#لارين_تحكي
ترميت عالكرسي وبقيت نغزر قدامي.. قد ماحاولت نبكي بش نتخلص من الدموع لي خنقوني مانجمتش.. شهقت بالقوي حاولت نجبد النفس كيفكيف مانجمتش وين حسيت روحي هي لي وجعتني وبش نموت.. غمضت عينيا بالقوي على صوت خالد بجنبي يحكي
خالد:" لارين انت مليحة.. قول اي حاجة "
رجعت حليت عينيا وغزرتلو.. عديت بعينيا عليه نحكي
انا :" انت سمعتو شنوة قلي مش هكاا؟ ياخي انا شعملت ؟ ف شنوة غلطت معاه ؟"
عدا بعينيه عليا وشدني من يدي يحكي
خالد :" شيهمك فيه.. انت ماعملت شي وما غلطت ف شي "
غزرت قدامي وضميت على شفايفي نحكي
انا :" خالد انا تعبت منو.. معادش أنجم نتحملو اكثر من هكاا.. رغم كلامو متاع بكري انا سمعت منك ومشيت بش نصلح لي عملتو.. مشيت على اساس بش نقلو راني ماقصدتش وسامحني... "
رجعت غزرتلو وضحكت نحكي
انا :" ياخي ريتو شعمل مش هكاا ؟؟ سمعتو شنوة قلي.. علاش كل مرة يعمل فياا هكاا؟ علاش كل مرة يزيد يوجعني اكثر من المرة لي قبلهاا.. انا شعمتلووو.. انا فاش ضريتو... "
خالد:" لارين هو مازال متغشش... "
قصيت عليه نحكي
انا :" من غير ما تبررلو.. خاطر المرة هاذي مانيش بش نسمعك.. وعلاش متغشش هو ؟ شنوة الشي لي غششو حتى يوصل يقلي كلام هكاكا ؟ انا ؟؟ هاني مشيت تو على اساس بش نقلو ماقصدتش ؟ كلامي متاع بكري غششو ؟ هاني مشيت بش نطلب السماح رغم انو قلي ما اكثر منو بكري.. كل مرة وهو مرجعني انا سبب المشاكل ؟؟ علاش ماحطش روحو ف بلاصتي.. زعمة كان شافني انا بالمنظر هذاكا وشكون خارج من بيتي كان بش يسكت ؟ صدقني راو سمعني مانكره..خالد كلامي انا مايجي حتى شي قدام السم لي سمعتو منو قبل.. وعمري لا وصلت وجعتو هكاا.. كل مرة كان يجرحني فيها كنت نسامحو بلا مانخمم.. ريتو على عينك كيفاه صاح علياا مرتين قدام الناس وعديتهاا.. سمعني كلام عمري ف حياتي لا سمعتو.. مرة قلي انت فضيحة ومرة قلي انت مسيبة.. وعديتها وسامحتو.. لي قلتو انا بكري مايجي حتى شي والله... "
خالد:" وانت علاش قاعدة تعديلو؟ علاش تسامح فيه كل مرة ؟"
عديت بعينيا عليه من غير حتى كلمة مالقيت مانجاوبو خاطر انا بيدي مش عارفة علاش.. كبس على يدي وقربلي يحكي
خالد:" لارين بش نسألك سؤال من غير ما نبقى مانلف وندور ياسر.. انت تحب عيسى ؟"
جمدت فبلاصتي على سؤالو لي خلاني ندخل بعضي.. بقيت ثواني نغزرلو من غير مانرد حتى النفس نفكر ف إجابة السؤال هذا لي عندو نهارين يدور ف راسي..هز بحاجبو ورجع يحكي
خالد:" انت قاعدة تحس ف حاجة اتجاه عيسى مش هكا ؟"
حطيت يدي على قلبي لي وجعني وهزيتلو براسي لا.. خذيت نفس طويل نحكي
انا :" حتى كان نحس فحاجة..مهما كانت الحاجة صدقتي حسيتها ماتت الليلة..حسيتها وفات "
طبست راسي وطرشقت بالبكاء نحكي
انا :" كلامو لياا تو خلاني نندم على كل حاجة انا حسيتها وعشتها معاه.... "
هزيت راسي وغزرتلو.. مسحت دموعي نحكي
انا :" اما تعرف هاذي غلطتي..هو كلامو صحيح وعندو حق والله.. انا لي رميت روحي عليه وانا لي تلوصقت فيه.. انا لي وصلتو بش يقول هكاا انا لي خليتو يتمادى معاياا.. غلطتي انا وقتلي حسبتو حاجة كبيرة ف حياتي وتجاوزت حدودي معاه "
عديت بيديا الزوز على وجهي وغزرتلو نحكي
انا :" اما خير ك فيقني هكاا.. خير ك خلاني نفهم روحي على بكري قبل مانغرق معاه اكثر من هكا.. "
خالد :" صدقني بش يجيه وقت يندم صاحبي ونعرفو"
غزرت قدامي نحكي
انا :" معادش يهمني.. خاطر من اللحظة هاذي هو على روحو وانا على روحي.. لي عشتو معاه لكل سوى باهي ولا خايب انا بش ننساه.. بش ننسى حد اسمو عيسى.. بش نحسب روحي ماعرفتوش اصلا.. احسن حاجة انو نرجعو كيف اول مرة "
عدا بعينيه عليا وغزرلي درا كيفاه يحكي
خالد :" ممكن هذا احسن قرار.. ابعد عليه.. طفيه.. ماتخلي حد يحكم فيك هكاا ويوجعك.. هو صاحبي صحيح اما هو الغالط وهولي بش يندم مش انت..امسح دموعك ماتبكي على خاطر حد.. ماتوري لحد انك ضعيفة.. ومهما الحاجة لي تحس فيها تو اتجاهو حاول انك تتجاوزهاا..ماتحس شي كان ماتتاكد انو لي قدامك يستحق احساسك هذا "
عديت بعينيا عليه وهزيتلو براسي باهي.. بلعت ريقي نحكي
انا :" خالد انا نحب نروح.. احكي معاه نحب غدوة نسافر معادش أنجم نزيد نبقى هنا "
خالد :" باهي لي تحب عليه بش يصير.. المهم انت تكون مرتاحة "
دوب تبسمت بالسيف نحكي
انا :" عيشك خالد "
كبس على يدي وتبسم يحكي
خالد :" ماعملت شي انت كيما اختى الصغيرة واي حاجة تستحقها انا موجود "
هزيتلو براسي باهي من غير حتى كلمة.. عدا بعينيه علياا ووقف من حذايا يحكي
خالد:" خليك هناا.. نمشي نجيب حاجة ناكلوهاا انت من الصباح ماكليت شي.. وماتلقيش لا وماعينيش"
انا :" باهي "
ضحك وعدا بيديه مسحلي على شعري ومشى.. تكيت بظهري لتالي وبقيت نغزر قدامي وين تفكرت سؤال خالد.. لحظتهاا استرجعت كل شي صار مع عيسى من اول مرة للاخر لحظة متاع بكري بش نخلاهم قدامي ديما بش ننسى الفكرة هاذي خاطرني مستحيل نحب واحد كيفو ولا نحس اي حاجة ليه.. الفترة هاذي كانت غلطة مني وهاو خلاني نخلصهاا مليح اما والله مانخليه يندم على كل كلمة قالهاا.. مانخليه يشوف لارين أخرى مايعرفهاش.. وكيف ماانا دخلتو لحياتي انا هي لي بش نخرجو لدرجة انو مستحيل يخمم يرجع..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
