#مايا_تحكي
هزيت راسي وعديت بعينيا عالكنيسة من داخل.. حليت ساكي جبدت فولارة خفيفة حطيتها فوق شعري وغزرت لرينو نحكي
انا :" خليك هنا.. نصلي ونرجع "
هزتلي براسها باهي وقعدت عالكرسي لي كان على جنب.. خذيت نفس طويل وقدمت وفرد وقت نغزر لتفاصيل لكنيسة لي كانت تشبه بالضبط للكنيسة لي ف مرسيليا.. تنفست براحة ك لقيت فما غيري هناا يصلي زادة خاطر للحظة حسيت روحي وحدي كاني غريبة بيناتهم.. غمضت عينيا اول ماوقفت قدام الصليب.. شبكت يديا فبعضهم وبقيت نصلي وندعي.. للحظة لقيت روحي مانيش عارفة على شنوة ندعي بالضبط خاطر ديما نحس انو حياتي مفرعسة وداخلة بعضها ولي زاد تو التغيير المفاجئ لي صار فيهاا بجيتي لهناا.. غصة شدتني فحلقي وقت تفكرت ماما لي ماتت وخلاتني وانا صغيرة رغم اني لقيت نور ورينو معاياا اما فراقها وجعني ومازال وجعني لتو خاطر بعدها هي انا شفت الوجه الحقيقي متاع بابا.. رغم اني كنت عارفة هو شعمل ف ماما قبل وكيفاه كان خايب معاها انا حاولت نتقرب منو.. حاولت نتناسى كل شي المهم مانكونش وحدي ونلقى حد ف ظهري اما لقيتو هو رافض الشي هذاا.. كانو يكمل فعقابو لاامي فياا اناا.. دمعتي نزلت وقت تفكرت كل مرة ك نمشي حذاه وين نحس وحدتي تكبر أكثر ونحس اني يتيمة حتى وهو قدامي..رغم اني مانظهرش ونبان قوية قدام لكل اما بيني وبين روحي نسخف على حالي ك نشوفو كيفاه يعامل مرتو وصغارو.. كيفاه نجم يتخطاني كاني مانيش بنتو انا زادة.. موت مادلين خلاني نحس انو ماما وبابا ماتو.. كان مش نور ورينو لي وقفو معاياا وكانولي عيلتي الثانية راني ضعت تو خاطر متأكدة انو بابا مستحيل كان يقبلني حياتو لكل.. ضميت على شفايفي وقت تفكرت علاش هو نادالي للعيد كيفاه طمع ف فلوسي و فمحل مادلين وانا لي فكرت انو حب يعدي العيد معايا.. احساس خايب ويوجع برشة خلاني نحس فيه لغاية تو ومن كثر ما قهرني مانجمتش حتى نحكي لحكاية لرينو خاطر انا بيدي لتو مازلت ماستوعبتش طلبو لي رفضتو طول.. خاطرني مستحيل نسلم ف محل مادلين.. اصلا هذاكا الوحيد لي بقالي حتى الدار لي كنا نعيشو فيها انا خرجت منهاا خاطر مانجمتش نتحمل المصاريف وقتهاا وكان مش نوري راني بقيت ف الشارع مرمية.. عديت بعينيا عالصليب قدامي وين تفكرت حياتي تو كيفاه تبدلت.. رغم اني كنت خايفة من غربتي هنااا ومن استقراري فتونس اما لقيت احسن حل اني نبعد عليه بش مانزيدش نكرهو أكثر من هكاا.. اصلا لقيت روحي مرتاحة بين ناس اغراب أكثر من دارو هو لي عمري لاحسيتها داري.. دوب تبسمت ك تفكرت رينو لي مخلاتنيش وحدي حتى ك لقات عائلتها بقات متفكرتني وخلاتهم يحسبوني وحدة منهم.. رغم انو صعيب علياا اما حسيت روحي فرحانة خاطر هي الوحيدة لي طلعت بيها من الدنيا كيما اما مستحيل نخليهاا وحدهاا بش نبقى ديما معاها وف ظهرها مهما تبعد ولوين ماتمشي انا بش نبقى ورااهاا.. تنهدت بالشوي وبقيت نفكر ف حياتنا كيفاه بش تكون زعمة وشنوة يستنى فيناا هناا اما مهما كان لي يستنى انا بش نكون قوية على خاطر روحي وعلى خاطر رينو.. عمري لا بش نظهر ضعفي ولا ووجيعتي قدام اي حد.. صحيح انا غريبة هناا اما هذا مايعنيش اني نخلاهم يستغلو غربتي.. انا قوية وراسي لفوق ف اي بلاصة حد وقدام اي ظرف.. لازمني نكون هكاا ومجبورة نبقى هكاا بش انجم نكمل حياتي وانا مرتاحة وفرد وقت محافظة على اماانة نور عالاقل هكاا نعوضلهم لي عملوه معايا قبل ولي مازالت رينو تعمل فيه.. عديت بيديا الزوز على وجهي وكملت صلاتي فيسع وين حسيت روحي ارتحت شوي وقت حكيت لكلام هذا حتى بيني وبين روحي.. نزلت الفولارة وتلفتت وين شفت رينو قاعدة تغزرلي.. قدمت بخطواتي ناحيتها ووقفت قدامها نحكي
انا :" هياا نمشيو ؟"
وقفت من بلاصتها وعدات بعيناها علياا تحكي
لارين :" كنت تبكي ؟"
تبسمت نحكي
انا :" امم تأثرت ف الصلاة وزيد فرحت خاطر لكنيسة قريبة هكاا "
لارين :" كل ماتحب تجي قلي "
قرصتها من خدها نحكي
انا :" اوكيتو رينو.. هياا خلينا نخرجو.. نحب نشوف للاسواق "
ضحكت وشدتني من مرفقي تحكي
لارين :" اي هياا.. شرايك نمشيو ناكلو فريكاسي حتى يجي Joseph "
انا :" اي ميسالش "
خرجنا مع بعضنا وبقينا نتمشاو.. عديت بعينيا على وسط لبلاد كيفاه كانت مليانة وصوت البياعة فكل بلاصة.. هزيت راسي وغزرت للباب لكبير لي يظهر قديم برشة وحذاه شلالات صغار.. تلفتت على صوت رينو نحكي
لارين :" هذاا باب بحر.. ريت محلاه.. هناا يبيعو الجبايب و كل شي تقليدي "
انا :' اي محلاه.. ايجا نتصورو هناا "
ضحكت وجبدت تاليفونهاا قربناا وين الشلالات الصغار وعملنا تصويرة.. اول ماكلمناا قربناا للمحلات وبقيت نتفرج فالتحف التقليدية لي كانو عبارة على شاشية وجمل وخُمسة نحاس.. كل شي كان جديد علياا ومحلاه.. قربناا شرينا حارة فريكاسي كيما قالت رينو وقعدنا على كرسي ف الشارع مقابل الشلالات نتفرجو ف الحمام لي مغطي القاعة قدامنا والصغار لي يلعبو معاهم.. تكيت براسي على كتف رينو وبقيت ناكل وسارحة وين حسيت براحة غريبة وهي بجنبي تو..كل مرة نزيد نتأكد انو الدنيا تحبني خاطر عوضتني بلارين وخلاتهاا فحياتي..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
