#لارين_تحكي
تكيت براسي عالبانو وبقيت نحرك ف ساقياا نتحسس ف الماء الدافي وين حسيت روحي هديت ودفيت اكثر..غمضت عينيا بالقوي وين استرجعت لي صار ليوم من اول وجديد..للحظة هاذي مانيش مصدقة الشي لي عشتو..كيفاه شفت الموت بعينيا وين لقيت روحي نصارع وحدي وكانو مصيري تحدد ف لحظة..
غير الخوف لي حسيتو ليوم ولي كان نفس الخوف لي حسيتو وقت إلياس..مانعرفش علاش مكتوب علياا نبقى عايشة ف الكابوس هذا..علاش كل مرة يظهر قدامي انسان مريض هكاا..رجعت حليت عينيا وخذيت نفس طويل حاولت ننسى ومانتفكر شي كان اني مليحة تو وعيسى معاياا هكا مستحيل تصيرلي حاجة.. نفخت بالشوي وقت تفكرت انو مازلنا بش نبقاو هناا وين رجعت خفت كان تصير حاجة آخرى..حسيت روحي بلحق تعبت ومعادش عندي طاقة نتحمل.. حبيت نجي نتفرهد شوي لقيت روحي من حكاية لحكاية..اولهاا جيهان لي وترتني وختمهاا الراجل هذا لي مش عارفة منين طلعلي ولا شيحب مني.. قمت من البانو غسلت شعري وبدني من الرغوة وخرجت.. لبست بيجامتي لي جابهالي عيسى من بيتي وقربت وين لمراياا..بقيت انشف ف شعري وفرد وقت نغزر لروحي مش عارفة علاش حبيت نبقى ف بيتو مانرجعش لبيتي.. اما احساس الراحة لي حسيتو هناا ماحسيتوش ف بيتي وانا وحدي.. كل بلاصة يكون فيهاا عيسى نكون مطمنة فيهاا وشعور الأمان مايغيبش علياا..وجودو بجنبي ساندني فكل الظروف خلاني نرتاح اكثر وثقتي فيه تزيد اكثر واكثر.. معاه هو صرت نغمض عينيا وانا متأكدة اني ك بش نرجع نحلهم بش نلقاه بجنبي وبش يعمل كل شي على خاطري..حطيت المنشفة على جنب وخرجت من السالدون..عديت بعينيا عالبيت وين لقيتها فارغة.. تنهدت بالشوي وقدمت للفرش.. تسطحت وتغطيت بش نرقد شوي..شوي وقت وسمعت صوت لباب ك تحل..هزيت روحي وين شفتو.. تبسمت ك ريتو دخل وف يديه كاسة لحليب..قرب ناحيتي وعدا بعينيه علياا يحكي
عيسى :" كنت راقدة؟"
انا :" لاا ماجانيش نوم "
خذيت من يديه الكاسة ورجعت نحكي
انا :" عيشك..تعبتك معايا "
قعد بجنبي يحكي
عيسى:" مفما حتى تعب.. المهم انت خير تو؟"
عملت رشفة من الكاسة نحكي
انا :" اي احسن.. البانو فادني شوي "
هزلي براسو باهي..عضيت على شفايفي نحكي
انا :" صحاب خالد مازالو تحت ؟"
عيسى:" اي ساهرين فالتيراس..تحب نهبطو حذاهم شوي ؟"
عملت رشفة من الكاس وتكيت بظهري لتالي نحكي
انا :" لا مانحبش.. كان انت تحب تمشي تسهر برا ماتبقاش شاد البيت من جرتي "
عدا بعينيه عليا يحكي
عيسى :" حتى انا مانحبش.. اما عليك انت حبيتك تهبط تبدل الجو شوي "
انا :" ماعينيش والله "
عيسى :" ميسالش ارتاح الليلة وغدوة تو نخرجو "
حطيت الكاسة عالتابل دونوي وغزرتلو نحكي
انا :" ميسالش حتى غدوة مانخرجوش؟"
عيسى :" ناوية تعدي الايامات ف البيت ؟"
انا :" والله انامانحبش نعدي ايامات..انت لي تحب "
قحرلي يحكي
عيسى:" مانرجعوش لنفس الموضوع "
تنهدت بالشوي وبقيت ساكتة خاطر ماحبيتش تصير مشكلة معاه.. قربلي شوي ورجع يحكي
عيسى :" لارين نوعدك نهارين مانفوتوش... "
قصيت عليه نحكي
انا :" انا مش مشكلتي نهارين ولا اكثر عيسى..انا مشكلتي ف السبب لي مخليك قاعد..علاش ماتحبش تنسى لي صار وخلينا نروحو امان "
حل عينيه فيا وعلا ف صوتو شوي يحكي
عيسى :" شنوة تحبننني ننسى؟؟ كيفاااه تحبني ننسى هوشنوة عمل فيييك ولوين وصلللك؟؟كيفاااه تحبني ننسى اناشنوة شفت والخوف لي حسيييتو عليييك.. شوف اناماتعلمتش نسلم فحقي ونهررب..مانروح من هنااا كان مانخليه يعيش لي عيشهوولك ونجيبو تحت ساقيك يطلب السماح "
عديت بعينيا عليه نغزر لوجهو لي حمار وعروق رقبتو لي ظهرت من الغش.. بلعت ريقي نحكي
انا :" انا ماقصديش تهرب..كل لي قصدتو انا خلينا نبعدو من المشاكل خاطر مانحبش حاجة أخرى تصير..وزيد انا مش متحملة نبقى هنا اكثر..من وقت لي جيت وانا يامتغششة ياخايفة..حبيت نتفرهد شوي ياخي تعبت "
دارلي وقعد مقابلني.. عدا بعينيه علياا يحكي
عيسى:" لارين انا وعدتك انو مش بش يصير شي.. نحي الأفكار هاذم من مخك..ومدام انت حبيت تتفرهد خليك شوي تو غدوة نخرجك ونهزك وين تحب "
هزيت بكتافي نحكي
انا :" مانحبش لبلاصة هاذي كرهتها سايي "
تنهد بالشوي يحكي
عيسى :" باهي لارين.. ارتاح تو ويامن حيا لغدوة "
عوجت شفايفي وتسطحت.. تبسمت ك ريتو هز الملحفة وغطاني..نحكي
انا :" ياخي انت وين بش ترقد ؟"
عيسى :" ارقد انت وماتخممش فيا انا "
عديت بعينيا عليه نحكي
انا :" عيسى انت ليوم خفت عليا بلحق ؟"
تنهد بالشوي يحكي
عيسى :" بالطبيعة خفت "
انا :"يعني كان صارتلي حاجة انت كنت بش تحس علياا؟"
عيسى :"لارين شنوة لكلام هذا ؟ ماعندو مايصيرلك"
انا :" انا قلت يعني..نفترضو معناها صارتلي حاجة"
عدا بعينيه عليا وغزرلي درا كيفاه يحكي
عيسى:"وانا مانحبش نفترض حاجات مستحيل نسمح انهم يصيرو"
ضيقت عينيا فيه نحكي
انا :" وانا قلت عيسى تو يرتاح من تفدليكي.. مش لبارح قلت هكاا؟ خليتني ندعي على روحي ياخي ربي تقبل مني "
دوب تبسم يحكي
عيسى :" معادش تدعي على روحك "
انا :" معادش تغششني مالا "
عيسى :" باهي معادش نغششك..ايا ارقد "
انا :"خليك هنا حتى نرقد..وماتخرجش ارقد عالفوتاي اهوكا كبير يوسعك "
نفخ بالشوي يحكي
عيسى :" باهي "
تبسمتلو وغمضت عينيا بالوقت..رغم اني رقدت بكري اما حسيت روحي مازلت داهشة شوي.. حشيت راسي ف المخدة وبقيت نخمم ف غدوة شنوة ينجم يصير.. بقيت هكاكا لين غفيت..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
