#لارين_تحكي
تململت عالفرش وحليت عينيا..غزرت للوقت وين لقيتها 5.. نفخت بالشوي وهزيت روحي.. عديتها ليلة كاملة نتقلب رقدت قريب الفجر أقل من ساعتين وقمت من لعصب.. بعدت الملحفة من فوقي وقمت.. خرجت طول للبلكونة وقعدت نغزر لشمس لي بدأت تطلع.. تكيت بظهري لتالي واسترجعت لي صار لبارح معاه.. بلحق معادش فاهمتو جملا..كنت نقول ميسالش يتغشش خاطر عندو الحق.. اما لبارح مش فاهمة علاش تقلق هكاكا..اصلا انا ماقلت شي عيب.. خلاني نشك ف تصرفاتي ونخمم إذا قلت كلمة غالطة ولا عملت حاجة ماتجيش اما ماوصلت لشي كان انو يتسبب..مش عارفة علاش تصرفاتي تقلقو لدرجة هاذي.. لبستي وفهمت علاش خاطر مايحبش حد يغزرلي اما شنوة لي يقلقو ف كلامي مع خالد ولا ضحكي.. عديت بيديا على شعري وفركتو بالقوي من الغزول كيفاه حتى ماهانش عليه يرضيني.. خلاني نرقد مغزلة وهو سيادتو نسمع فيه ك ساهر مع خالد لقريب الفجر..نفخت بالقوي برشة مرات وقمت.. رجعت لبيتي وقربت للفاليز جبدت روبة بيضاء طويلة ودخلت لسالدوبان عملت دوش خفيف وخرجت لبست الروبة وريقلت أموري ورجعت للبيت.. لبست صندالي وهزيت تاليفوني والكيت وخرجت خاطر تخنقت ف البيت حبيت نتنفس شوي ونحاول ننسى لي صار لبارح خاطر عارفة مازال فما عرض آخر ليوم منو.. مالا نوفر طاقتي خير.. نزلت فيسع وخرجت بش نتمشى شوي قدام الشالية عالشط ونرجع فيسع..
حطيت الكيت فوذنياا ونحيت صندالي..اول ماقربت لشط تبسمت كحسيت بالنسمة لعبت بشعراتي.. عديت بعينيا عالبحر لي كان فارغ وموجتو هادية وصافية.. قعدت عالرمل ومديت ساقياا وين الماء دغدغني.. تلفتت ورايا وين شفت لي يفطرو ف الريستو ولي يجريو عالشط.. رجعت غزرت قدامي وسرحت مع صوت فيروز وين حسيت روحي هديت شوي.. مانعرفش قداه تعدا علياا وقت وانا قاعدة هكاا سارحة كل مرة ف حكاية اما اغلب تفكيري كان فيه هو..خاطر بلحق على قد مانحب وجودو على قد مانكره عياطو علياا كيما لبارح خاصة لي ماعندوش مبرر.. تنهدت بالشوي وقمت من بلاصتي بش نتمشى شوي ونرجع للشاليه قبل ما يفيق هو.. نحيت الكيت وبقيت نمشي ونلعب ف ساقياا عالماء.. وقفت عالشط نغزر للبنات لي كانو يعومو ويضحكو.. بقيت واقفة هكاكا سارحة معاهم ماحبيتش نرجع تو.. فقت من سرحتي على صوت لي نعرفو مليح..
جيهان :" صغرونة ؟ انت هاذي ؟"
حليت عينيا على وسعهم اول ماسمعت الكلمة.. تلفتت بالوقت وراياا وين شفتها هي نفسهاا..عديت بعينيا عليها مش مصدقة انو هي واقفة قدامي تو..ضحكت تحكي
جيهان :" والله وطلعت انت.. تعرف ريتك من بكري من بعيد وشبهت عليك.. لين جيت توقلت نشوف كان انا غالطة ولا صحيحة.. اما طلعت صحيحة "
بقيت واقفة نغرزلها ساكتة من غير حتى كلمة..خاطر مالقيت مانقول..آخر عبد كنت نتمنى نراه هي المنظر هاذي.. عديت بعينيا عليها نغزرلها كيفاه لابسة مايو عريان.. عدات بيداها قدام وجهي تحكي
جيهان :" صغرونة تسمع فياا "
قحرتلها نحكي
انا :" ماتقليييش صغرونة "
ضحكت تحكي
جيهان :" باقي على عصابك.. ساعة ماتوقعتش نراك هناا.. قلي شتعمل ؟"
انا :" حسب رايك؟ الواحد ك يجي هناا شيعمل "
عدات بعيناها علياا تحكي
جيهان :" شبيك وحدك؟"
انا :" كنت وحدي.. قبل ماتجي انت تقلقني "
ضيقت عينياها فياا تحكي
جيهان :" خوك وينو؟"
رسيت على سنيا بالقوي نحكي
انا :" ماهوش هناا.. جيت وحدي "
جيهان :" خسارة.. ولا راني سلمت عليه..ايا شرايك تجي تفطر معايا.. الريستو هذاكا ماكلتو بنينة..ومولاه صاحبي "
حليت عينيا على وسعهم اول ماريتها اشرت على ريستو خالد.. هزيت بحاجبي نحكي
انا :" شكون صاحبك ؟ قصدك خالد ؟"
هزتلي براسها اي تحكي
جيهان :" امم..تعرفو؟ "
رسيت على سنيا بالقوي من لعصب لي كملتهولي هي.. يعني ناقصة انا.. هزيتلها براسي اي نحكي
انا :" اي نعرفو "
جيهان :" قلي وين قاعدة؟"
انا :" ياخي شدخلك فياا.. من بكري وانت تسالي "
جيهان:" ريتك وحدك حبيت نونسك..ديما لسانك طويل هكاا "
انا :" حد ماطلب منك تونسني..تنجم تمشي"
ضحكت تحكي
جيهان :" هههه باهي هاني ماشية..اما بش نتقابلو مرة اخرى مدامنا فرد بلاصة "
عضيت على شفايفي ك تفكرت كلام خالد لبارح انو فما شكون من صحابو بش يجي ويبقاو حذانا نحكي
انا :" ياخي وقتاه جيت انت؟ خاطر ماريتكش لبارح"
جيهان :" وصلت الفجر "
انا :" ووين قاعدة ؟"
جيهان:" ف الاوتال هذاكا "
خذيت نفس مرتاح ك عرفتها مش حذانا.. قحرتلها نحكي
انا :" مانا ماشية "
جيهان:" سلملي على خوك "
قحرتلها نحكي
انا :" مايوصلش "
ضحكت وغزرتلي درا كيفاه ساكتة.. هزيت بحاجبي وتبسمت نحكي
انا :" صحة الكوب.. عجبتني "
قحرتلي تحكي
جيهان :" شفع فيك خوك وقتهاا "
هزيتها وحطيتها بعينيا وتبسمت على جنب من غير مانجاوبها.. عطيتها بظهري راجعة للشاليه وانا مغزلة منهاا.. كيفاه تغزرلي غير انها كبشت تسال على خويااا لي هو اصلا مش خوياا.. مانعرفش علاش تسال عليه ولا شتحب منو.. اصلا آخر حاجة توقعتها تطلع هي من صحاب خالد.. للحظة حسيت روحي ندمت كِجيت خاطر وجودها نحسو يغزرلي خاطرني مابردتش علاهااا يكفي كلمة صغرونة لي تنرفزني.. اول ماهزيت راسي جمدت فبلاصتي وانا نغزرلو كيفاه جاي ناحيتي ووجهو مقلوب.. تلفتت ورايا وين شفتها مازالت واقفة مامشاتش.. بلعت ريقي بالسيف ورجعت غزرتلو قدمت الخطوة بالسيف خاطر عارفة بش يعاركني كيفاه خرجت.. اصلا جرتها حرفة شدتني بالحديث عطلتني ولا راني رجعت من بكري..
VOUS LISEZ
#مُتمردة_العيسى ❤️🔥 (الستاتي الثاني)
Lãng mạn#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
