#لارين_تحكي
تململت شوي ودوب حليت عينيا عاليد لي مسحت على شعري.. رجعت غمضتهم وحشيت راسي ف المخدة بش نكمل نرقد.. سمعت عمتي تحكي
غالية:" رينو بنتي هياا فيق"
انا :" عمتي امان شوي برك ونفيق والله ناعسة "
مسحت على شعري تحكي
غالية :" ياماما الظهر فات.. قوم صلي ودور شوي وارجع تكا.. كان تعدي نهارك نوم صيامك يكون باطل"
تنهدت بالشوي وقمت.. هزيت روحي بالسيف وفركت عينيا نحكي
انا :" هاني قمت "
قامت من بجنبي وقربلي.. طبست باستني من راسي تحكي
غالية :" عيش بنتي.. هياا قوم مدامني حذاك.. نعرفك كان نخرج تو ترجع ترقد "
هزيتلها براسي باهي وقمت.. بستها من خدها نحكي
انا :" هاني قمت عمتي "
غالية :" برا اعمل دوش تو تفيق.. ورد بالك تغلط وتاكل حاجة "
تبسمت نحكي
انا :" لا تهنى.. اما امان ماتجبدليش سيرة لماكلة خاطرني بديت نجوع "
ضحكت تحكي
غالية :" ياناري هذا اول نهار هكاا.. هياا برا توضى وصلي العصر قريب يأذن "
هزيتلها براسي باهي نحكي
انا :" باهي عمتي "
مسحت على شعري وخرجت.. قربت للخزانة جبدت بيجاما ومنشفة نظيفة وهزيت تروسي وخرجت نكركر ف ساقيا بالسيف من النعاس لي غالبني.. دخلت لتوالات سكرت الباب ورايا ودخلت تحت الدوش.. حليت الماء البارد بش يصحصحني شوي وبقيت نغسل حتى كملت..خرجت نشفت بدني ولبست بيجامتي.. ريقلت أموري لكل وتوضيت..هزيت دبشي ورجعت للبيت لبست عبايتي وحطيت السجادة صليت الظهر والعصر لي اذن وقريت شوي قرآن وقمت.. نظمت البيت شوي شوي وخرجت.. عديت بعينيا عالدار وين لقيتها فارغة والحس جاي من لكوجينة.. نفخت بالشوي ك شميت ريحة لماكلة لي جوعتني.. دخلت حذاهم وين شفت مايا عالطاولة تقص ف الخضرة وعمتي بجنبها.. تكيت بظهري عالحيط نحكي
انا :" ياخي النهار شبيه طويل هكا ؟"
ريتهم ك هزو ريوسهم معايا وضحكو.. غزرت لماايا ك وقفت وقريت باستني من خدي تحكي
ماياا :" صحة النوم يا نوامة "
تبسمت نحكي
انا :" ياخي عندك برشة من لي فقت انت ؟"
غالية:" بنيتي فاقت من الصباح نلقاها هي غسلت ماعون السحور ولمت الصالة.. يقوي سعدهاا "
عديت بعينيا عليها وتبسمت نحكي
انا :" عيشك ماياا وسامحني خاطر مافقتش معاك.. راك تعبت وحدك "
ماياا :" ماتعبتش رينو.. انا فاطرة وشبعت نوم لبارح عكسكم.. على هذاكا حبيت نعاون عمتي شوي "
غالية :" عيشلي بنتي "
فركت عينيا لي يحرقو من النوم نحكي
انا :" تحبو نعاونكم ف حاجة "
ريت عمتي ك ضحكت تحكي
غالية :" هههه لا مانحبوش.. برا اقعد انت "
انا :" ياخي الجماعة وينهم ساعة ؟"
غزرت لمايا ك رجعت قعدت تحكي
ماياا :" عمو جابر خرج بش يصلي ف الجامع وسميحة فوق السطح تنشر ف الصابون و رانية تقرأ "
عقدت بحواجبي نحكي
انا :" عمتي ياخي يقراو ف رمضان؟"
غالية :" اي يقراو اما يكملو بكري.. تلقاها ف الثنية تو قريب توصل.. وزيد قريب تجي العطلة مازالت جمعة هكاكا وتعطل رنوشة "
هزيتلها براسي باهي نحكي
انا :" انا هاني ف الصالة..نرتاح شوي ونجي نعاونكم "
غالية :" هههه ياناري على بنتي تاعبة بش ترتاح.. مايا انت تعبتلي بنتي هكا؟"
مايا :" هههه لا عمتي بنتك تاعبة من ربي"
عديت بعينيا عليهم نغزرلهم كيفاه يضحكو علياا.. قحرتلهم نحكي
انا :" حرام عليكم والله "
غالية :" نفدلكو معاك.. برا ارتاح اما قبل قلي مش شاهية حاجة نحضرهالك ؟"
عديت بعينيا عليها وشديت دمعتي بالسيف نحكي
انا :" لا عمتي عيشك.. انا هاني مشيت "
خليتهم ومشيت طول للصالة.. ترميت عالفوتاي وتكيت بظهري لتالي..شوفت عمتي وماياا هكاكا خلاتني نتفكر نور وقت كنت نبقى معاهاا ف الكوجينة نعاونها انا زادة ونبقاو نضحكو ونفدلكو.. تكيت براسي لتالي وغمضت عينيا وين دمعة سخونة نزلت على خدي..مسحتها وبقيت سارحة مع تصويرة نور حتى غفيت بالقعدة من غير مانحس..نفخت بالشوي عالصوت لي بقى يعاود ف اسمي قلقني.. دوب حليت عينيا نحكي
انا :" تي ابعدني "
عيسى :" قوم شبيك راقدة هكاا تو رقبتك توجعك "
حليت عينيا ك ركزت ف صوتو وغزرتلو.. حطيت يدي على رقبتي لي وجعتني نحكي
انا :" افففف ياربي سيدي وراياا حتى لبيتي.. شتحب مني انت "
عيسى :" بيت شنوة ؟ راك فالصالة "
فركت عينيا وعديتهم وين لقيت روحي بلحق فالصالة.. رجعت غزرتلو وين شفتو واقف قدامي يغزرلي.. قحرتلو نحكي
انا :" ياخي انت شتعمل قدامي.. ابعدني ملا "
قحرلي يحكي
عيسى :" قوم ارقد فبيتك "
رسيت على سنيا بالقوي نحكي
انا :" شدخلك فيا انت انشالله نرقد حتى فالشارع.. وزيد شبيك تحكي معايا.. ياخي ناسي لي انا مانحكيش معاك "
نفخ بالشوي يحكي
عيسى :" فهمني علاش تحكي ياسر..قتلك قوم "
تسطحت عالفوتاي وحطيت لمخدة تحت راسي نحكي
انا :" هآه.. انا حرة نحب نرقد هناا "
كبس عالبونية متاعو يحكي
عيسى :" باهي اما شوفي ادم وعزيز جايين معاياا بعد.. حبلك ربي ندخل ونلقاك هكاا قدامهم "
حليت عينيا على وسعهم وتنطرت من بلاصتي.. وقفت قدامو وحطيت يدي ف خصري نحكي
انا :" وكان لقيتني هكاكا شنوة بش تعملي ؟ ياخي اصلا انت شيهمك فيااا.. علاش باقي تدخل فحياتي.. مش قتلي ابعدني وهاني بعدتك ياسيدي.. علاش انت باقي وراياا.. علاش مارجني.. شمازلت تحب مني فهمني.... "
سكتت وقت غزرت لعينيه لي تحلت فياا.. قحرتلو ورجعت ترميت عالفوتاي ساكتة وهو باقي قدامي مش عارفة شمازال يحب مني..
VOUS LISEZ
#مُتمردة_العيسى ❤️🔥 (الستاتي الثاني)
Roman d'amour#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
