#عيسى_يحكي
وقفت ف بلاصتي اول ماسمعت صوتها كيفاه كان يرجف.. خرجت فيسع من الماء نحكي
انا :" باهي ماتخافش.. هانا خرجنا "
تنهدت بالشوي ك لقيتها مازالت حاشية راسها فرقبتي.. حطيت يدي فوق يداها لي كانت دايرة علياا وطبطبت علاها نحكي
انا :" لارين..قتلك ماتخافش هانا خرجنا من الماء "
حسيت بيها كيف حركت راسها وين حسيت بالنفس متاعها فرقبتي تحكي
لارين:"والله لا عاد نفدلك معاك..سيبني خليني نهبط "
تنهدت بالشوي ووخرت ظهري لتالي وين هي هبطت.. عقدت بحواجبي مستغرب اول ماتلفتت وشفت وجها لي كان احمر وعيناها بالدموع نحكي
انا :" ياخي تبكي ؟"
عدات بيداها على وجهها تحكي
لارين :" شيهمك فيا..تعرفني نخاف من البحر مدخلني هكاكا ؟"
انا :" هاني معاك ياخي كنت بش نسيبك انا؟"
لارين :"مانعرفش عليك..خفت لاتسبني خاطرك تغششت "
قحرتلها نحكي
انا :" مخك ياسر صغير "
خلطت عليا وبقات تمشي بجنبي.. شوي وسمعتها تحكي
لارين :" تعرف انا صحيح مانعرفش نعوم اماماكنتش نخاف هكا.. لي صار آخر مرة خلاني معادش نحب حتى نحط ساقياا فالماء "
انا :" لي صار آخر مرة ماهوش بش يتعاود..ماتخليش روحك خايفة هكاا ديما..وزيد لازمك تتعلم تواجه خوفك..كان كل حاجة تخاف منها تبطلها هكاحياتك بش تاقف "
عدات بعيناها علياا وغزرت قدامهاا وبقات تمشي ساكتة.. شوي وسمعتها تحكي
لارين:" تعرف..انا عامين لتالي كنت ناوية ندخل نترانا كراتي وتيكواندو..حبيت نتعلم ندافع على روحي..اما وقتهاماكنش عندي فلوس "
انا :" علاش خممت هكا ؟"
لارين:" شنوة علاش ؟"
انا :" يعني كنت قاعدة قلت بش ندخل نتعلم ندافع على روحي ؟ ولاصارت حاجةخلاتك تخمم هكا ؟"
عدات بعيناها علياا وغزرتلي درا كيفاه.. ضيقت عينياا وبقيت نغرزلها كيفاه ترمش فعيناها.. رجعت شعرها لتالي تحكي
لارين :" ماصار شي.. اما نتصور باهي كالطفلة تتعلم تدافع على روحها..يعني كان جيت تعلمت راني دافعت على روحي وماخليتوش يدزني فالماء"
كبست عالبونية متاعي اول مارجعت تفكرت لي صار وين زدت غزلت من خالد لي ماكلمنيش لتو..اول ماوصلنا قدام الدار.. وقفت قدام الطاولة لي كانت على جنب خذيت العصير لي حطيتو الصباح.. سكبتلها شوي فكاستي وعطيتهالها نحكي
انا :" اشرب شوي.. وايجاا "
لارين :" وين نجي زادة؟ مازلنا بش نجريو ؟"
علمت رشفة من الدبوزة طول وغزرتلها نحكي
انا :" بش نتراناو شوي "
حلت عيناها فيا وضحكت تحكي
لارين :" احلف والله؟"
حطيت دبوزة العصير بعد ماكملتهاا نحكي
انا :" فيسع "
هزتلي براسها باهي وبقات تشرب.. قربت خذيت المنشفة مسحت وجهي ورقبتي وغزرتلها كقربتلي تحكي
لارين:" نبداو "
وقفت قدامها نحكي
انا :" باهي نحبك تركز معايا.. وانسى انك تعرفني..لي بش نطلبو منك تعملوو"
ضحكت تحكي
لارين:" بش نضربك مش هكا ؟"
قحرتلها ووخرت لتالي شوي نحكي
انا :" اول حاجة لازمك تعرفها هي نقاط الضعف لي موجودة فكل عبد كيما.. العينين.. الخشم.. الرقبة.. الصدر وركايب والكعبة متاع ساقيه..وتوبش ناقف قدامك ووريني كيفاه بش تبعدني "
لارين :" باهي اما سايسني امان "
قربتلها فيسع ودورت بيديا وراء ظهرها جبدتهاا عندي نحكي
انا :" امشي "
هزت راسها معاياا وغزرتلي تحكي
لارين:" ابعد شوي يدي وحلت كيفاه بش نضربك ؟"
انا :" قتلك تصرف على اساس ماتعرفنيش..مانحبش حديث وريني فعل "
بقيت نغزرلها كيفاه ضامة على شفايفها وتدز فياا.. نحكي
انا :" تبع كلامي..اطلع على طراطيش صوابعك واضربني بجبينك على خشمي.. انا وقتها بش نبعد اما شوي لحظتهاا انت استغل الفرصة واضربني بركبتك على كرشي"
عدات بعيناها علياا وطلعت بالوقت.. وخرت راسها وضربتني بالشوي..بعدت علاها بالوقت وين طلعت ركبتها وضربتني على كرشي بالقوي.. حليت عينيا على وسعهم وانا نغزرلها كيفاه تضحك وتنقز تحكي
لارين :" يااا ساااهلة طلعت..هيانعاودوهااا امان "
انا :" لا بش نعملو حركة أخرى..وريني شتعمل كواحد يشدك هكا "
قربتلها فلحظة وشديتها من معصم يداها نحكي
انا :" تحرك "
تبسمت ك شفتها تضرب فيدي بيداها لخرى تحكي
لارين :" سيبني "
انا :" هكاا ماهوش بش يسيبك.. اعمل كيما نقلك.. دور يدك ف اتجاه صبع يدي لكبير وقتها يدي بش تتلوى ونسيبك امشي "
نزلت على يداها بالقوي وخليتها تجرب.. ريتها ك ضحكت اول مافكتلي يدي من يداها تحكي
لارين :" ربحتتك "
عديت بعينيا عليها من غير حتى كلمة وفلحظة كنت وراها..دورت بيديا على صدرها وجبدتها عندي وين هي شهقت بالقوي تحكي
لارين :" بالشوي يامجودر "
كبست علاها بالقوي نحكي
انا :" ماتنساش انك ماتعرفنيش.. وانا معادش نعرفك مالا رد بالك تتقبح.. وتو وريني كيفاه بش تبعدني "
لارين:" يدي مربوطة..ارخف يدك امان "
انا :" تبعني.. بش تعمل كيما المرة لولى..اما المرة هاذي بش توخر لتالي.. تطلع على طراطيش صوابعك وتضربني براسك على خشمي واول مانبعد عليك تضربني بكوع مرفقك على صدري.. واضح "
هزتلي براسها اي ووخرت لتالي.. غمضت عينيا بالقوي على راسهاا لي ضربني بالقوي كاني تستنى فيهاا.. اول مابعدت هدت علياا وضربتني على صدري.. لحظتها شديتها من يداها جبدتها عندي وين تضربت فصدري.. عديت بعينيا على وجهها لي كان احمر نحكي
انا :" من اولها بش تتقوى على روحك ؟"
لارين:" ماتقليش غلبتك ؟"
طبست علاهاا شوي وعديت بعينيا عليهاا نحكي
انا :" انا بش نعلمك كيفاه تغلب حد فغيابي.. اماانا مستحيل تغلبني..واضح"
دورتلها يداها وراء ظهرها وقربتهاا ليااا وين حسيت بنفسها ف وجهي..عديت بعينيا عليها وركزتهم على شعرها لي كان لاصق فوجهها غير شوافر عيناها لي كانت ترمش فيهم...
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
