#عيسى_يحكي
خذيت نفس طويل ودخلت للعمارة بعد خالي.. عقدت بحواجبي مستغرب سكوتو طريق كامل.. عديت بعينيا عليه نحكي
انا :" خالي كان امي حذاك قلها هاني لفوق... "
قص علياا يحكي
جابر :" أقف قبل ماتطلع "
وقفت وتلفتلو نحكي
انا :" نعم خالي "
قربلي وعدا بعينيه عليا يحكي
جابر :" علاش ماحكيتليش لي صار؟ علاش نسمع لحكاية من نبيل ؟"
انا :" خالي انا ماحبيتش نقلك خاطرها بلحق حكاية تافهة.. وانت قداه من مرة تقلي ك تصير حاجة تصرف وانا تصرفت من غير مانشغلك "
هزلي براسو باهي يحكي
جابر :" باهي فهمني تو لحكاية "
عديت بيديا الزوز على وجهي نحكي
انا :" خالي مفما حتى حكاية.. لي صار حكيتو بكري "
جابر :" عاود احكيه.. اصلا وقتاه صارت لحكاية؟"
حكيت على لحيتي نحكي
انا :" نهار لي لارين جابتلناا لفطور للورشة.. وقتها عرضتها رقية وبقات تطلع وتهبط معاها ف الكلام "
عقد بحواجبو يحكي
جابر :" شنوة قالتلها ؟"
انا :" مانتفكرش.. قالتلها هزلي القفة اختك رانية ك تعرضني تهزها وتسلم عليا مش كيفك.. عاد لارين ماسكتتلهاش "
حل عينيه فيا يحكي
جابر :" شنوة تهزلها القفة هاذي ؟ ف بالها بنتي تخدم عندها؟؟ ورانية فاش قام حتى تهزلهاا قفتهااا "
حطيت يدي على زندو نحكي
انا :" خالي بالشوي اهدا.. لحكاية وفات وانا جاوبتها وفهمتهاا قدرهاا.. وهي معادش بش تقلق لارين تهنى"
تنهد بالقوي يحكي
جابر :" عيسى عينك على لارين ف غيابي.. هي ماتعرفش الحومة مليح ماتخلي حد يقربلهاا وحكاية نبيل وعايلتو تو انا نتصرف فيهاا بش نعلمهاا كيفاه تحكي مع بنتي "
انا :" والله ياريت خاطر انا مانحبش نطيح لقدر اما هوما ماحبوش يحشمو على رواحهم.. هاك ريتو كيفاه موقفنا قدام الجامع بش يحكي فحديث نساء "
جابر :" تو غدوة نمشي ونرجع انبه عليه..و هي ماتكلمهاش تو نحكي مع غالية توصيها تبعد على بناتي الزوز.. ماهمش يخدمو عندها هذاكا لي مازال يهزولهاا قفتهاا "
انا :" باهي خالي "
جابر :" عيسى لي صار تو من غير ماتجبدو قدام لارين بش ماتتحيرش "
انا :" اي اطمن من غير ماتوصي "
جابر :" عيش ولدي.. هياا اطلع ارتاح "
هزيتلو براسي باهي وطلعت معاه حتى وصلناا قدام باب دار.. غزرلي يحكي
جابر :" تصبح على خير.. وغدوة تعدالي لعشية نمشيو نشريو الخبز مع بعضنا "
تبسمت نحكي
انا :" باهي خالي انشالله "
ضرب على كتفي بالشوي ودخل.. تنهدت بالشوي وطلعت طول للدار..دخلت وسكرت الباب وراياا وين لقيت الدار ظلمة عرفت امي رقدت تحت.. شعلت الضو ودخلت طول للبيت نحيت الجبة حطيتها على جنب ولبست سروال خفيف ودخلت لتوالات غسلت حالتي وريقلت أموري لكل ورجعت للبيت.. تسطحت عالفرش وبقيت نغزر قدامي نخمم فحكاية نبيل وولدو لي بقيت نغلي منهم وكان لقيت بكري راني خبطتهم الزوز ف بعضهم بش نربيهم.. اصلا مانيش عارف علاش عملو هكاكا ولا على شنوة ناويين.. اما حسابهم معايا الزوز خلي مازلت نرا واحد فيهم موقف حد من العيلة هكا اصلا انا مازلت مابردتش عليه اكا صابر ونستنالو ف غلطة أخرى برك وقتهاا مايفكو من يدي كان ربي سبحانه.. حطيت يدي وراء رقبتي وبقيت نغزر قدامي نخمم من حكاية لحكاية حتى لين طلع النهار..قمت من بلاصتي ومشيت لتوالات توضيت ورجعت للبيت لبست مريولي وحطيت السجادة صليت الصباح وقريت شوي قرآن وقمت رجعت للفرش.. تسطحت وغمضت عينيا وين غفيت بالوقت.. رجعت حليت عينيا على صوت تاليفوني لي نوقز.. عديت بيديا الزوز على وجهي وغزرت للوقت وين لقيت العصر قريب.. هزيت روحي شوي وتكيت بظهري لتالي هزيت التاليفون ورديت عليه نحكي
انا :" شتحب ؟"
ادم :" الله الله راقد لتو.. صيامك مش محسوب هكا "
نفخت بالشوي نحكي
انا :" ادم مانيش ناقصك شتحب ؟"
ضحك يحكي
ادم :" ومرمضن زادة.. قلي على شنوة حششت على قهوة ولا سيقارو "
رسيت على سنيا بالقوي نحكي
انا :" بش نعلق راني "
ادم :" باهي برك وسع بالك.. كلمتك بش نقلك اهبط هاني حليت الورشة "
انا :" علاش تحل فيها من تو ؟ "
ادم :" قلقت فالدار والنوم طار.. هياا اهبط نقعدو شوي ونطلعوا مع بعضناا خاطر نحشم نطلع وحدي "
نفخت بالقوي نحكي
انا :" لوقتاه بش تبقى وراياا انت "
ادم :" لين شعرك يشيب وسنيك تطيح وظهرك يميل "
ضحكت نحكي
انا :" ربي يصبرني "
ادم :" هياا نستناك "
علقت عليه وقمت من بلاصتي نحيت مريولي وخرجت من البيت.. دخلت لتوالات نحيت حوايجي ودخلت تحت الماء عملت دوش خفيف وخرجت توضيت ورجعت للبيت.. صليت الظهر والعصر لي اذن وقريت شوي قرآن وقمت.. بدلت حوايجي وهزيت تاليفوني مفاتحي وخرجت.. عديت بعينيا عالدار مستغرب امي لي ماروحتش.. خرجت وهبطت لدار خالي قبل.. حليت الباب لي كان مردود ودخلت وين قابلتني امي ف الكوجينة ومعاها ماياا.. نحكي
انا :" السلام عليكم "
تلفتتلي وقربتلي تحكي
غالية :" وعليكم السلام يابابا "
بستها من راسها وغزرت لمايا تحكي
مايا :" اهلا عيسى "
تبسمت وهزيتلها براسي اي وغزرت للامي نحكي
انا :" ياخي شبيك ماروحتش امي ؟"
غالية :" بقيت نقرأ ف القرآن لين خذاتني عيني.. سامحني خليتك وحدك ياروحي "
انا :" ميسالش غاليتي "
غالية :" قلي شنوة شاهي لشقان الفطر "
انا :" كل شي من يديك نحبو"
غالية :" عيشلي ولدي ياربي.. مالا تو نحضر لولدي سلاطة مشوية وبريكتك كالعادة "
انا :" عيش امي.. وينو خالي ؟"
غالية :" شوفو فالصالة "
هزيتلها براسي باهي ومشيت للصالة طول وين لمحتها هي قاعدة.. تبسمت من غير مانشعر اول ماقربت حذاها وشفتها كيفاه راقدة بالقعدة وراسها مايل.. تنهدت بالشوي وقربتلهاا بش نفيقها حتى رقبتهاا ماتوجعهاش من بعد..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
