#لارين_تحكي
حطيت الفاليز على جنب بعد مابدلت حوايجي.. قربت حليت شباك وخرجت للبلكونة..عديت بعينيا عالبلاصة وين مالقيت شي داير بينا.. مفما لا دار ولا ريستو كيما الشاليه لآخر..ورغم انو كانت فارغة لبلاصة اما حسيت روحي مرتاحة هنا اكثر.. خذيت نفس طويل ورجعت للبيت..هزيت تاليفوني وخرجت فيسع بش نشوف عيسى..عديت بعينيا عالدار وين لقيتها فارغة لحظتهاا عرفتو ف بيتو.. دخلت طول للكوجينة وقربت للقضية بقيت أنظم فيها وفرد وقت نحضر ف الفطور.. حطيت قهوتو تطيب على جنب وخرجت للتيراس حطيت العصير والكيك ورجعت للكوجينة طفيت على قهوتو لي حضرت سبكتهاا فالفنجان وحطيتو فطبق هو وباقي لفطور ورجعت لتيراس وبقيت أنظم ف الطاولة لي كانت مقابلة لبحر.. تلفتت على صوتو ورايا يحكي
عيسى :" شتعمل ؟"
تبسمت نحكي
انا :" حضرتلك لفطور.. انت خرجت بكري بلا ماتاكل حتى شي وحتى ف الكرهبة ماحبيتش تاكل "
عدا بعينيه عليا وغزرلي درا كيفاه يحكي
عيسى :" يعطيك الصحة "
انا :" ايجا اقعد "
هزلي براسو باهي وقعد.. حطيت الفنجان قدامو وقعدت بجنبو.. غزرتلو ك عمل رشفة نحكي
انا:" طلعت بنينة من يدي ؟"
تبسم يحكي
عيسى :" اي بنينة "
انا :" صحة وبالشفاء "
خذيت كاسة العصير وغزرتلو نحكي
انا :" تعرف طليت من بلكونة بيتي مفما حتى شي حذانا..احنا وحدناا هناا "
عيسى:" اي لبلاصة هاذي فارغة "
انا :" وخالد علاش حتى ياخذ دار ف بلاصة كيما هاذي ؟"
غزرلي على جنب يحكي
عيسى:" وانت شدخلك ؟"
انا :" تي استغربت وكهو "
عيسى :" ناوي يحل ريستو هناا ويعمرها هو.. عرفتي تو بردتي "
ضحكت وهزيتلو براسي اي تنهد بالشوي ورجع يفطر.. تلفتتلو ورجعت نحكي
انا :" شنوة بش نعملو تو ؟"
عيسى :" مانعرفش.. انت شتحب تعمل ؟"
هزيت بحاجبي نحكي
انا :" يعني انت بش تعمل لي انا نحب عليه ؟"
حط الفنجان وغزرلي يحكي
عيسى:" انا جيت على خاطرك انت.. والنهارين هاذم متاعك انت اعمل لي تحب "
عديت بعينيا عليه وتبمست من غير حتى كلمة.. حسيت روحي فرحت من كلامو وماعرفتش شنوة نجاوب.. عدا بعينيه علياا يحكي
عيسى:" اي شنوة تحب تعمل ؟"
غزرت قدامي لشط ورجعت غزرتلو نحكي
انا :" شرايك نبقاو شوي عالشط ؟"
عيسى :" ناوية تعوم؟؟ "
انا :" لا لا..عوم انت كان تحب انا توتبقى نغزرلك كهو.. وبعد تو ندخل نحضر انا لعشاء ونفرشو عالرمل نتعشاو غادي ونسهرو.. شرايك؟"
عيسى:" باهي كيما تحب "
هزيتلو براسي باهي ورجعت نفطر معاه.. اول ماكملنا فطور قمت وغزرتلو نحكي
انا :" انت اسبقني كان تحب مدام اما لميت الطاولة "
وقف معايا وهز الفنجان والصحن يحكي
عيسى :" تو نلموها مع بعضناا ونخرجو "
قربتلو شوي وضيقت عينيا فيه نحكي
انا :" ماعرفتكش مسيو إيسى "
دوب تبسم يحكي
عيسى :" ابعد من قدامي "
ضحكت وبعدت بالوقت.. هزيت الاصحنة وسبقتو نحكي
انا :" بش تعاوني ف الماعون زادة "
عيسى :" ابقى استنى "
ضحكت ودخلت للكوجينة حطيت كل شي عالرخامة وغزرتلو ك حط لي ف يديه يحكي
عيسى :" نظم هذا لكل مدام انا بدلت حوايجي "
قلبت شفايفي نحكي
انا :" عاوني شوي "
قحرلي وخرج من غير مايجاوبني.. ضحكت وتلفتت للسبالة حليتها وبقيت نغسل فالماعون حتى كملت.. مسحت يدي وتلفتت بش نخرج اما وقفت عالحس لي سمعتو من بلكونة الكوجينة التلانية.. قربت فيسع وطليت من البلار بلا مانحلو.. حليت عينيا على وسعهم اول شفت درجيحة محطوطة على جنب تحرك فيها النسمة..لحظتها حليت لبلار فيسع وخرجت.. قربتلها وعديت بعينيا عليهاا نغزرلها كيفاه كانت كبيرة شوي مصنوعة من اللوح.. رجعت نجري للكوجينة هزيت مناديل وخرجت مرة اخرى.. بقيت نمسح فالغبرة والرمل لي كانو مغطينها.. ظاهر عندها برشة هناا.. اول ماكملت نفضت يدي وخرجت نجري نحكي
انا :" عيسسى.. يا عيسى وينك؟"
وقفت اول ماريتو خرج من بيتو..عديت بعينيا عليه وين شفتو كيفاه لابس شورط ف الأزرق وشوميز بيضاء.. حل عينيه فيا يحكي
عيسى:" شبيك تعيط هكاا ؟"
قربتلو فيسع وشديتو من يديه نحكي
انا :" ايجا بش نوريك حاجة "
عيسى :" شنوة بش توريني شفما ؟"
جبدتو معاياا نحكي
انا :" لا شوف بعينيك "
نفخ بالقوي وبقى يمشي بجنبي.. سيبتو اول ماوصلنا للبلكونة وقربت للدرجيحة..غزرتلو نحكي
انا :" شوف "
غزرلها ورجع غزرلي يحكي
عيسى :" شنوة هاذي ؟"
انا :" درجيحة لقيتها هناا "
عدا بيديه على وجهو ونفخ بالقوي يحكي
عيسى :" جايبتني بش نشوف درجيحة.. شنعمللها"
انا :" اكيد ماجبتكش بش تدرجح.. جبتك بش تخرجها معاياا "
وخرت بخطواتي لتالي اول ماقرب ناحيتي وقحرلي يحكي
عيسى :" تطولي لسانك مرة اخرى..مانعلقك ف الباب ونخليك تدرجحي "
عضيت على شفايفي نحكي
انا :" تي ماطولتش لساني..نفدلك معاك "
قربتلو اكثر وشديتو من يديه نحكي
انا :" امان عيسى خرجهالي للشط..مش قلت ليوم بش نعملو لي نحب عليه "
تنهد بالقوي وهزلي براسو باهي.. تبسمت وبعدت عليه نحكي
انا :" ايجا نهزوها مع بعضنا "
عيسى :" حل الشباك والباب كهو انت "
هزيتلو براسي باهي وجريت حليتهم فيسع ورجعت حذاه.. تبسمت ك ريتو هزها لكل وحدو.. بقيت نتبع فيه حتى خرجهاوحطها عالرمل مقابل الشط.. قربت بقيت نحرك فيها وانا فرحانة خاطر بش ندرجح.. تلفتت على صوتو يحكي
عيسى:" هناا باهية ولا نبدلك لبلاصة ؟"
قربتلو فيسع وطلعت على طراطيش صوابعي بستو من خدو نحكي
انا :" باهية عاللخر.. عيشك عيسى ربي يخليك ليا "
عضيت على شفايفي ك فقت بروحي شعملت.. عدا بعينيه علياا وغزرلي درا كيفاه لحظتهاا حسيت وجهي فور من الحشمة غير دقات قلبي لي قوات...
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
