#عيسى_يحكي
ضغطت على يدي بالقوي وانا نغزرلها كيفاه تحكي مع الراجل لي بجنبهاا من وقت لي طلعنا..قد ماحاولت مانركزش معاها مانجمتش.. الفر/خة عرفت كيفاه توترلي عصابي وتغزلني حتى وهي بعيدة علياا.. مايزيش كلامهاا مع خالد على يوسف بكري من غير حشمة وزيد تو شادة جنب راجل تهرّ معاه غير شدة يداها بكري ليديه.. نفخت بالشوي وقت حسيت روحي سايي بديت نغلي.. مش فاهم انا علاش مركز هكاا وقتلي انا لي طلبت منهاا تبعد علياا وتشوف حياتها.. اما حاجة أقوى مني مخليتني متقلق من شوفتهاا هكاا.. للحظة حسيت روحي بين المد والجزر بقيت نتخبط ف التناقض لي فياا.. بين نحبها تبعد وبين كاره تجاهلها هذا.. بين نحب ننساها وبين تركيزي معااها ومع كل حركة تعملهاا.. الف بين وبين ومش عارف انا شنوة نتبع تو.. غمضت عينيا بالقوي وقت تفكرتها بكري ف المطار كيفاه معادش تحب تأخذ حتى حاجة من يدي.. نعرف انا لي وصلتها هكاا تعمل هكاا اما توقعتش انو بعدها علياا بش يكون بالصعب هذا.. رغم اني مانحبش نخمم ولا حتى نفهم روحي انا علاش حاسس هكا اتجاهها خاطر اي فكرة بش تكون مرفوضة ف الوقت الحالي.. مستحيل نخمم فيها ب اي طريقة تو حتى نفهم روحي ونفض الخنار وتكسير الراس لي وراياا.. رجعت حليت عينيا وبقيت نخمم كيفاه بش نعدي الفترة هاذي.. كيفاه بش نتحمل تصرفاتها لي قاعدين يلعبولي على عصابي.. كيفاه بش انجم نبقى ساكت..حليت عينيا على وسعهم اول ما شفتها ك مدت يداها وخذات ورقة من عندو.. ضغطت على يد الكرسي لي بجنبي محاولة مني بش نهدي روحي ومانقومش نكسر الدنياا على راسها وراسو.. تلفتت على صوت صاحبتها بجنبي تحكي
مايا :" شنوة صاير بينك انت ولارين ؟"
عديت بيديا الزوز على وجهي نحكي
انا :" ماصاير شي "
مايا :" متأكد؟ يعني ماكمش متعاركين ؟"
انا :" لا علاش بش نتعاركو "
هزت بكتافها تحكي
مايا :" مانعرفش.. انا سالت خاطر حسيتكم مش كالعادة.. من لي وصلتو للمطار ماحكيتوش حتى كلمة مع بعضكم.. متجاهلين بعضكم.. خاصة رينو.. ماغزرتلكش جملا من بكري.. شنوة عملتلها عيسى ؟"
غزرتلها وتنهدت بالشوي نحكي
انا :" ماعندي ماعملتلها.... "
قصت عليا تحكي
مايا :" لا عملت.. وخليني نقلك انها عملة كبيرة زادة.. مدام لارين مطفيتك هكاا يعني انت جرحتهاا..انا لي نعرف رينو اكثر من اي حد.. رينو ماتوصل تتجاهل عبد كان مايكون وجعهاا وبرشة زادة.. خاصة ك تكون ماهيش غالطة ف حقو.. هي وقتها تبعد وهذا لي قاعدة نشوف فيه تو.. لارين بعدت عليك لدرجة انهاا مارضاتش تبقى معاك فرد كرسي.. عكسك انت لي من بكري تغزرلها ومركز معاها كيفاه تحكي مع الراجل ومغزل من فوق "
ضغطت على يدي بالقوي حاولت نهدي روحي شوي خاطر آخر حاجة نتمناها تو اني نسمع كلام كيف هذاا خاطر مانيش ناقص لي فياا مكفيني مانيش ناقص اي حاجة تزيد تاكدلي تفكيري وتخليني نعرف اني بلحق خسرتهاا.. نحكي
انا :" ك نوصلو تنجم تحكي مع صاحبتك.. انا ماعندي حتى كلام نقولو "
مايا :" تو تحكيلي صاحبتي.. اما قبلها خليني نقلك كلمتين.. انا مع لارين تو وراني مستحيل نسمحلك توجعهاا.. انا وقت خليتها معاك كنت مطمنة علاهاا خاطرني شفتها كيفاه مرتاحة معاك وفرحانة بيك.. اما ك رجعت تو ولقيتها بالحالة هاذي ندمت خاطرني آمنت علاهاا معاك.. لارين أقل حاجة تنجم تجرحهاا ماترهاش كيفاه تفدلك وتلعب هي كيف الطفلة الصغيرة هشة من داخل.. مالا كان عارف روحك كل مرة بش توجعهاا ابعد علاهاا.. خاطر راني نعرف لي عملتو فيها ف تونس قبل وكيفاه هي سامحتك تو.. اما ظاهر انت ماعرفتش قيمة السماح هذا ورجعت جرحتهاا اكثر حتى خليتها توصل تعمل هكاا.. عيسى لارين ماتستحقش هذاا.. هي مش حمل وجيعة أخرى.. يزيها لي شافتو قبل ماتزيدش علاهاا انت "
تلفتلها بالوقت وعقدت بحواجبي نحكي
انا :" شتقصد ب لي شافتو قبل ؟"
عدات بعيناها علياا وغزرت قدامهاا تحكي
مايا :" نقصد بموت نور.. غياب نور على لارين خلاهاا تتعذب.. "
رجعت غزرتلي تحكي
مايا :" اما لارين قتلي لقاتك انت عوضتلها شوي.. قتلي كيفاه حسبتك واحد من اهلهاا.. قتلي كيفاه حبت وجودك وارتاحتلك.. حكاتلي كيفاه حطتك سندها اكثر حتى من بوهاا..اما عالظاهر صاحبتي غلطت ك فكرت هكاا.. وننصحك ياعيسى صلح الغلطة هاذي وف أقرب وقت.. انا مانعرفش شنوة نوع العلاقة لي بيناتكم بالضبط.. اما كان لارين تعنيلك اي حاجة.. الحقها من تو.. قبل ماتبرد عليك وغشها ينسيها فيك وف الباهي لي عملتو معاها.. خاطر كان فات الفوت راو مهما تعمل وحتى كان تشعل صوابعك شمع لارين مش بش ترجعلك.. صاحبتي ونعرفها.. صحيح هي هشة اما راي قوية.. وضحكتهااا هذيكاا اكبر دليل على كلامي "
تلفتت بالوقت وين شفتها كيفاه قاعدة تفطر وتضحك مع لي بجنبها.. وجيعة غريبة حسيتها داخلي من شوفتها هكاا.. غير كلام صحبتها لي خلاني نسترجع انا شنوة عملت فيها وشنوة قلتلها.. للحظة حسيت روحي خفت من فكرة خسارتهاا.. مانيش متقبل فكرة انها تبعد على طول رغم اني كنت متمني هذاا.. قمت من بلاصتي فيسع ودخلت لتوالات.. قربت لسبالة وبقيت نغسل فوجهي برشة مرات بش ننسى لي صار اما مانجمتش.. هزيت راسي وغزرت لروحي ف المرايا مستغرب تفكيري فيها و ف شنوة قاعد نحس.. عمري ف حياتي ماتوقعت اني بش نخاف من خسارة عبد..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
