بظهري لتالي وبقيت نتفرج ف عمتي كيفاه تغلف ف المخادد نحكي
انا :" تحب نعاونك عمتي؟"
غالية :" لا عيش بنتي.. هاني كملت "
هزيتلها براسي باهي وبقيت ساكتة.. شوي وريت رانية ك رجعت وف يداها المنشفة تمسح ف يداها تحكي
رانية :" رينو بلحق عملت عركة ليوم ف الحومة "
ضغطت على يدي بالقوي نحكي
انا :" الي وصلك ماكذبش.. اي عملت عركة "
ريت عمتي ك حطت لمخدة بالوقت وغزرتلي تحكي
غالية :" ياشومي عركت شنوة زادة؟ مع شكون ؟"
انا :" عمتي مش عركة..جيست تناقشت اناواكا رقية "
حلت عيناها ودارتلي بكلهاا تحكي
غالية :" رقية ؟؟ شتحب مننك زادة؟احكيلي شصار "
خذيت نفس طويل وقحرت لرانية لي قعدت مقابلتني تغزرلي.. غزرت لعمتي وبقيت نحكيلهاا ف لي صار بالتفصيل.. حطت يداها فوق فخذي تحكي
غالية :" حسابها معاياا رقية القلقالة.. تو نوريك فيهاا بش تتعلم معادش توقفك ف الشارع "
سميحة :" علاش توري فيها هاي للا لارين قامت بالواجب.. ف عوض تسكت وتخلينا احناا تتصرفو "
حليت عينيا فيهاا نحكي
انا :" علاااش بش نسكت؟ لساني وينو انا حتى نستناك انت تتصرفي "
سميحة :" عيب عيب تعلي ف صوتك والرجال تغزر.. قدر حتى ف بووك "
نفخت بالشوي نحكي
انا :" انا لا عليت صوتي ولاتقبحت فيهاا.. قتلها ابعدني هي وحلت معاياا "
غالية :" ميسالش رينو الي صار صار.. وماتخافش تو انا انبه عليهاا.. وخير ك عيسى زادة خلط عليك بش ماتكبرش المشكلة "
عوجت شفايفي وهزيتلها براسي باهي.. تلفتت لرانية لي كانت تفطر نحكي
انا :" رانية شكون عاودلك انت لي صار؟"
هزت راسها معاياا وعدات بعيناها علينا تحكي
رانية :" صاحبتي كانت متعدية وشافتك "
ضيقت عينيا فيها نحكي
انا :" ياخي صحباتك يعرفوني ؟"
رانية :" اي.. اي شافوك وقتها معانا فحنة فيصل "
عديت بعينيا عليها وهزيتلها براسي باهي من غير حتى كلمة.. تكيت براسي على كتف مايا وبقيت نسمع فيها كيفاه تحكي مع عمتي وتفدلك.. تبسمت ك ريتها مرتاحة رغم وجود سميحة بيناتناا متأكدة انها بش تبقى كل مرة تقلق فيا وفيها.. والمرة هاذي هاي خلطت علياا بنتهاا لي متأكدة زادة انها مش مرتاحة لوجودي خاطر غزرتها لياا المرة هاذي غير اول مرة ومانيش عارفة علاش..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
