#لارين_تحكي
دخلت نجري للبيت وسكرت الباب ورايا.. وقفت ف بلاصتي وبقيت نرد ف النفس لي حسيتو تقطع علياا وقت ريتو قدامي.. للحظة حسيت قلبي بش ياقف من قربو مني.. رغم غشي لكبير منو بقات تحكمني نفس الرعشة قدام لمست يديه.. ريحتو وغزرتو لياا لي رجعت تفكرتهاا تو ولي كانت نفس الغزرة لي كانت تفرحني وبقيت نشوف فيهاا ايام قبل الليلة هاكي.. للحظة حسيت روحي دخلت بعضي وماعدتش فاهمة شي.. علاش باقي يغزرلي هكاا علاش مايحبش يبعدني.. كل ماناخذ قرار بش ننساه نلقاه طلع قدامي..حسيت روحي بلحق غزلت منو كيفاه باقي وراياا ورغم كل شي عملو مازال يحبني نسمعو اصلا شمازال عندو يحكي بعد لي حكاه.. لا وف بالو بياا مازالت بش نقلو الله بالك وناقف نسمعو مسكين يحلم هكاكا.. تبسمت من غير مانشعر ك تفكرت وجهو لي حمار وقت لي عضيتو.. ومازال يصير فيه خليه يرجع يتعرضلي مرة اخرى برك كان مانخليهوش يندم كيما خلاني انا نندم وقتلي عرفتو انا مانتسماش.. فقت من سرحتي على صوت مايا ك دخلت من البلكونة تحكي
ماايا :" والله القعدة هناا تهبل.. مانعرفش علاش نهار لكل وانت مسكرتها البلكونة "
عوجت شفايفي وقربت هزيت المنشفة وقعدت على طرف الفرش انشف ف شعري ساكتة.. قعدت بجنبي تحكي
ماايا :" شبيك ساكتة ؟"
غزرتلها نحكي
انا :" مسكرتها خاطر هو كل ليلة يقعد ف البلكونة لي فوقنا.. مانحبش نسمع حتى صوت خطواتو.. حتى نفس متاعو مانحبش نسمعو ماايا... "
نزلت المنشفة وضميت على شفايفي نحكي
انا :" مايا انا نحب ننسى عيسى.. نحب نخرجو من عقلي ومن قلبي.. نحب نفسخ كل شي عشتو معاه.. اما مانجمتش كل مانقول هكاا نلقى روحي غرقت اكثر فيه.. كل ليلة نغمض عينيا نقول سايي عيسى معادش واول مايطلع النهار ونحل عينيا نلقى روحي نخمم فيه اول واحد.. حاسة روحي نتخبط بين عقلي لي يحب ينساه وبين قلبي لي يبدا يلوج عليه قبل عينيا.. انا نكرهو عيسى نكرهو خاطر خلاني نحس هكاا "
غمضت عينيا على يداها لي جبدتني.. شهقت بالشوي وبقيت نبكي عندها.. مسحت على شعري تحكي
ماايا :" رينو انت عارفة كلامك هذا شمعناها ؟"
طرشقت بلبكا اكثر نحكي
انا :" مانحبش نعرف.. مانحبش نسمع الحقيقة هاذي.. خاطرها اكثر حقيقة خايبة فحياتي.. اكثر حقيقة انا نكرهها.. حقيقة خلاها عيسى تصير كذبة توجع "
ماايا :" نعرف أنو لحقيقة هاذي توجع ونعرف انو النسيان صعيب اما انت قوية رينو.. ماتخليش لي صار يهدك هكاا.. بالوقت تو ترتاح وتنسى..غير انت حاول"
بعدت علاها شوي ومسحت دموعي نحكي
انا :" انا قاعدة نحاول والله اماهو مش مخليني.. ريتو بكري كيفاه يغزرلي ريتو كيفاه يدخل ف روحو.. وتو لبرا وقفني يحب يحكي معايا.. من جرتو هو انا واقفة على بلاصتي..راو ماهوش مخليني نقدم ونكمل حياتي.. عينيه محاصرتني من كل زاوية..ريحتو لي ف كل بلاصة ساعات نحسها تخنقني.. و ك نهرب ونتخبى نلقى صوتو وراياا من برا.. كيفاه بش نبعدو علياا مانيش عارفة "
حطت يداها على خدي ومسحتلي دموعي تحكي
مايا :" يزي من لبكا رينو.. ماتكونش ضعيفة هكا.. كل ماتتفكرو وكل ماتسمع صوتو تفكر هو شعملك وشنوة قاللك.. ميسالش ارجع أوجع روحك وماتخليهوش هو يوجعك مرة اخرى.. كل ماتلقى قلبك يدا يسيطر عليك سكتو بكلام عيسى وقتها هو تو يفيق صحيح بش يوجعك اما بش يسكت.. المهم ماتضعفش رينو قدامو "
هزيتلها براسي باهي وعديت بلساني على شفايفي نحكي
انا :" مانيش بش نضعف خاصة قدامو.. واي حاجة نحس فيها تو اتجاهو بش نخلاها تموت.. بش نعفس على قلبي وننساه جملا "
شدتني من يدي وباستني منها تحكي
مايا :" نعرف اختي قوية.. وانا هاني معاك مانيش بش نخليك وحدك تعيش هذا لكل "
كبست على يداها وتبسمت بالسيف نحكي
انا :" نعرف.. نعرف "
جبدت يداها مني وهزت المنشفة لي بقات فوق حجري.. دارت وراياا تحكي
ماايا :" اياا ايجا خلينا انشفو الشعرات المزيانين هاذم ونخرجو نتعشاو "
هزيتلها براسي باهي وبقيت مستحلية ليداها على شعري.. تلفتت على صوت الباب لي تحل وين شفت عمتي قدامي.. دخلت وضحكت تحكي
غالية :" محلاهاا قعدة.. كان مش لعشاء راني جيت حذاكم "
تبسمت نحكي
انا :" عمتي شرايك الليلة تبات حذانا.. مش قتلي ك تجي مايا بش تخرفلناا "
ماايا :" اي عمتي امان خليك حذانا الليلة ونسنا "
تبسمت تحكي
غالية :" باهي الليلة بش نرقد حذا بناتي.. المهم قومو تو الطاولة حضرت "
تنهدت بالشوي للحظة حبيت نقلهاا مانحبش نخرج بش مانشوفش لآخر.. سمعت مايا تحكي
مايا :" باهي عمتي هانا جايين "
عدات بعيناها علياا وخرجت.. غزرت لمايا ك وقفت واشرتلي بعيناها تحكي
ماياا :" هياا رينو وماتقولش لا.. ماتبقاش هاربة هكاا تعلم واجه "
خذيت نفس طويل وقمت.. رجعت شعري لتالي وهزيت تاليفوني وخرجت مع ماياا.. اول ماقدمت وين الطاولة غزرتلو ك هز راسو معاياا وعدا بعينيه عليا لحظتهاا كان لقيت نوخر بخطواتي لتالي ونبعد عليه.. نبعد برشة بش انجم نتخلص منو ومن كل تفاصيلو لي بقات تلاحق فياا.. نبعد لدرجة اني كون عارفة انو مستحيل يلقاني ولا يعرضني حتى بالصدفة.. اما عارفة هذا صعيب.. والصعيب هذاا بش يتعبني وبش يخليني ديما موجوعة..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
