#لارين_تحكي
نطرت مرفقي منو ووخرت بخطواتي لتالي.. حليت عينيا على وسعهم فيه نحكي
انا :" الف مرة نقلك معادش تمسني.. كل مرة وانت طالع ف وجهي ويديك شادة ف مرفقي "
عدا بعينيه عليا ورس على سنيه وقحرلي يحكي
عيسى :" ياخي شكون لي طلع ف وجه شكون.. وزيد شديتك بش ماتتكبيش على منظرك "
قحرتلو نحكي
انا :" علاش ترا فياا معاقة بش نتكب.. ابعدني انت برك وانا نعرف نمشي وحدي "
عدا بيديه على وجهو ونفخ بالقوي يحكي
عيسى :" لا إله إلا الله.. منين طلعتيلي انت تستنى فيااا ندخل بش تجي توتريلي عصابي ؟"
حطيت يدي ف خصري وهزيت بحاجبي نحكي
انا :" نستنى فيك ؟ فاش قام يابابا.. وزيد انا حرة هناا نطلع وقت لي نحب مش بش نشاورك "
وخرت بخطواتي لتالي فيسع ك ريتو هز يديه ف وجهي.. حل عينيه على وسعهم يحكي
عيسى :" بري مرڤدي الليلة قبل ماتخرجيني من عقلي ونفيق لي ف الدار لكل "
انا :" لا خوفتني محسوب.. وابعدني انت شادلي منظري ف شقان الفطر وخالط علياا لسحور.. شوف برا تسحر وحدك... "
عدا بعينيه عليا وغزرلي درا كيفاه.. قص علياا يحكي
عيسى :" سحور شنوة ؟؟ مازالت ساعة كاملة عالسحووور "
عديت بعينيا عليه وهرشت شعري نحكي
انا :" شنوة ؟ برا برا صلح وقتك "
عضيت على شفايفي وقت قدمت شوي وين الكوجينة ولقيتها فارغة.. عقدت بحواجبي نحكي
انا :" ياخي عمتي شبيها مافاقتش لتوو ؟"
تهزيت وتحطيت على صوتو ورايا يحكي
عيسى :" عمتك راقدة ومازالت ف عقلهااا تعرف الوقت.. بري ارڤدي "
تلفتتلو نحكي
انا :" تي شبيك وراياا انت.. وزيد تاليفوني نوقز تو يعني تو وقت السحور.. شمعرفك انت ؟"
عض على شفايفو وجبد تاليفونو حطو قدام وجهي.. عضيت على شفايفي وقت غزرت للوقت وتأكدت انو مازال بلحق ساعة.. نفخت بالشوي مش عارفة كيفاه غلطت ف تعمير التاليفون وانا نقول شبيني ناقصة نوم كاني مارقدتش.. بلعت ريقي نحكي
انا :" اي نعرف الوقت..اما انا نقوم بكري نتسحر هكاا بش نرجع نرقد "
عدا بعينيه عليا وهز بحاجبو يحكي
عيسى :" احسبني صدقتك "
انا :" تصدق ولا تقعد محسوب.. وزيد انت شتعمل هنا الوقت هذاا.. داخل تتسحب على شنوة تلوج اه ؟ "
حل عينيه فيا وعلا ف صوتو شوي يحكي
عيسى :" راااني شاد روحي عليك بالسيف.. شنوة تتسحب هاذي تشوفي فيااا سارق.. وانت شدخلك انا شنعمل هناا "
قحرتلو وعطيتو بظهري للكوجينة.. حليت لفريجيدار جبدت لحليب وبقيت نسخن فيه بش نتسحر مدامني قمت.. ضيقت عينياا ك سمعتو لبرا نفخ يحكي
عيسى :" وين مشاااو هاذم ؟"
قدمت شوي وبقيت واقفة قدام باب الكوجينة نغزرلو كيفاه يلوج على حاجة.. رجع غزرلي يحكي
عيسى :" ماريتيش مفاتحي ؟"
هزيت بكتفي ورجعت وين لحليب.. عضيت على شفايفي ك حسيت بيه دخل للكوجينة يحكي
عيسى :" نحكي معاك..ريتي مفاتحي وين ؟"
انا :" ماريتيش.. مانيش نعس على مفاتحك انا "
قلبي ضرب بقوة ك ريتو قرب ناحيتي ووقف بجنبي.. عدا بعينيه علياا يحكي
عيسى :" راني مازلت متحمل طولت لسانك ونقول عادي خلاهاا.. قاعد نعدي فبرشة حاجات بكيفي ونقول ميسالش..اما قسما بالله يالارين نهارت لي توفى لحكاية هاذي لكل تو نوريك عيسى شيعمل "
درتلو بكلي ووقفت قدامو.. عديت بعينيا عليه نحكي
انا :" ماعندك ماتعمل وكانك عالحكاية وفات وكملت.. والاسم لي انت نطقتو توو انا نسيتو مالا ماتخممش انو بش يجي نهار وتوفى لحكاية هاذي وتبدأ حكاية اخرى..خاطر مش على كيفك..المرة هاذي انا لي بش نقلك ابعدني لاتحاسبني ولانحاسبك..انا حرة فحياتي "
عدا بعينيه عليا وغزرلي ف عينيا يحكي
عيسى :" انسى انت معادش حرة عندك قداه تو.. ومدامني انا موجود انا لي نقرر هذاا "
ضغطت على يدي بالقوي نحكي
انا :" انت معادش موجود.. وانا معادش بش نسمحلك تقرر فحتى شي.. حياتي بش نسيرها على كيفي.. وتو ترا انا شنوة بش نعمل "
وخر بخطواتو لتالي يحكي
عيسى :" هاني نستنى.. وريني انت شنوة بش تعمل.. اما ريت رد بالك تلومني على تصرفاتي "
عديت بعينيا عليه ودورت وجهي للغاز.. شديت دمعتي بالسيف نحكي
انا :" بعد كل شي عملتو خسارة فيك كل شي.. حتى اللوم ماتستحقوش مني "
غمضت عينيا بالقوي و رجعت حليتهم على صوت خطوتو لي بعدت علياا.. مسحت دمعتي فيسع وتلفتت على صوت عمتي ورايا تحكي
غالية :" رينو كسبة فايقة ؟"
انا :" غلطت عمرت التاليفون قبل ساعة.. ماحبيتش نرجع نرقد هاني سخنت لحليب "
غالية :" باهي برا توضى مدام انا حضرت السحور وايجا كول حاجة "
هزيتلها براسي باهي وخرجت فيسع.. دخلت لتوالات وسكرت الباب ورايا..خذيت نفس طويل حاولت ننسى كلامو وغزرتو ليا خاطر معادش نحب نبقى نفكر فيه و ف تصرفاتو معاياا خاطرني بلحق معادش لاقية تفسير لهذا لكل لقيت روحي قاعدة نتعب كهو معاه.. قربت وين السبالة ريقلت أموري لكل وتوضيت ورجعت للبيت لبست عبايتي وهزيت سجادتي وخرجت وين لقيتهم لكل فاقو.. شريت كأس حليب وكليت شوي مسفوف وقمت.. صليت مع عمتي ونويت صيامي ورجعت للبيت.. نحيت العباية والفولارة وتسطحت وين شفت مايا راقدة ومش حاسة بشي.. بقيت نتقلب ف الفرش محاولة مني بش نرقد اما مانجمتش كل مانغمض عينيا نشوفو قدامي غير صوتو لي يرجع يتعاود ف وذنيا وين حسيت قلبي وجعني.. ماكنتش متخيل انو نسيانو بش يكون صعيب علياا هكاا.. مانيش عارفة كيفاه بش نتخلص منوي ونخليه يخرج من عقلي وقلبي وقتلي مازال لتو يأثر علياا حتى بكلمة وحدة.. غمضت عينيا بالقوي وبقيت نتفكر ف الليلة لي وجعني فيهاا ونعاود فيها الف مرة قدامي بش نخلي قلبي يفيق.. رغم اني نحس روحي اما ماعنديش حل آخر غبر هذاا بش يخليني نفيق..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
