#عيسى_يحكي
طبست راسي وغزرتلها كيفاه كانت قريبة مني.. معاها هي بالذات وليت معادش فاهم تصرفاتي.. ساعات نلقى روحي نعمل فحاجات ماتجيش واصلا عمري لا فكرت نعملهم.. رغم اني عارف تو وجودها قريبة مني بالطريقة هاذي مايجيش اما فرد وقت مش منجم نبعدهاا.. غير تركيزي لي صار مع كل شي فيهاا.. كلامهاا.. تصرفاتهاا.. غزرتهاا.. لقيت روحي صرت مركز ومهتم بكل شي يخصها لدرجة اني وليت نفهمها بلا ماتحكي.. ساعات نحسها كيما الكتاب المفتوح قدامي.. رغم اني ماعنديش برشة من لي عرفتها اما حفظتها.. ممكن على هذا انا نحب نخلاها بجنبي ومانسيبهاش.. خاطرني شفت ضعفها قدامي بصورة واضحة.. تبسمت ك ريتها تحرك ف رأسها تحكي
لارين :" اففف شعري ماخلانيش نشوف الثنية "
هزيت يدي وبعدتو من قدامها نحكي
انا :" ايا ركز ف الثنية "
هزت راسها وغزرتلي تحكي
لارين :" تو متأكد احنا ماشين ف الثنية الصحيحة "
طبست راسي غزرتلها ورجعت غزرت قدامي نحكي
انا :" بالطبيعة "
لارين :" كيفاه تعرف ؟ هاو كل شي يشبه لبعضو "
تبسمت نحكي
انا :" اغزر بجنبك تو تشوف انا كيفاه نعرف "
غزرت وضحكت تحكي
لارين :" هههه والله ماريتها الخريطة هاذي "
تنهدت بالشوي نحكي
انا :" مزية ماعملتش عليك مالا "
لارين:" ياخي تحبني ف نهاري نتعلم.. ساعة علمني نسوق كرهبة وبعد يخت "
انا :" منين نجيبهولك اليخت بش نعلمك "
لارين :" اشري واحد "
طبست راسي وغزرتلها نحكي
انا :" باهي على خاطرك "
لارين:" كان ماعندكش حقو تو نقول لجابر يشريلك واحد.. ياخي هو قداه يعمل "
ضحكت من غير مانشعر على كلامهاا.. نحكي
انا :" اي قلو عاليخت والفيلا مع بعضهم "
لارين:" باهي والله تو نقلو.. وكان تحب حاجة أخرى وصيني "
انا :" باهي انشالله "
سمعتها ك نفخت تحكي
لارين :" اففف هالنهار.. مانوصلو كان مانموت بتعب "
انا :" المهم نوصلو "
شهقت بالقوي تحكي
لارين:" يعني نموت عادي ؟"
انا :" ماتموتيش اسكتي "
لارين :" شم شم.. ريحة بنينة جات "
نفخت بالشوي نحكي
انا :" اي نشم "
لارين:" هياا سيب عليك خلينا نمشيو "
عقدت بحواجبي نحكي
انا :" شعندي نسيب.. ناويتنا نضيعو "
غزرتلي وحلت عيناها فيا تحكي
لارين :" يااا ولا تصور يصيرلنا ك تيتانيك.. هههه انا نخليك تجمد ك جاك "
بعدت علاها وقحرتلها نحكي
انا :" اخرجي "
لارين :" والله نفدلك تو نطلعك معاياا.. المهم نلقاو خشبة كبيرة "
عضيت على شفايفي نحكي
انا :" اخرررج "
هزتلي براسها باهي وخرجت.. نفخت بالشوي ورجعت نسوق.. راسي وجعني من حسها كل مرة تطلع ب حكاية ولا تسكت.. شوي وغزرت لسام ك دخل ومعاه خالد يحكي
خالد:" عيسى هياا بش تاكل حاجة "
هزيتلو براسي باهي نحكي
انا :" نهبط نغسل حالتي ونجي "
خليتو واقف ونزلت بش نمشي لتوالات.. اول مانزلت ريتها ك خرجت تمسح ف يداهاا.. قحرتلي تحكي
لارين:" تطردني وتخلط علياا.. هاذي هي لا نحبك ولا نصبر عليك "
عديت بعينيا عليها ودخلت لتوالات بلا مانجاوبها.. مانيش ناقص نزيد نكسر راسي.. سكرت الباب وراياا ريقلت أموري وغسلت حالتي لكل وخرجت.. عقدت بحواجبي مستغرب ك ريتها واقفة تستنى فياا..نحكي
انا :" انت شتعمل هناا "
حلت عيناها فيا تحكي
لارين:" نستنى فيك بش نقلك كلمتين.. آخر مرة تطفيني هكاا "
ريتها كيف قالت جملتهاا ومشات وحدهاا.. عديت بيديا الزوز على وجهي حاولت نشد طرف الخيط لي بقالي ف راسي منهاا خاطر معادش أنجم نتحمل هبالهاا.. نفخت بالشوي وطلعت وين شفتها قاعدة عالطاولة لي عالحرف مقابلة لبحر تفدلك مع خالد.. قحرتلها وقربت ناحيتهم.. قعدت بجنبهاا ساكت.. غزرت لخالد يحكي
خالد:' ايا بسم الله.. انشالله تصنيفي يعجبكم "
لارين:' والله الريحة تشهي "
خالد:' كول مالا كمل صحنك لكل راك جيعانة "
لارين:" انا ماكنتش جيعانة اما لبحر يجوع "
ضحك يحكي
خالد:" ف هاذي عندك حق "
نفخت بالشوي وطبست راسي ناكل.. ريتها ك بقات تحرك ف كعبة الحوت مكشبرة وجهها.. غزرتلها نحكي
انا:" شبيك افطر "
عضت على شفايفها وقربتلي شوي تحكي
لارين:" عيسى نقلك حاجة وماتضحكش "
انا :" قولي "
لارين:" انا مانعرفش نقشر الحوت.. نخاف من الشوك نور كانت تقشرلي والله "
عديت بعينيا عليها وقربت صحنها قدامي.. بقيت نقشرلهاا ف كعبتهاا ونحط ف الشوك على جنب حتى كملت.. رجعت حطيتو قدامها نحكي
انا :" ايا كول اهوكا معادش فما شوك "
تبسمت وعدات بعيناها علياا تحكي
لارين:" ربي يخليك ليا "
دوب تبسمت على كلمتها ورجعت ناكل وفرد وقت نخطف ف غزرات منهاا وين شفتها كيفاه تاكل وتغزر للبحر.. بقينا ناكلو حتى كملنا.. قمنا لمينا الطاولة مع بعضنا لكل وغسلنا حالتنا وطلعنا لفوق مرة اخرى.. غزرتلها كيفاه قربت للحرف وقعدت وحدها تغزر قدامها.. غزرت لخالد ك قعد بجنبي يحكي
خالد:" نص ساعة ونوصلو "
انا :" الحمدالله "
خالد :" تعبت ؟"
غزرتلو على جنب نحكي
انا :" حسب رايك ؟ مانيش راقد انا 5 سوايع كيفك "
ضحك يحكي
خالد:" حاسد خوك ف نومة.. ياسيدي نوصلو طول ارقد.. وصيتهم من بارح بش يحضرولكم بيوتكم "
انا :" عيشو خالود "
خالد:" وخيان.. المهم نحبك تتفرهد خلينا نعملو جو "
انا :" انشالله "
رجعت غزرت قدامي وتبسمت ك ريتها مطلعة يداها تتبسم مع اللقلق لي يطير فوقها.. بقينا هكاا حتى تعدا الوقت ووصلنا.. لحظتهاا قمت انا وخالد وغزرتلها نحكي
انا :" لارين ايا قوم.. اليخت بش ياقف "
قامت وقربتلنا تحكي
لارين :" وصلنا سايي ؟"
انا :" اي درج ونكونو ف الميناء "
ضحكت تحكي
لارين:" enfin "
ساعدتها بش نزلت وقربت هزيت كل شي ووقفنا على جنب حتى وصلناا للميناء والمركب وقف...
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
