#لارين_تحكي
نهارين تعداو من بعد الليلة لي طلبت فيها خالد.. ومن وقتها وانا فالدار ماخرجتش.. بقيت انا وماياا مع عمتي نعاونو فيها ف القضية وتحضيرات رمضان لي مازال عليه 3 ايام كهو.. نهارين عديتهم وانا مرتاحة بين عمتي وجابر لي كانو فرحانين بياا وخاصة بماياا والشي هذا فرحني أكثر خاطر راحة مايا هي راحتي.. حتي سميحة معادش تقلقني جابر صار واقفلهاا عالكلمة مش مخليها لا تدور بياا ولا بمايا..كيما النهارين هاذم بقيت نتجنب فلآخر على قد مانقدر.. كل مايجي لدار ندخل لبيتي ولا للكوجينة حتى يمشي.. المهم عندي مانراهوش خاطر بلحق صرت نتوتر قدام غزرتو لياا..حتى هو زادة معادش يجي يفطر ويتعشى هناا وممكن هذا احسن حل..خليه بعيد عليا..اصلا مانيش عارفة شنوة بش نعمل فرمضان وقت شقان الفطر وهو معاناا على فرد طاولة كيفاه بش ناخذ راحتي غير خوه لي اكيد بش يجي زادة.. وجود عزيز وحدو كافي بش يوترني خاطرني بلحق مانيش حاملتو.. نهارين عديتهم انا ومايا نستناو ف خالد يكلمنا بش يقوللنا شنوة عمل..كل ماينوقز تاليفوني نقول اكيد خالد رغم انو قلي بش يكلمني بعد نهارين اما بقيت نستنى فيه من تو خاطرني بلحق مزروبة ونحب نعرف شنوة بش نعمل من تو مانحبش نضيع وقت اكثر.. كيما مانحبش نعدي وقتي لكل ف الدار هكاا لازمني نخرج شوي بش نبعد عليه ونلهي روحي ف حاجات أخرى خاطر على قد مانحاول ننسي روحي نلقى تفكيري رجع يدور عليه هو خاصة ك يتذكر اسمو قدامي ولانسمع صوتو لبرا.. حطيت الكانون لي فيه لبخور على جنب وهزيت الكوموند زدت ف صوت القرآن لي يقرأ وقربت حليت شباك صالة وين ضو الشمس سطع ف الدار.. تبسمت من غير مانشعر اول ماخرجت للبلكونة وشفت جو الحومة..
ريحة رمضان بدأت تفوح من تو.. صوت القرآن والادعية موجود ف كل دار غير ريحة لبخور الفاوحة ف حومة كاملة.. المرشي مليان للعشية النساء ماشية جاية والصغار تلعب..حتى ف الليل معادش تفرغ الحومة الناس تبقى ملمومة للصباح أصوات ضحكهم واصلة لسابع طاق.. فقت من سرحتي على صوت عمتي تحكي
غالية :" رينووو وينك "
خرجت نجري هزيت الكانون من فوق الطاولة وجريت للكوجينة وين شفت عمتي تنظم ف الافاحات هي ومايا.. حطيت الكانون على جنب نحكي
انا :" هاني جيت عمتي.. حاجتك بحاجة؟"
غالية:" شكنتي تعملي ؟"
انا :" شي.. حليت بلكونة الصالة وكنت نبخر ف الدار "
هزتلي براسها باهي تحكي
غالية :" باهي ايجاا فرغ الافاحات مع ماياا انا خليني نكمل لفطور.. 12 فاتت وبوك قريب يروح "
هزيتلها براسي باهي وقربت وين ماايا نحكي
انا :" بعدي شوي خليني نقعد بجنبك "
تبسمت تحكي
ماايا :" ايجا بجنبي "
قعدت حذاها وحذيت ساشي لي فيها كمون نفرغ فيه ف الحكة نحكي
انا :" ياخي سميحة وين مشات ؟؟"
غالية:" مشات تطل على خوهاا شوي وتجي "
هزيتلها براسي باهي وغزرت لمايا لي قربتلي شوي تحكي
مايا :" رينو قول انت لعمتي.. انا حشمت "
عديت بعينيا عليها نحكي
انا :" علاش تحشم؟ ياخي شنوة فيها؟"
مايا :" ميسالش قول انت خير امان "
تبسمت نحكي
انا :" باهي ياروحي "
خذيت نفس طويل وتلفتت لعمتي لي تقص ف الخضرة نحكي
انا :" عمتي ميسالش بعد لفطور نخرج انا ومايا؟"
حطت السكينة وغزرتلنا.. عدات بعيناها علينا تحكي
غالية :" وين ماشين ؟"
انا :" مايا تحب تمشي تشوف لكنيسة.. وقلنا نعملو دورة ف وسط لبلاد.. ميسالش ؟"
قربت حذاناا وقعدت قدامناا تحكي
غالية :" اي ناوين تمشيو وحدكم ؟"
انا :" لا تو نشوفJoseph كان مايقراش يمشي معانا.. وكان يقرأ تو ناخذو تاكسي من قدام الدار.. امان عمتي "
تنهدت بالشوي تحكي
غالية :" باهي براو وردو بالكم على رواحكم.. اما قبلها استنى بوك خبرو رينو "
هزيتلها براسي باهي نحكي
انا :" باهي عمتي "
تبسمت وقامت من بلاصتها رجعت وين الرخامة.. طبست راسي وبقيت نكمل مع مايا فالتنظيم.. اول مامديت يدي ناحية الساشي وحليتهاا غمضت عينيا بالقوي وبقيت نعطس وراء بعضو.. قمت من بلاصتي فيسع وقربت وين الشباك نعطس.. تلفتت على يد ماياا لي تحطت وراء ظهري تحكي
ماياا :" رينو شبيك "
خذيت نفس طويل وبقيت نحك ف خشمي ونحكي
انا :" الساشي فيهاا قرفة.. خشمي كلاني وقراجمي حرقتني "
ريت عمتي كيف قربت فيسع هزتها هي وساشية الزنجبيل تحكي
غالية :" يا ناري على بنتي.. سامحني ياماما والله كنت ناوية نبعدهم عليك "
خذيت كاسة الماء شربت شوي وبقيت نرد ف النفس وراء بعضو نحكي
انا:" عادي عمتي ميسالش.. اما امان ماتطيبيش بيهم اصلا علاش شارينهم ؟"
ريتها ك رماتهم ف القجر وسكرت علاهم تحكي
غالية :" سميحة شراتهم مع القضية.. وتهنى راني متفكرتك مانيش بش نطيب بيهم "
انا :" اي امان خاطر دواء الحساسية وفالي ونسيت اسمو اصلا بش نشري "
مسحت على شعري تحكي
غالية :" ماعندك علاش تشري ياماما.. مانيش بش نطيب بيهم ماتخافيش "
تبسمت نحكي
انا :" عيش عمتي "
مايا :" برا أقف شوي ف البلكونة تنفس.. ماتبقاش هناا خاطر ريحة القرفة مازالت "
هزيتلها براسي باهي وخرجت.. على خرجني شفت سميحة واقفة قدام الباب تنحي ف فولارتهاا.. عدات بعيناها عليا غزرتلي تحكي
سميحة:" شبي وجهك احمر هكا ؟ شصارلك ؟"
انا :" ماصارلي شي "
خليتها واقفة وخرجت فيسع للبلكونة.. خذيت نفس طويل من النسمة وبقيت نكح بش نتخلص من الحرقة لي شدتني فقراجمي.. تنهدت بالشوي وقت تفكرت نور كيفاه كانت مستحيل تدخل حاجات هاذم لدار خاطر تعرفهم يقلقوني.. كانت تعرف كل شي يخصني اكثر مني انا شخصياً.. منغير ماانا نفكرهاا هي كانت تتصرف فبلاصتي..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
