#لارين_تحكي
قمت من بلاصتي اول ماريتهم كملو فطور..عديت بعينيا عليهم نحكي
انا :" هياا امان.. معادش بكري 9 فاتت "
خالد:" عندك حق معادش بكري "
تبسمت ك ريتهم وقفو.. قربت وين فاليزتي والساك لكبيرة نحكي
انا :" ميسالش تهزو هاذم معاكم.. ثقال علياا "
تبسمت ك ريت عيسى قربلي يحكي
عيسى :" هات عليك "
بعدت شوي خليتو يهزهم.. عديت بعينيا عليه نحكي
انا :" انا تو نهز فاليزتك..خفيفة "
هزلي براسو باهي من غير حتى كلمة.. قربت سلمت على انجيلا وشكرتها على الايامات هاذم وخرجت بعد ماودعتها.. تبسمت ك شفت الكرهبة لي قدام الباب.. تلفتت ورايا وين شفت عيسى وخالد خرجو.. نحكي
انا :" خالد كرهبتك هاذي ؟"
هزلي براسو لا وقربلي يحكي
خالد:" لا كرهبة جمال.. خذيتها منو خاطرها مريحة اكثر وكبيرة "
انا :" محلاها "
خالد :" شرايك تسوق انت ؟"
عضيت على شفايفي وغزرت لعيسى لي واقف بجنبي..رجعت غزرت لخالد نحكي
انا :" لا مانجمش..ماعنديش برمي "
خالد :" ااا لازمك تعمل برمي.. ساعة معاك الحوت بكلو معلم ف السوقان.. تو يعلمك هو "
تبسمت وغزرت لعيسى يحكي
عيسى :" ربي يسهل.. هياا خلينا نمشيو "
تلفتت لخالد ك عطاه لمفاتح يحكي
خالد :" سوق انت وانا تو نسوق بعد.. بش نرتحو على بعضنا "
خذا من عندو لمفاتح وقربو للكرهبة وحطو الفاليزات.. اول ماحطيت يدي بش نحل الباب التلاني تلفتت على صوت خالد يحكي
خالد :" لارين اطلع انت من قدام..خليني انا من تالي خاطر ناوي نتكى شوي "
غزرت للعيسى ورجعت غزرتلو نحكي
انا :" باهي "
خذيت نفس طويل وطلعت وين شفت عيسى طلع بجنبي.. سكرت الباب وحطيت ساكي فوق حجري.. غزرتلو ك خدم الكرهبة وشدينا الثنية.. تلفتتلو بكلي نحكي
انا :" انت تعرفها الثنية ؟"
غزرلي ورجع غزر قدامو يحكي
عيسى :" مالا نسوق هكاكا ؟"
عوجت شفايفي نحكي
انا :" يعني انت مشيت قبل ؟"
عيسى :" اي "
تلفتت لخالد يحكي
خالد :" عيسى مشى معايا لشاليه هذا مرة وزادة مشينا لشاليه لي ف سانت استيف.. تتفكر عيسى الايامات هاذوكم..مايتعاودوش "
عيسى :" اي نتفكر "
ضحكت نحكي
انا :" صحة ليكم.. حتى فسانت إستيف فما جو محلاه"
خالد:" اعملو نهار وارجعوا تو نمشيو كلنا غادي "
رجعت غزرت قدامي وتنهدت بالشوي نحكي
انا :" انشالله "
تلفتت على صوتو يحكي
عيسى :" ارقدوا شوي "
انا :" اما انا ماعنديش نوم "
خالد :" انا عندي "
تبسمت ك ريتو حط الكيت ف وذنو وتكا..رجعت غزرت قدامي وحليت الشباك حذااياا وين النسمة ضربتني.. تكيت براسي عالبلار وبقيت سارحة مع الطريق ساكتة.. نفخت بالشوي ك حسيت روحي قلقت.. تلفت لعيسى نحكي
انا :" عيسى ميسالش نحط شوي غناء ؟"
عيسى :" حط الكيت "
انا :" لقيتو طايح شارج.. مدام سيادتك لبارح مخلي ساكي عندك.. عالاقل كنت شرجيه "
قحرلي يحكي
عيسى :" شدخلني فيه انا بش نشرجيه "
انا :" مالا انا بش نحل غناء فالكرهبة "
غزر لخالد من لمرايا ورجع غزرلي يحكي
عيسى :" يابنتي الراجل راقد "
انا :" خالد حاط كيت ف وذنيه.. اهيكا مسكرة "
نفخ بالقوي يحكي
عيسى :" حل اما ماتعليش فالصوت "
هزيتلو براسي باهي ومديت يدي بقيت نحل ونقلب ف الغناء.. رجعت سكرت وغزرتلو نحكي
انا :" غناء عمك جمال ماسط لاسط "
قحرلي يحكي
عيسى :" يابنتي احشمي "
درتلو بكلي وتبسمت نحكي
انا :" مسيو عيسى "
غزرلي على جنب وهز بحاجبو يحكي
عيسى :" هاتي من لخر شتحبي "
قربتلو وجهي شوي ورمشت عينيا فيه نحكي
انا :" انا تاليفوني طايح شارج.. ميسالش تعطيني تاليفونك نبرنشيه نحط منو لغناء "
عيسى :" ماعندي حتى غناية ف التاليفون "
انا :" مااستغربتش.. هات تو نحك من اليوتيوب "
نفخ وجبدو.. عطاهولي يحكي
عيسى :" شد واسكت "
خذيتو من يديه وحليتو.. عوجت شفايفي نحكي
انا :" شنوة الكود ؟"
عيسى :" 12/05 "
ضيقت عينيا فيه نحكي
انا :" هذا وقتاه انت مولود؟"
عيسى :" لا "
انا :" مالا تاريخ شنوة هذا ؟"
عيسى :" شيهمك "
عضيت على شفايفي نحكي
انا :" كنت تنجم تسكت ف عوض كلمة شيهمك "
عيسى :" المرة جاية نسكت "
قحرتلو وحليت التاليفون.. حطيت اليوتيوب وبرنشيتو مع الكرهبة.. بقيت نقلب ونخمم شنوة بش نحط نسمع.. تبسمت ك تفكرت غناية.. كتبتها وحطيتها نحكي
انا :" انشالله تعجبك لغناية "
قحرلي ورجع غزر قدامو ساكت.. حطيت تاليفونو على جنب وتكيت بظهري لتالي.. حركت كتفي مع اللحن لي بدأ وبقيت نغزر لثنية.. تبسمت ك لغناية بدأت وصوت سعاد حسني بدأ يغني..وين بديت نغني معاها من غير مانغزرلو
" يا يا واد ياثقيل.. يا يا يامشيبني.. ياااااه دا انا بالي طويل وانت عاجبني.. بس يا ابني بلاش تتعبني عشان عمرك ماهتغلبني "
ريتو ك عدا بيديه على وجهو يحكي
عيسى :" شنوة هذا ؟"
رجعت غزرت قدامي وجبدت شكلاطة ومرشميلو من ساكي.. حليتهم وبقيت ناكل من غير مانجاوبو وباقي نغني
انا :" عندو برود أعصاب اسم الله ولاجراح بريطاني "
دوب غزرتلو وين شفتو قحرلي وعدا بعينيه عليا يحكي
عيسى:" ياخي شنوة هذا ؟ف بالك ماشين للرحلة؟"
رجعت شعري لتالي وغزرتلو نحكي
انا :" مالا ؟"
نفخ بالقوي ورجع غزر قدامو ساكت.. تبسمت على وجهو كيفاه تقلب.. رجعت نغني شماتة فيه
انا :" اكلمو بحرارة يرد بالقطارة.. الراجل الغامض بسلامته متخفي بنظارة "
سكتت ك ريتو نفخ ونزل عالفيتاس.. بقيت ناكل ونغزرلو كيفاه ساكت هو زادة ومش عاجبتو لغناية لي عاودتها مرة اخرى شماتة فيه..خاطر كان هو بش يمررلي المشية انا بش نمررلو الثنية...
VOUS LISEZ
#مُتمردة_العيسى ❤️🔥 (الستاتي الثاني)
Roman d'amour#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
