#لارين_تحكي
عديت بيديا الزوز على وجهي وغزرت قدامي.. عقدت بحواجبي مستغربة مايا لي كانت واقفة مقابلتني ومربعة يداها.. قربتلها شوي نحكي
انا :" شبيك تغزرلي هكا ؟"
هزت بحاجبها تحكي
مايا :" رينو شنوة لي عملتو عالطاولة بكري؟"
عديت بعينيا عليها وقربت للفرش.. قعدت عالحرف نحكي
انا :" شعملت انا ؟"
قربتلي وقعدت بجنبي تحكي
مايا :" ياخي ماريتش روحك كيفاه على عصابك.. لمرا تقول كلمة وانت تشعل فيها ؟"
رجعت شعري لتالي نحكي
انا :" لمرا هذيكا تغزلني.. كلامهاا يوترني نحسو كيف الشوك على لمحي.. نكره صوتها وغزرتهاا "
شدتني من يدي وكبست علياا تحكي
مايا :" باهي هي وعاذرتك علاش تعمل هكاا معاها.. وجابر شبيه؟ ساعة هاني نشوف فيه كيفاه معاك.. علاش انت تكرهو هكا "
ضميت على شفايفي شديت دمعتي بالسيف نحكي
انا :" مانكرهوش والله.. تعرف ماياا انا قبل رجوعي لفرنسا بنهار.. قررت اني نعطي فرصة لجابر.. وقتها عديت معاه نهار كامل.. طيبنا مع بعضنا.. حضرنا الطاولة مع بعضنا.. ضحكنا وفدلكناا.. وقتها قررت اني بش نعطيه فرصة ونتقربلو..قتلو راني بش نرجعلك.. بش نرجع على خاطرك.. كنت نستنى وقتاه نرجع بش نشوفو كان وفى بوعدو لياا وبدلي البيت ولا نساني.. اما تو لقيت روحي تراجعت على هذا لكل"
مايا :" علاش تراجعت ؟ ياخي ريت منو حاجة.. سمعت حاجة؟"
هزيتلها براسي لا نحكي
انا :" لا.. اما انا خايفة ماياا.. وليت خايفة من الناس.. كل حد نعطيه ثقتي يكسرني..كل حد نصدقو يبكيني.. اولهم إلياس.. صدقتو ودخلتو انا لحياتي ياخي ريتو شعمل فياا.. خلاني عايشة مرعوبة لتو.. خلاني وحدة مريضة نخاف حتى من الباب ك يتسكر علياا.. من جرتو انا كرهت بلاد كاملة.. وبعدها جا عيسى... "
شهقت بالقوي وين دموعي نزلو نحكي
انا:" كيفكيف انا لي دخلتو لحياتي..انا لي قربتلو بساقياا.. غمضت عينيا ووثقت فيه.. مشيت وراه ك البوهالية وصدقت وعدو ليا..خلاني نقول معايا عيسى مايصيرلي شي.. معايا عيسى مانخافش..ياخي شصار ؟ كيفكيف وجعني.. خلاني نحس روحي وحدة رخيصة جرات وراه ولصقت فيه.. خلاني نكره روحي ونكره النهار لي عرفتو فيه.. خلاني ناكل صوابعي من الندم.. خلاني نحس روحي وحدي غادي.. خلاني نوصل نشكي لعبد غريب عرفتو نهارين.. خلا عبد مازال ك عرفني هو لي يواسيني.. ضربة عيسى كملت على ضربة إلياس.. الزوز خلاوني نتربى بش معادش نصدق حد ولاناثق فيه حتى لو يكون جابر.. خاطرني مانعرفوش.. مهما يعمل معايا باهي.. انا رجعت نشوف فيه الراجل لي سلم ف مرتو قبل وهانت عليه وهذا انا مانجمش ناثق فيه.. صحيح ممكن انا متغششة تو.. اما من روحي.. قبل عيسى وقبل إلياس وقبل جابر وسميحة..وغشي هذا لي مخليني نعمل هكا.. وصدقني مانحبش غشي هذا يطفى ويخمد.. نحبو يبقى شاعل فياا بش مانرجعش نغلط... "
طبست راسي وطرشقت بالبكاء نحكي
انا :" مايا انا معادش نحب حد يوجعني.. معادش نحب حد يبكيني.. انا عمري لا ضريت عبد.. علاش انا نهون علاهم مش عارفة.... "
غمضت عينيا على يداها لي جبدتني.. عنقتني بالقوي وين حشيت راسي ف صدرها.. كبست علياا تحكي
مايا :" اللطف على اختي.. انا معاك والله لا نخلي حد يبكيك ولا يوجعك.. إلياس حكاية ووفات ومعادش بش يرجع "
ضميت على شفايفي وقت تفكرت لي صار ومكتوب إلياس لي مازلت ماحكيتش علاهم لمايا.. ضمتني أكثر تحكي
مايا :" وعيسى شيهمك فيه.. ياخي وقتاه عرفتو انت حتى توصل تبكي عليه.. نهارين وتو تنساه.. وكانك على جابر اعطيه فرصة واسمعو مانيش بش نقلك تو اما اول ماتلقى روحك حاضرة اسمعو..وكان ماتحبش زادة مش لازم.. المهم ماتخلينيش نشوف دموعك رينو "
دورت بيديا عليهاا نحكي
انا :" مايا انا والله تاعبة.. نحب نرتاح..نحب ناقف على ساقياا.. نحب نكمل حياتي بعيدة علاهم لكل.. مانيش طالبة حاجة صعيبة.. نحب نرجع نعيش مرتاحة كيف قبل وانت معايا "
بعدت علياا شوي وحاوطتلي وجهي.. مسحتلي دموعي وغزرتلي ف عينيا تحكي
مايا:" نوعدك هذا لكل بش يصير.. انت بش ترتاح بش يجي وقت وبش نبعد انا وياك من هناا.. خلينا ساعة ناقفو على ساقينا.. ونخممو شنوة بش نعملو.. احنا تو فعطلة خلينا نسميوها هكا..فترة وبش تتعدا.. وبعد بش نخرجو من هناا.. كان بش تبقى مركزة ياسر وتقول مانحبش نبقى راك بش تتعب.. رينو انت لازم تتقبل وجودك هناا.. تحب ولاتكره هاذي دار بوك.. وصدقني انا متأكدة انو جابر باهي.. فما فرق كبير بينو وبين بابا انا لي نبدأ قاعدة معاه فرد طاولة ومايسالش علياا.. انت جابر بكري ماهبطش عينيه من عليك.. ريتو كيفاه فرحان بيك واكا حدو..خذا بخاطرك فوق من قلبو بش مايخسركش..مالا انت حاول ماتخسروش.. عالاقل تفكر وصية نور ليك "
خذيت نفس طويل وعديت بعينيا عليهاا..دورت بيديا عليهاا وعنقتهاا من غير حتى كلمة.. غمضت عينيا على يداها لي بقات تمسح على شعري وين حسيت روحي ارتحت شوي بين يداها غير كلامها لي حسيتو هداني شوي وخلاني نرجع نخمم ف تصرفاتي متاع بكري وشنوة بش نعمل ف المستقبل.. باستني من راسي تحكي
مايا:" خير شوي تو ؟"
بعدت علاها وتبسمت نحكي
انا :" انا شنوة كان بش يصير فياا من غيرك "
عدات بعيناها علياا وضحكت تحكي
مايا:" ف الأصل السؤال هذا ليا انا.. انا لي شنوة كان بش يصير فياا من غيرك يانور ياصغيرة انت "
تبسمت على كلمتها الأخيرة لي عندي قداه ماسمعتهاش ورجعت عنقتهاا.. غمضت عينيا وبقيت مستحلية لحضنها لي خلاني نرتاح..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
