#مايا_تحكي
حطيت قلم الروج فوق الكوافوز ووخرت بخطواتي لتالي.. عديت بعينيا على شكلي فالمرايا كيفاه طلعت وانا لابسة روبة رينو لي كانت فاللون الأخضر طويلة وفيها فونت لركبة.. فردت شعري لتالي وقربت بش نحضر ساكي.. تلفتت على صوت الباب لي تحل وين شفت رينو دخلت.. غزرتلي وضحكت تحكي
لارين :" صحة ياروحي.. الروبة جاتك تهبل "
تبسمت نحكي
انا :" مرسي رينو "
عدات بعيناها علياا تحكي
لارين:" هياا حضارة نمشيو ؟"
هزيتلها براسي اي وهزيت ساكي وليناتي نحكي
انا:" اي اي هياا.. قلي قبل كلمت Joseph؟"
لارين :" اي كلمتو.. قلي تو عندو مراجعة.. بعد تو يخلط عليناا "
انا :" اوكي.. المهم نقابلوه "
قرصتني من خدي وضحكت تحكي
لارين :" حتى هو يسأل عليك وقال بش يجي على خاطرك "
تبسمت نحكي
انا :" ياخو بخاطرو.. هياا خلينا نخرجو"
هزتلي براسها باهي وهزت ساكها وخرجناا.. قدمنا للصالة وين شفنا عم جابر قاعد ومعاه عمتي.. هز راسو معانا وتبسم يحكي
جابر :" خارجين تو ؟"
لارين:" اي جابر.. وتهنى ماناش بش نطباو "
جابر :" باهي ردو بالكم على بعضكم.. عطاتكم عمتكم لفلوس؟"
هزيتلو براسي اي نحكي
انا:" اي عم جابر.. عيشك "
جابر :" من غير مزية بنتي.. ايا براو فيسع بش تروحو بكري "
غالية :" عينكم على بعضكم ماتخليونيش متحيرة "
قربنا بسناها الزوز..نحكي
انا :" تهنى علينا عمتي "
غالية :" باهي ياروحي.. ربي يحفظكم انشالله "
ريت رينو ك شدتني من يدي تحكي
لارين:" هيااا نمشيو "
هزيتلها براسي باهي وخرجنا مع بعضناا وين عرضتنا سميحة هابطة من السطح.. قحرتلنا ودخلت لدار طول..غزرت لرينو ك نفخت تحكي
لارين :" مانيش عارفة المخلوقة هاذي شتحب منا "
دورت بيديا على مرفقها نحكي
انا :" شيهمك فيهااا.. طفيهاا "
هزتلي براسها باهي ونزلنااا.. عديت بعينيا عالحومة وين لقيت روحي مستغربة الجو الجديد عليا اما فرد وقت حسيت اني مرتاحة هنااا.. اول مرة كنت خايفة وحاشمة اما وجود رينو وعمتو غالية لي حاسبتني كيما بنتهاا خلاني نرتاح وننسى الخوف.. حسيت اني لقيت روحي بيناتهم وصرت وحدة منهم حتى عمو جابر حسيت روحي ارتحتلو خاطر ولا مرة ف الايامات هاذم حسسني أني غريبة علاهم بالعكس لي يعملو مع رينو يعملو معايا انا زادة.. رغم اني كنت نتقلق من سميحة لي ساعات تحسسني اني برانية علاهم اما تو وليت نطفيهاا عالاقل على خاطر رينو مانحبهاش تتغشش من جرتي ماصدقت لربي انها ارتاحت النهارين هاذم ورجعت شفت ضحكتها..تنهدت بالشوي وغزرت لرينو نحكي
انا :" هياا خلينا نشوفو تاكسي "
هزتلي براسها باهي وقدمنا بش نقطعو الطريق.. اما وقفنا على صوت عمتي من البلكونة تحكي
غالية:" رينو ماياا استناو "
هزينا ريوسنااا وغزرنالهااا.. جاوبتها رينو تحكي
لارين :" نعم عمتي ؟"
غالية :" رينو ميسالش تطلع بش نوصيك تجيبلي معاك شوي قضيات.. تو تفكرتهم ومانحبش غدوة نخرج انا"
لارين:" باهي عمتي هاني جاية "
غزرتلها نحكي
انا :" تحب نطلع انا ف بلاصتك؟"
هزتلي براسها لا تحكي
لارين :" لا لا خليني انا نطلع.. كان ناقف هناا تو نشوف لآخر "
انا :" باهي برا "
عطاتني بظهرها وطلعت تجري..قدمت شوي وبقيت نتفرج ف الحومة والنهوجات لي فيهاا وفرد وقت نشوف ف الطريق.. نفخت بالشوي ك ريت ماتعدات حتى تاكسي من بكري..مانيش عارفة منين بش ناخذوهاا.. اول ماقدمت شوي وقفت ك شفت تاكسي واقفة على جنب وفارغة.. لحظتهاا قربت فيسع بش نطلع فيهاا ونقلو يستنى حتى رينو تهبط.. حليت الباب وطلعت بالوقت.. اول ماتلفتت ريت الراجل لي غزرلي وعدا بعينيه عليا.. عقد بحواجبو يحكي
ادم :" تفضل ؟"
تبسمت نحكي
انا :" بش توصلني لبلاصة كان تعمل مزية اما قبلهاا نستناو صاحبتي هاي جاية "
دارلي بكلو وعدا بعينيه عليا يحكي
ادم :" وين عندي نوصلك؟"
انا :" للكنيسة "
حل عينيه فيا وغزرلي مستغرب يحكي
ادم :" كنيسة؟ شمهزك للكنيسة ؟"
هزيت بحاجبي نحكي
انا :" شيهمك انت ؟ وصلني وانت ساكت؟"
وخرت بظهري لتالي ك ريتو قدملي وقحرلي يحكي
ادم :" نخدم عندك ف بالك ؟ شنوة هاذي نوصلك وانا ساكت؟"
ضربت بيدي عالكرسي لي قدامي نحكي
انا :" وخر غادي..ياخي ناوي توصلني وتحل معايا حديث.. شيهمك انت وين نمشي وعلاش ؟ ماك بش تاخذ فلوسك حاجة أخرى ماتخصكش "
رس على سنيه وقحرلي يحكي
ادم :" اهبطي.. اهبطي مانيش نخدم تو "
قحرتلو نحكي
انا :" محسوب ف بالك كان انت تاكسي.. امشي زمر انت وتاكسي متاعك "
علا ف صوتو شوي يحكي
ادم :" ياااا بنتي اهبطييي قبللل مانفش فيك غلي "
انا :" ماتعيطش عليااا.. وهاني هابطة ابقى فيهاا"
اول ماحطيت يدي عالبواني وحليت الباب شوي.. حليت عينيا على وسعهم وقت سمعتو يحكي
ادم :" هذا لي ناقصني ليوم.. وحدة مهبولة "
رجعت سكرت الباب وغزرتلو.. عليت ف صوتي شوي نحكي
انا :" على شكووون مهبووولة.. اناا مهبولة ياا متخلف انت "
تهزيت وتحطيت على يديه لي ضربت الفولون.. ريتو ك حل الباب وهبط.. قلبي ضرب بقوة ك ريتو دار ناحيتي وحل علياا الباب.. رس على سنيه وقحرلي يحكي
ادم :" اهبطي "
كبست على ساكي وهبطت.. قحرتلو نحكي
انا :" تعرف ماك عبد وتقول على روحك عبد خليك هنااا.. خليك تو نجيبلك شكون يربيك بش تعرف المرة جاي شنوة تخرج من فمك على كليوناتك "
وخرت بخطواتي لتالي وتضربت بظهري ف التاكسي اول ماقربلي.. حط يديه بجنبي وعدا بعينيه عليا.. رغم اني حسيت روحي خفت شوي منو اما ماحبيتش نظهرلو.. خاطر هو الي غلط فيااا وانا مستحيل نعديلو كلامو.. حطيت عينيا ف عينيه وبقيت نستنى فيه بش نشوف اخرتو معاياا...
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
