#لارين_تحكي
حطيت الساك لي جابتهالي عمتي على جنب وتلفتت لمايا لي كانت تنشف ف شعرها نحكي
انا :" بقات الساك هاذي تو نفرغوها غدوة.. انا تعبت "
هزتلي براسها اي تحكي
مايا :" اي حتى انا تعبت.. كان نلقى نرقد تو "
ضحكت وقربتلها خذيت المنشفة من يداها ووقفت وراها انشفلها ف شعرها نحكي
انا :" مفماش نوم.. بش نتعشاو وخارجين "
غزرتلي من لمرايا وتبسمت تحكي
مايا:"Joseph من بكري وهو يطلب ك انت فالدوش "
انا :" تو نكلمو بعد "
هزتلي براسها باهي وبقيت انشفلها ف شعرها حتى كملت.. خذات المنشفة من يدي تحكي
مايا :" ايا كمل حضر روحك انت زادة "
هزيتلها براسي باهي وقربت وين الخزانة.. جبدت منشفتي ومعاها روبة بروتال خفيفة فالأحمر طويلة شوي وفيها فونت على جنب نحكي
انا :" ناخذ دوش انا زادة فيسع ونجي "
هزتلي براسها باهي وخرجت فيسع.. دخلت لتوالات سكرت الباب ورايا وبقيت انجي ف حوايجي.. دخلت تحت الماء الدافي عملت دوش خفيف وخرجت.. لبست روبتي بعد مانشفت بدني وكملت ريقلت أموري لكل.. عضيت على شفايفي اول ماوقفت قدام لمرايا وشفت الضربة لي فخدي لي كنت مخبيتها بالمكياج ومنزلة فوقها شعري ظهرت..عديت بصوابعي عليها وين تفكرت لي صار لكل مرة أخرى.. شنوة هي عملت فياا وكيفاه هو كمل علياا بعدها.. خذيت نفس طويل وتلفت لميت التوالات ورجعت فيسع للبيت وين شفت مايا غيرت حوايجها تستنى فياا.. تبسمت تحكي
مايا :" صحة رينو "
حطيت المنشفة على جنب نحكي
انا :" يعطيك الصحة ياروحي "
ضيقت عيناها فيا وقربتلي فيسع.. عدات بصوابعها على خدي تحكي
مايا :" شنوة الضربة هاذي؟.. شبيني ماريتهاش بكري"
بلعت ريقي وبعدت علاها.. وقفت قدام لمرايا وبقيت انشف ف شعري نحكي
انا :" جرح صغير..."
قصت عليا كيف شدتني من مرفقي ودورتني قدامها.. حلت عيناها فيا تحكي
ماياا :" هو ضربك ؟؟ هو جرحك هكا ؟؟"
هزيتلها براسي لا نحكي
انا :" لا... "
رجعت قصت عليا تحكي
مايا :" لارين ماتكذبش.. كان هو لي ضربك قلي وانا نعرف كيفاه نتصرف معاه "
انا :" ورحمة نور مش هو.. هاذي حكاية اخرى.. بعد تو نحكيهالك "
قحرتلي تحكي
مايا :" انت شديتني من الصباح بعد نحكيلك بعد نحكيلك وانا هاني صابرة.. اما شوف اول مانروحو بعد بش تقعد وتحكيلي خير مانمشي ليه هو "
هزيتلها براسي باهي وتبسمت نحكي
انا :" باهي تو نحكيلك.. شبيك تخرنن ياسر "
عوجت شفايفها وترمات عالفرش.. تبسمت ورجعت غزرت قدامي نكمل نحضر ف روحي.. هكاكا وسمعت صوت رانية تحكي
رانية :" رينو هياا لعشا حاضر "
انا :" هاني جاية "
فردت شعري وهبطتو غطيت الضربة وتلفتت لمايا لي وقفت نحكي
انا :" هياا خلينا نخرجو "
هزتلي براسها باهي وخرجنا مع بعضنا.. اول ماخرجت وتلفتت شفتو كيف خرج من الصالة وهز راسو معايا.. دورت وجهي فيسع وتعديتو.. جبدت الكرسي لمايا لي قعدت بالوقت.. ضغطت على يدي بالقوي كيف ريتو قعد مقابلني وين حسيت روحي تسقمت قبل ماناكل.. تلفتت لجابر لي قعد بجنبي.. غزرلي يحكي
جابر :" والله تووين حسيت باللمة.. شوف قلت لعمتك تعملك كل حاجه انت تحبها.. نحبك تتعشى وتهز صحتك.. خاطر حسيتك ضعفت "
دوب تبسمت نحكي
انا :" لا ماضعفتش.. بالعكس "
قرصني من خدي يحكي
جابر :" اسكت واسمع لكلام "
تلفتت لعمتي لي خرجت من الكوجينة وحطت الكسكسي ف الوسط تحكي
غالية:" هياو بسم الله مدامو سخون.. رينو حضرتلك الطاجين لي تحبو "
كبست عالمغرفة لي كانت ف يدي اول ماغزرت لطبق الطاجين لي كان قدامي.. نحكي
انا :" يعطيك الصحة عمتي "
قعدت بجنب ماياا وغرفتلها تحكي
غالية:" مايا بنتي نحبك تاكل من غير ماتحشم.. واي حاجة تشتهاها قلي علاهاا انا نعملها لبنتي "
تبسمت ك شفت ضحكت ماايا تحكي
مايا :" عيشك عمتي.. ريحة ماكلتك تهبل.. جوعتني "
غالية:" صحة لبنتي.. ايا تعشى "
غزرت لسميحة لي خلطت وحطت السلاطة المشوية تحكي
سميحة :" وهاذي انا زادة عمتك حضرتها تعرفك تحبها انت وعيسى "
هزيتلها براسي باهي وتبسمت نحكي
انا :" يعطيها الصحة.. ربي يخليك ليا عمتي "
عطاتني صحني لي كان معبي بالكسكسي وفيه لحمة كبيرة تحكي
غالية :" شد ماما تعشى "
خذيتو من يداها وطبست راسي ناكل من غير حتى كلمة.. هزيت راسي مع سميحة تحكي
سميحة:" مايا انشالله عجبتك ماكلتناا..مانعرفوش انت ب شنوة متعودة ولا رانا حضرنالك حاجة ليك "
مايا :" انا متعودة بماكلتكم زادة.. نور كانت تحضرلناا نفس الاطباق هاذم.. من لي انا صغيرة وانا ناكل ف الماكلة التونسية "
ضميت على شفايفي شديت دمعتي لي هدت عليا اول ماسمعت اسم نور.. ريتها كيف عوجت شفايفها تحكي
سميحة :" ايا باهي.. وقلي تعرفي تطيبي ولا لا ؟"
حطيت لمغرفة وقحرتلها نحكي
انا :"علاش السؤال هذا؟ ناويتها هي تصير تطيبلك ؟"
ريتهم كيف هزو رؤوسهم معايا وغزرولي.. هزت بحاجبها تحكي
سميحة :" لاا انا سالت عادي.. قلت بالك حتى هي تحب تتعلم كيفك.. هاك حتى كيف كنت بعيدة ضربة ضربتين تطلب ف عمتك تسأل على طاجين الملسوقة.. قلت بالك كان هي تحب تتعلم تو نعلمهاا "
ضغطت على يدي بالقوي من كلامهاا لي زاد خنقني نحكي
انا :" لا هي ماتحبش تتعلم..وانا معادش بش نتعلم.. سافا هكاا ؟"
خذيت نفس طويل وتلفتت لجابر لي شدني من يدي يحكي
جابر :" رينو بنتي شبيك تغششت ؟"
خذيت كاسة الماء شربت نحكي
انا :" لا ماتغششتش "
طبطب على يدي يحكي
جابر :" باهي كمل عشاك "
هزيتلو براسي باهي وتلفتت وين شفتو كيفاه غزرلي وطبس راسو..لحظتهاا شديت دمعتي بالسيف وقت تفكرت انا كيفاه كنت بوهالية ك حبيت نتعلم على خاطرو غير شنوة حضرت وقتهاا..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
