#لارين_تحكي
سكرت الباب وراياا وقدمت وين طاولة لفطور حطيت الرسومات والملف وساكي فوق الكرسي حذاهم.. عديت بعينيا عالدار وتلفتت للكوجينة ناحية صوتهم.. دخلت حذاهم.. قربت لعمتي بستها من خدها نحكي
انا :" عمتي انا جيب "
غزرتلي وتبسمت تحكي
غالية:" الحمدالله على سلامة بنتي.. ويني ماياا ؟"
انا :" ماايا مشات تشري فالجبن "
غالية :" علاش خليتها تمشي وحدها ؟ حقك مشيت معاها رينو"
انا :" والله ياعمتي قتلها نمشي معاك.. اما شافتني تاعبة قتلي روح انت وانا نمشي.. قتلي هي تعرف لمحل خاطر مشات معاك مرة "
حطت السكينة من يداها تحكي
غالية :" اي مشات معايا.. تو نبقى نعس علاها من البلكونة حتى تجي"
تلفتت على صوتهاا وين شفتها قاعدة عالطاولة تقص ف الخضرة تحكي
سميحة :" احكيلنا شعملتي ليوم ؟"
انا :" بعد تو نحكيلكم كيف نتلمو كلناا مع بعضنا"
غزرتلي على جنب تحكي
سمحية :" ربي يقدر الخير.. هانا نستناو "
قحرتلهاا وقربت لعمتي اكثر.. عديت بعينيا عالماكلة لي تحضر فيها وين حسيت روحي جعت اكثر نحكي
انا :" عمتي شنوة لعشاء الليلة ؟ راني جيعانة عاللخر "
ضحكت تحكي
غالية :" اللطف على بنتي.. شوفي عملت شربة لسان عصفور وعملت سلاطة روز وسلاطة مشوية وهاني نحضر تو ف طاجين الباي.. ومعاهم مصلي علوش وبعد نحط لبريك كهو "
تبسمت وحطيت يدي على كرشي نحكي
انا :" وقتاه يجي المغرب.. الريحة وحدهاا تهبل "
غالية :" معاد مامازال ياروحي.. تحمل شوي "
هزيتلها براسي باهي نحكي
انا :" باهي عمتي.. انا هاني بش ندخل ناخذ دوش ونصلي مدام مايا جات ونرقد شوي "
رسيت على سنيا بالقوي ك سمعتها تحكي
سميحة :" ياخي ناوية تعدي رمضان نوم.. إيجي عاونينا شوي "
انا :" تاعبة انا.. قمت بكري مانجم نعمل شي.. تو نقوم نحط الطاولة بعد ونغسل الماعون عليكم "
سميحة :" لا يعطيك الصحة عاونتي ورتحتي "
قحرتلها وغزرت لعمتي ك قربتلي تحكي
غالية :"برا ياماما ارقد ارتاح..انا كملت كل شي مابقى شي "
تبسمت نحكي
انا :" ربي يخليك ليا عمتي "
غالية:" ويخليك لياا "
انا :" ساعة جابر وينو ؟"
نفخت بالشوي ك سمعتها سبقت كالعادة تحكي
سميحة:" تو تفكرتي بوك.. كان عاطي ربي اول ماتدخلي تقولي وينو بابا؟"
ضغطت على يدي بالقوي نحكي
انا :" انا قلت وينو جابر.. وماسالتكش انت استكفي بروحك ماتبقيش وراياا عالكلمة خير والله مانشكي لجابر "
قحرتلي ودورت وجهها تكمل ف قضيتها.. غزرت لعمتي ك قحرتلها ورجعت غزرتلي تحكي
غالية :" رينو بوك مقيّل.. مشى صلى العصر فالجامع ودخل يرتاح "
انا :" باهي عمتي.. انا هاني ف البيت "
غالية :" باهي ياماما "
تبسمت وخرجت فيسع من حذاهم بش مانزيدش نرا سميحة لي ماحبتش تحشم على روحها وتبعدني قد مانبه علاها جابر وعمتي وقد ماعاركتها انا باقي ورايا..اول ماخرجت حليت عينيا على وسعهم ك ريتو واقف قدام الطاولة و ف يديه رسمة من متاعي.. عضيت على شفايفي ك ريت الملف قدامو لحظتهاا قربت نجري ناحيتو وفكيتها من يديه نحكي
انا :" سيب متاعي "
قلبي ضرب بقوة ك ريتو تلفتلي وعدا بعينيه عليا.. غزرلي درا كيفاه يحكي
عيسى :" ماتخافش مانيش بش ناكلهم "
قحرتلو وهزيت الملف فيسع.. ريتو ك غزر للملف لي كبست عليه بين يديا ورجع غزرلي.. هز بحاجبو يحكي عيسى :" مشيت للمعرض مالا ؟"
بلعت ريقي بالسيف وطبست نلم فباقي رسوماتي نحكي
انا :" علاش تسأل؟"
وخر بخطواتو لتالي شوي وغزرلي يحكي
عيسى :" لا هكا حبيت نعرف شعملتي فالمعرض.. انشالله قبلولك تصاورك بش يعرضوهم "
قحرتلو نحكي
انا :" اي مشيت..وشيهمك فياا انت شعملت وشنوة ماعملتش.. مافيباليش انو لازمني نقدملك تقرير "
عدا بعينيه عليا وغزرلي درا كيفاه ساكت.. هز المفتاح لي كان فوق الطاولة وخرج من غير مايجاوبني.. عقدت بحواجبي مستغرب غزرتو لياا لي مافهمتهاش غير انو كسبة ماشدش صحيح معاياا.. هزيت ساكي ودخلت للبيت ماحبيتش نركز معاه ياسر بش مانقلقش روحي خاصة فنهار ليوم نحب نبقى شايخة هكا.. حطيت كل شي على جنب وعديت بعينيا عليهم مرة اخرى وين حسيت روحي رجعت فرحت من اول وجديد.. رغم اني مش عارفة كيفاه بش نجبدلهم الموضوع بعد اما مايهمنيش.. خذيت نفس طويل وقربت وين لخزانة جبدت بيجامتي ومنشفة ومشيت طول لتوالات.. سكرت الباب وراياا ودخلت عملت دوش خفيف تنعوشت بيه ونفضت بيه تعب الثنية.. اول ماكملت خرجت نشفت بدني ولبست بيجامتي ريقلت أموري لكل وتوضيت ورجعت للبيت.. لبست عبايتي وغطيت شعري.. فرشت السجادة وصليت الظهر والعصر.. اول ماكملت قمت خذيت كتاب القرآن قريت الورد متاعي وسبحت.. حطيت لكتاب فوق التابل دونوي مع السبحة بعد ماكلمت وغزرت للوقت وين استغربت مايا لي تأخرت..نحيت عبايتي فيسع وقربت للبلكونة بش نحلها ونخرج نطل علاها.. وقفت على صوت الباب ك تحل وين شفتها هي دخلت.. قربتلها فيسع نحكي
انا :" شبيك لتو مايا تحيرت عليك "
رمات ساكهاا على جنب وتسطحت عالفرش بحوايجها تحكي
ماياا :" خليني نرتاح شوي امان وبعد نحكيو "
انا :" لباس ؟ شبي وجهك احمر ؟"
هزت روحهها ورجعت وقفت تحكي
ماياا :" لباس رينو ماتخافش.. جيست خليني نعمل دوش وتو نجي نحكيلك "
هزيتلها براسي باهي وغزرتلها ك مشات للخزانة جبدت حوايجها وخرجت وين حسيت روحي تحيرت علاهاا خاطر وجهها كان احمر وظاهر تاعبة.. قربت للشباك نزلت الريدو وين البيت ظلامت شوي حليت المروحة قدامي وطفيت الضو.. تسطحت عالفرش وبقيت نغزر للسقف وين رجعت نخمم ف نهار ليوم رغم اني حاسة بالتعب ف اللحظة هاذي اما مانجمتش نرقد من الأفكار لي بقيت نخمم فيهم لخدمتي الجديدة..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
