#لارين_تحكي
رجعت فيسع للدار ودخلت للكوجينة.. حطيت السلايط ف الاصحنة ورجعت الطاجين يسخن.. قربت للساك لي جبتها حليتها وجبدت روبة بيضاء حطيتها بكري بش نلبسها.. قربت سكرت باب الكوجينة بالمفتاح وبقيت نلبس فيهاا.. لميت شعري بفولارة حرير ف الأزرق وخليت خصلات خفاف من قصتي نازلين.. اول ماكملت قربت طفيت عالطاجين وحطيتو ف الطبق بجنب السلايط و كاسات الماء و العصير.. وخرجت هزيت زوز كراسي وناب للطاولة مع ملحفة ورجعت وين الطاولة.. حطيت لكراسي وفرشت الناب عالطاولة والملحفة عالرمل ورجعت فيسع للكوجينة.. خذيت كاسة ماء شربت شوي بش انجم نتنفس من المشي والجي هذاا.. هزيت طبق لي فيه لعشاء ومعاهم 4 قناديل شمع وخرجت بقيت نمشي بالشوي بالشوي حتى وصلت للطاولة..بقيت أنظم ف الاصحنة والكاسات بطريقة مزيانة حتى كملت لحظتهاا هزيت القناديل حطيتهم وين الملحفة وشعلتهم وين لبلاصة ضوات اكثر.. تبسمت اول ماكلمت وشفت المنظر كيفاه طلع احلى من لي تخيلت.. خذيت نفس طويل ورجعت نجري للدار.. شهقت بالقوي ك سمعتو يدق ف باب الكوجينة يحكي
عيسى :" لاااارين.. شبيييك مسكرة لباااب ؟"
عضيت على شفايفي وقربت فيسع.. دورت المفتاح وحليت الباب نحكي
انا :" سامحني نسيتو "
عدا بعينيه عليا بكلي ورجع غزرلي درا كيفاه يحكي
عيسى :" ياخي وين كنت ؟"
انا :" هناا "
عيسى :"لارين وين كنت؟ساعة وين بدلت حوايجك ؟"
تبسمت نحكي
انا :" هنااا "
هز بحاجبو يحكي
عيسى :" شنوة لي هنا هنا.. وين هناا ؟"
حليت الباب اكثر واشرتلو بيدي نحكي
انا :" ادخل "
قحرلي ودخل للكوجينة عدا بعينيه علاها ورجع غزرلي يحكي
عيسى :" وينو لعشاء لي ضاربة 3 سوايع تحضر فيه ؟"
قربتلو ووقفت قدامو بالضبط نحكي
انا :" قلي ساعة.. الماتش وفى ؟"
عيسى :" اي "
انا :" يعني متفاضي انت تو ؟"
عيسى :" اي "
هزيت بحاجبي وخشنت صوتي كيفو نحكي
انا :" شنوة لي اي اي.. وين اي "
عض على شفايفو وقحرلي يحكي
عيسى :" فهمني شصاير هنااا "
تبسمت نحكي
انا :" اما انت ماعندكش وسع بال جملا مسيو عيسى "
عيسى :" مدام تعرف هكاا ماتوترنييش "
تبسمت نحكي
انا :" لا ماتتوترش.. هياا حاضر تشوف مفاجأتي؟"
عدا بيديه الزوز على وجهو يحكي
عيسى :" يااا صبر أيوب.. لااارين بش تحل فمك ولا لاا "
انا :" اوكي هاني بش نحلو.. شوف انا حضرت لعشاء اما مش هناا "
عقد بحواجبو يحكي
عيسى :" مالا وين ؟"
قربت هزيت لمخادد الزوز وشديتو من يديه نحكي
انا :" ايجا شوف "
غزرلي على جنب وبقى يمشي بجنبي ساكت.. شوي وسمعتو يحكي
عيسى :" ياخي وين ماشين من هنا ؟"
انا :" اصبر تو تعرف.. هانا قريب نوصلو "
بقيت نمشي بجنبو وانا داخلة بعضي وقلبي يدق نستنى ف رايو.. تبسمت اول ماوصلنا وغزرتلو نحكي
انا :" شرايك ؟"
عدا بعينيه عالبلاصة وفك يديه من يدي بنطرة وين حسيت روحي خفت ومافهمتش شصار.. قرب وين الطاولة ورجع غزرلي.. بلعت ريقي ك شفت غزرتو لي تبدلت يحكي
عيسى :" شنوة هذا ؟"
فركت يديا ف بعضهم نحكي
انا :" عشاء... "
قص علياا ك علا ف صوتو شوي يحكي
عيسى :" شيهمني فالعشا اناا..انت كيفاه تجي لهنا وحدك؟ يعني من بكري وانت ماشية جاية الدنيا ظلمة ولبلاصة شوف قداش بعيدة عالدار..فهممممني مخك كيفاه يخمم "
ضميت على شفايفي شديت دمعتي بالسيف من وراء صوتو لي علا علياا..نحكي
انا :" انا.. انا عجبتني لبلاصة..ريتها الصباح وقت جينا وحبيت نحضر فيها لعشا"
قرب ناحيتي ووقف قدامي يحكي
عيسى :" لارين فهمني انت علاش تعمل هكا؟ علاش تتصرف بلا ماتخمم.. علاااش ماتقراااش حساب الخطوة لي بش تعملهاااا ؟؟"
مسحت دمعتي الي نزلت نحكي
انا :" انا ماعملت شي غالط... "
قص علياا ك قربلي اكثر يحكي
عيسى :" لاااا غالط.. وقت تجي لهنااا وحدك غاالط.. مخليتني فدار نتفرج ومسكرة على روحك بااب الكوجينة وجاية لهناا وانا مطمن انك ف الكوجينة.. يعني كان تصيرلك حاجة ماكنتش بش نعرف ولا نسمممع "
عديت بعينيا عليه نحكي
انا:" عيسى امان ماتصيحش..وزيد شنوة بش يصيرلي هانا وحدنا هنا.. علاش كبرت الموضوع مافهمتش "
عقد بحواجبو يحكي
عيسى :"كبرت الموضوع؟؟..لارين حل عينيك وشوف الدنيا كيفاه ظلمة ولبلاصة احنا مانعرفوهاش مليح.. شوف وراك الغابة تخيل كان خرجلك حد من هناا ؟.. تخيل كان طلع قدامك يخت فيه حد شافك وجا قلقك؟ شنوة كان بش يصير؟؟.. انا كيفاه كنت بش نعرف؟؟.. الف سؤال يالارين لازمك تخمم فيه قبل ماتتصرف "
عضيت على شفايفي نحكي
انا :" انا مافكرتش هكا والله.. كل لي فكرت فيه اني نحضرلك المفاجأة "
تنهد بالشوي وطبس راسو قدامي.. حط يديه على خدي وبعدلي خصلات قصتي يحكي
عيسى :" لارين معادش تتصرف من راسك.. نعرفك حبيت تحضر مفاجأة اما ميسالش اسالني وشاورني على حاجات قبل..هكا انا معادش بش نخليك وحدك خاطر مانعرفش انت شنوة تنجم تعمل ف غيابي من راسك "
شهقت بالشوي وين دموعي نزلو..نحكي
انا :" انا ماقصدتش والله.. انا ماخممت ف شي من هذاا.... "
سكتت وماكملتش كلامي من وراء الغصة لي شدتني.. غمضت عينيا اول ماشدني من مرفقي وجبدني عندو وين حشيت راسي ف صدرو نبكي.. دور بيديه علياا يحكي
عيسى :" فهمني علاش تبكي تو ؟"
انا :" نبكي خاطر انت تغششت ؟وخاطر خفت كان لي عملتو يفسد وتعبي يمشي خسارة ""
بعد علياا شوي ومسحلي دموعي يحكي
عيسى :" انا ماتغششتش منك..انا خفت عليك فما فرق..وتعبك ماهوش بش يمشي خسارة.. هيا ايجا "
شدني من يدي وقربنا للطاولة.. للحظة حسيت روحي خفت لاالليلة هاذي تفسد وعيسى يبقى متغشش...
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
