#عيسى_يحكي
بقيت واقف ف بلاصتي نغزرلها كيفاه خرجت تجري.. على قد ماتمنيت نخلط علاهاا ونوقفها على قد ماحسيت روحي للاول مرة عاجز نقدم خطوة..كلامها وغزرتها لياا خلاوني نزيد نحس قداه وجيعتهاا مني كبيرة الشي لي خلاني نكره روحي ونكره اللحظة لي خرجت منها لكلام هذاكا من فمي..عمري ف حياتي ماندمت قد ماندمت عاللحظة هاكي..كيما عمري ماتوقعت لحكاية بش تكون بالصعب هذاا علياا.. فكرة انها رافضة تسمعني هكاا ورافضة حتى تغزر ف عينيا خلاتني نزيد نخاف اكثر من فكرة خسارتهاا.. للحظة استغربت تفكيري كيفاه أنا خايف نخسرهاا.. احساس غريب وجديد عليا رغم انو مش اول احساس جديد تخليني لارين نحسو.. تنهدت بالشوي وقت تفكرت قربها مني.. من غير مانخمم لقيت روحي حاطها بين يديا وكان لقيت مانسيبهاش كاني حبيت نخفف علاها لي تحس فيه ونخلاها تنسى انا شعملت رغم انو صعيب اما انا بش نحاول مستحيل نخلاهاا تضيع من يدي قبل ماتسمعني وتفهمني.. ضغطت على يدي بالقوي ك تفكرت كلام سمحية ليهاا.. كان لقيت وقتهاا راني قمت وهديت الدنياا فوق راسهاا بش نعملهاا معادش تدور بيها ولا تقلقهاا هكاكا.. ورغم اني عارف لارين مش بش تسمع كلامي وبش تعمل لي ف راسهاا اما هذا مايعنيش اني نخلاهاا بش تلقاني قدام اي حد يحاول يقلقهاا حتى بكلمة مهما كان هو شكون.. عديت بيديا الزوز على وجهي وتلفتت على صوت امي تحكي
غالية :" بابا لقيت لبريكية؟"
هزيتلها براسي لا نحكي
انا:" لا أمي.. تو نطلع نتكيف لفوق "
غالية :" ايجا اسهر معانا شوي "
انا :" لا أمي خليني نطلع.. يزي ماسهرت "
عدات بعيناها علياا وغزرتلي درا كيفاه تحكي
غالية :" شبي ولدي عيسى؟"
انا :" شي غاليتي.. تاعب شوي هاني بش نطلع نرتاح "
طبطبت على صدري تحكي
غالية :" باهي ياروحي برا.. انا شوي ونخلط عليك "
هزيتلها براسي باهي وعطيتها بظهري وخرجت.. جبدت تاليفوني بعثت ميساج للادم خبرتو بش يسكر هو الورشة ويروح على روحو مايبثاش يستنى فياا.. اول ماكملت طلعت طول لدار.. دخلت وسكرت الباب وراياا نحيت مريولي رميتو على جنب ودخلت طول للصالة ترميت عالفوتاي وتكيت براسي لتالي..هزيت يدي لفوق وعديت بعينيا على تراس لي خلتهالي
لفر/خة وين تفكرت لي صار بكري قدام السالدون.. كيفاه وقفتها هكاكا من غير مانخمم ولانحضر كلامي.. اما لقيت حاجة أقوى مني خلاتني نمنعهاا تتعدا.. لقيت روحي مانجمتش نقاوم لا غزرتهاا ولا ريحتهاا كل لي حبيتو وقتها اني نغزرلها قدامي حتى دقيقة ونسمع صوتهاا.. فقت من سرحتي على صوت تاليفوني لي نوقز.. نفخت بالقوي اول ماجبدتو وغزرت لنومروهاا.. رديت علاها نحكي
انا :" الووو "
مريم :" عيسى.. وينك ياروحي "
عديت بيديا على وجهي نحكي
انا :" هاني..وينك انت ؟"
مريم :" هاني انا ستنيت ستنيت لين عييت.. قلت خليني نطلبو انا نشوفو وينو ؟"
استويت ف قعدتي نحكي
انا :" الله غالب تشديت شتي ف الخدمة "
مريم :" ياخي مش ناوي تجي تطل علياا؟"
انا :" تو نجي... "
قصت عليا تحكي
مريم :" وقتاه ؟ تعرف قداه عندي ماريتكش ؟ توحشتك عيسى وتوحشت طلتك علياا ياروحي "
تنهدت بالشوي نحكي
انا :" حتى انا توحشتك.. و على قريب انشالله تو نجي نشوفك "
مريم :" ايجا عدي حذايا رمضان.. ياخي داري مش دارك انت زادة؟"
غمضت عينيا بالقوي و رجعت حليتهم نحكي
انا :" داري.. اما مانجمش الفترة هاذي عندي برشة خدمة.. ماك تعرف كنت مسافر ومازلت ك رجعت "
مريم :" اي قول لخالك يعطيك نهارين راحة "
رسيت على سنيا بالقوي نحكي
انا :" مانجمش.. تو بعد رمضان نطل انشالله "
مريم :" بعد رمضان؟ علاش ياعيسى هكاا.. علاش قاعد تبعد عليااا.. ياخي حتى انا عيلتك كيفي كيفهم وقتاه تحب تفهم هذا ؟"
ضغطت على ركبتي نحكي
انا :" فاااهم.. اما بلحق مانجمش تو نحاول نجي ف وسط رمضان نعدي حذاك نهار "
مريم :" اي ايجاا وكلمني قبل بش نحضرلك الماكلة لي تحبها لكل ياروحي "
تبسمت نحكي
انا :" باهي مريومة انشالله "
مريم :" عيسى كلمني ماتقطعنيش.. حتى كان مش جاي تو كلمني كل يوم..راني نبدأ نستنى وقتاه نسمع صوتك "
غمضت عينيا بالقوي نحكي
انا :" باهي تو نكلمك "
رجعت حليت عينيا على صوتها تحكي
مريم :" ربي يخليك ليا.. ورد بالك على روحك "
انا :" تهنى.. ايا نخليك تو بش نرقد شوي "
مريم :" برا تصبح على خير "
علقت علاهاا ورميت التاليفون على جنب.. رجعت تكيت براسي لتالي وين بقيت نخمم فمريم.. عمري ماتوقعت انو موضوع عيلتي الثانية بش يقلقني هكا اما ظهور لارين تو فخط حياتي خلاني نفكر ف كل شي.. خلاني نتمنى لو كانت حياتي غير هكاا ووضعي غير هذاا وقتها راني كنت مرتاح ولي عملتو مع لارين راو ماصارش.. تنهدت بالشوي وقمت من بلاصتي دخلت لتوالات نحيت حوايجي ودخلت لدوش.. غمضت عينيا وبقيت نستحلى ف قطرات الماء البارد لي كانو نازلين فوقي.. على قد ماحاولت نسترخى وننسى كل شي اما مانجمتش لقيت مخي يغلي من فكرة لفكرة اما أكثر فكرة مسيطرة علياا تو اني نخلى لارين تسمعني وتفهمني..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
