#لارين_تحكي
عديت بعينيا عليها نغزرلها ك خرجت تجري.. للحظة حسيت روحي بلحق مانيش فاهمة غزرتهاا لياا غير طريقة كلامها كيفاه صارت كاني تجاكر فياا.. خذيت نفس طويل تلفتت لعمتي نحكي
انا :" عمتي انا بش نقوم نصلي لعشاء ونرقد.. غدوة بش نفيق بكري "
مسحت على شعري تحكي
غالية :" باهي ياروحي برا.. وماتنساش تعمر تاليفونك للسحور "
قربت بستها من خدها نحكي
انا :" باهي عمتي "
غزرت لمايا نحكي
انا :" مايا انت مازلت ساهرة ؟"
غالية:" خلاها حذايا مدام انت صليت "
هزيتلها براسي باهي وقمت من حذاهم ومشيت طول للبيت خذيت بيجامتي ومنشفة نظيفة وخرجت لتوالات..عملت دوش خفيف وريقلت أموري لكل وتوضيت ورجعت للبيت.. لبست عبايتي وغطيت شعري.. فرشت السجادة وبديت الصلاة.. اول ماكلمت خذيت كتاب القرآن قريت الورد وسبحت شوي وين حسيت روحي ارتحت وكانو غمة انزاحت من فوق صدري.. اول ماقمت غزرت لباب البيت لي تحل وين شفت ماياا.. تبسمت تحكي
مايا :" تقبل الله صلاتك "
حطيت كتاب القرآن ونحيت الفولارة نحمي
انا :" عيش اختي "
ريتها ك قربت للخزانة وجبدت بيجامتها تحكي
مايا :" نمشي نعمل دوش فيسع قبل مايروح عم جابر "
هزيتلها براسي باهي نحكي
انا :" باهي برا.. انا هاني بش نجبد الرسومات نحضرهم "
ماياا :" ماترقدش استناني "
هزيتلها براسي باهي وغزرتلها كخرجت..قربت للخزانة من الطرف الثاني لي خصصتو لحاجتي وحليتو.. تبسمت من غير مانشعر اول ماشفت رسومات نور لي كانو مع رسوماتي.. خذيت نفس طويل ومديت يدي جبدتهم لكل.. حملتهم وقربت وين الفرش.. حطيتهم وطلعت ربعت ساقياا وقعدت قدامهم.. عديت بعينيا عليهم لكل وين حسيت بغصة شدتني وانا نغزرلهم.. كل رسمة وكل تصميم معاه ذكرى.. من لي حليت عينيا وانا بجنب نور رافقتهاا ف كل لوحة.. حتى ك بديت انا نرسم كنت نخلاها قاعدة بجنبي حتى نكمل.. مسحت دمعتي لي طاحت وقت تفكرت كيفاه كانت تفرح وتبوسني ك نكمل لوحتي وتقلي هاذي احلى من خدمتي.. حسيت قلبي وجعني ك عرفت انو مابقالي شي كان رسماتهاا وياريت كان بقاو لكل معاياا.. حتى هوما بعاد علياا تو ف المعرض و المرسم.. الدنياا حرمتني من كل شي كاني تعاقب فياا ومش عارفة لوقتاه بش نبقى ف العقاب هذاا وكيفاه بش نتحملو.. مسحت دموعي ومديت يدي نغزر لتصاميم نشوف شنوة بش نختار لغدوة.. كرشي وجعتني وقت تفكرت غدوة وين بقيت نخمم كيفاه بش يتعدا زعمة وشنوة بش يصير.. غمضت عينيا بالقوي و رجعت حليتهم ندعي انو الأمور تتعدا كيما نحب أناا ومايصير شي يعطيني ولا يعرقل حلمتي.. تبسمت اول مازيت تصميم نور لي كان عبارة على روبة ف الأحمر عديت بعينيا عليها وركزت ف التفاصيل وين حسيت روحي بلحق فخورة بخدمتهاا لي مهما نتعلم ونحاول مستحيل نوصللها.. حطيت التصميم على جنب بش نعاود كيفو وبقيت نحط والرسومات لي بش نهزهم غدوة على جنب.. قمت من بلاصتي رجعت الباقي الخزانة وين الألوان والفرشات ورجعت للفرش حطيت لي بش نهزهم على جنب وغزرت لمايا دخلت.. تبسمت نحكي
انا :" صحة ياروحي "
حطت المنشفة على جنب تحكي
مايا :" يعطيك الصحة رينو... "
عدات بعيناها عالرسومات وقربت شافتهم تحكي
مايا :" اخترت هاذم ؟"
انا :" اي حلوين ؟ هاذم خدمتي انا مش نور "
مايا :" محلاهم لكل.. متأكدة نزار بش يهبل علاهم "
تبسمت وخذيت نفس طويل نحكي
انا :" انشالله ياربي.. والله حاسة روحي متوترة كاني غدوة اول نهار بش نرا نزار "
مايا :" ماتتوترش.. نزار يبان gentil وزيد مستحيل يلقى كيما موهبتك.. انا متأكدة انكم بش تتفاهمو "
قربت للفرش تكيت بظهري لتالي نحكي
انا :" انشالله و انشالله زادة يتفاهم معاك "
عقدت بحواجبها وقربت تكات حذاياا تحكي
مايا :" انا شدخلني ؟"
انا :" شنوة شدخلك ؟ انت بش تخدم معايا مستحيل انا نعمل حاجة وانت مش معايا "
مايا :" يارينو امان ماتعلمش هكاا.. الراجل عندو شركة ازياء واعلانات شدخلو ف الفخار ؟"
عوجت شفايفي نحكي
انا :" مانعرفش.. تو نخمم ف حل خلي لحكاية علياا امان "
مسحت على شعري تحكي
مايا :" رينو ضمن روحك معاه وتفاهمو وبعد تو نشوفو حل لياا انا باهي ؟"
عديت بعينيا عليها نحكي
انا :" باهي تو نشوف "
ضحكت تحكي
ماايا :" راسك صحيح انت "
تسطحت نحكي
انا :" مانيش جديدة عليك.. هياا طفي الضو خليني نرقد بش نقوم نتسحر "
ريتها ك عطاتني التاليفون تحكي
مايا :" عمر الوقت قبل "
خذيتو من يداها وعمرت الوقت..حطيت التاليفون وحشيت راسي ف المخدة وقت طفات الضو.. نحكي
انا :" بونوي ماياا "
طبست باستني من خدي تحكي
مايا :" بونوي رينو "
تبسمت وغمضت عينيا وين بقيت نخمم كيفاه بش نعمل حتى مايا نخدم معايا.. مستحيل نخلاهاا وحدهاا ونمشي كيما مانحبش انا نبدا نقدم ف حياتي وهي لا وقتلي هي جات هناا على خاطري ومعايا.. نحب اي حاجه انا نعملها تشاركني هي فيهاا.. بقيت نخمم هكاا حتى غفيت.. رجعت حليت عينيا بالسيف على صوت تاليفوني لي نوفز.. نفخت بالشوي وسكتت التاليفون بش مايا ماتفيقش.. قمت بالسيف نكركر ف ساقيا وعينيا مغمضة مانجمتش نحلهم من كثر مايحرقو فياا من قلة النوم.. اول ماخرجت وقدمت شوي للصالة حليت عينيا مفجوعة عالجهامة لي دخلت فيهاا.. عضيت على شفايفي وقت ريتو هو قدامي وشدني من مرفقي حتى مانطيحش لتالي.. عديت بعينيا عليه نغزرلو كيفاه واقف قدامي وعينيه تتعدا علياا مش عارفة شيعمل هناا الوقت هذاا..
VOUS LISEZ
#مُتمردة_العيسى ❤️🔥 (الستاتي الثاني)
Roman d'amour#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
