#لارين_تحكي
هبطت نجري فالدروج بش نمشي لمايا لي خليتها واقفة وحدها تستنى.. وقفت مستغربة ك مالقيتهاش قدامي.. قدمت شوي وعديت بعينيا عالشارع مش عارفة وين مشات.. للحظة حسيت روحي خفت وتحيرت لا تكون ضاعت ولا صارتلهاا حاجة وحدهاا.. وخرت بخطواتي لتالي بش نعيط لجابر اما وقفت على صوتهاا من بعيد.. تلفتت بالوقت وشيعت عينيا ناحية الصوت.. حليت عينيا على وسعهم اول مالمحتهاا قدام ورشة لآخر تعارك.. لحظتهاا كبست على ساكي وجريت ناحيتها بش نشوف شفماا.. اول ماقربت شوي ريتو ك هز راسو معاياا وغزرلي درا كيفاه.. قحرتلو وقربت لمايا لي نحكي
انا :" مايا شفما ؟ شبيك تعيط ؟"
هزتلي براسها لا وعدات بيداها على وجهها تحكي
مايا :" مفما شي رينو... "
قحرتلهم الزوز لي كانو واقفيت وقصيت علاهاا نحكي
انا :" كيفاه مفما شي؟ قلي شعملولك ؟؟"
تلفتت على صوت ادم يحكي
ادم :" من رأيي تقلبي السؤال.. اسألها هي شعملت "
عقدت بحواجبي مستغربة نحكي
انا :" ماعندي علاش نسأل فيهاا خاطر نعرفها هي ماتعمل شي "
شدتني من مرفقي تحكي
مايا :" هياا رينو خلينا نمشيو من هناا "
انا :" مانيش ماشية حتى نعرف شصار؟ كان فما حد قلقك قلي مايا وانا تو نشكي لجابر هو يتصرف.. انت ماكش وحدك هناا "
دمي فور مني ك ريتو يغزرلي وشاد التبسيمة.. دورت وجهي وغزرت للادم ك قربلي.. عدا بعينيه علياا يحكي
ادم:" لارين لحكاية ومافيها انو صار سوء تفاهم بيني انا والانسة.. ماكنتش نعرف انها صاحبتك وهي كيفكيف ماكانتش تعرف اني صاحب عيسى.. مش هكاا ؟"
ضيقت عينيا ك ريتو غزرلهاا.. تلفتت وين شفتها هي زادة تغزرلو اما ب ڤحرة.. نفخت بالشوي تحكي
انا :" اي المهم ماعملتها شي مش هكا ؟"
جا بش يجاوبني اما سكت وقت هي سبقتو تحكي
مايا :" شعندو يعملي زادة؟ حبلو ربي كان خمم حتى يدور بياا "
عضيت على شفايفي وقت سمعتو يحكي
ادم :" هاه سمعتي بوذنيك وشفتي بعينيك..انا ماعملتلها شي..هي جات تهدد فياا وتطول ف لسانها معايا "
دوب تبسمت ك غزرتلها كيفاه عاضة على شفايفها وتقحرلو.. هزيتلو براسي باهي نحكي
انا :" باهي ماصار شي برك.. هي ماتعرفكش "
عدا بعينيه علينا وغزرلي يحكي
ادم:" تو ولا ماصار شي وهي معادش تعرفني.. اما انتوما النساء شكون يشدكم ولايفهمكم.. كان جا العكس راكم هزيتوني للمركز "
عوجت شفايفي وغزرت لمايا لي قحرتلو وغزرتلي تحكي
ماايا :" هيا هيا رينو.. يزي ماتعطلناا من جرتهم "
هزيتلها براسي باهي وشديتها من مرفقها نحكي
انا :" هياا خلينا نمشيو "
اول ماتحركنا تلفتت على صوتو ورايا يحكي
عيسى:" برا معاهم وماتبطاش.. ارجع فيسع "
نطرت مرفق ماياا وغزرت للادم لي قربلناا.. حليت عينيا على وسعهم فيه نحكي
انا :" وين على خير معانا؟"
ادم:" بش نوصلكم... "
قصيت عليه نحكي
انا :" ماعندك وين توصل فيناا.. احنا نعرفو الثنية.. يعطيك الصحة ادم "
عدا بعينيه علينا انا ولاخر ورجع غزرلي درا كيفاه يحكي
ادم :" ميسالش خليني نوصلكم.. اصلا انتوما ف ثنيتي "
انا :" ادم عيش خويااا قتلك لا.. خليك ماتعطلش روحك من ورااناا "
ضغطت على يدي بالقوي كريتو قرب حذانا وقحرلي.. غزر للادم يحكي
عيسى :" ادم..انا قتلك وصلهم "
عليت فصوتي شوي نحكي
انا :" ادم.. وانا قتلك لااا "
عدا بعينيه علينا ووخر بخطواتو لتالي يحكي
ادم :" مانيش لعبة بيناتكم انا..ادم برا ادم اقعد..ك تلقاو حل بينات بعضكم قولولي هاني نستنى "
غزرت لمايا كوقفت بجنبي وشدتني من مرفقي تحكي
مايا :" رينو خليه برك يوصلناا.. هاو طلع تاكسيستي هو محسوب بش ياخذ فلوسو ويمشي على روحو "
وقفت قدامها حطيتها وراء ظهري ك ريتو هد علاها يحكي
ادم :" يا بنتي انت خليك على جنب.. شكون دااار بيك توو حتى تعطي راييييك "
حليت عينيا فيه نحكي
انا :" ماتعيطش علاهاا.. وعلاش كان لي تابعينك انت يعطيو رأيهم ولا شنوة؟"
سمعتو ك نفخ بالقوي يحكي
عيسى:" لا حول الله..يااا ادم هزهم من هناا "
ريتو ك دارلو وعلا ف صوتو شوي يحكي
ادم :" تي فك على امي انت هالنهااار.. برا وصلهم انت اهيكا التاكسي قدامك "
رسيت على سنيا بالقوي نحكي
انا :" حد مايوصلناا "
حسيت بمايا ك جبدتني ودورتني قدامها.. قربتلي وهمست بالشوي تحكي
مايا :"يابنتي خلي يوصلنا..رانا ضيعنا وقت وعم جابر قلنا ماتبطاوش وJoseph تو يخلط علينا مايلقاناش.. محسوب طفيه احسب روحك ماتعرفوش جرد شوفور وكهوو "
عديت بعينيا عليها وهمست نحكي
انا :" انا مانحبش لآخر يتدخل فيا ويقول شكون يوصلني وشكون لا.. تو نشوفو تاكسي اخرى "
ماايا :" مفماش تاكسي اخرى.. من بكري وانا واقفة كان البوهالي هذاا تعدا "
عوجت شفايفي نحكي
انا :"مالا قول انت بش مايطلعش شكلي خايب قدامهم "
هزتلي براسها باهي تحكي
مايا :" باهي تو نتصرف "
نفخت بالشوي ك سمعتو ورايا يحكي
ادم :" وفاشي الاجتماع.. حسستوني بش نوصلكم بطيارة "
مايا :" على اساس ركبتها انت الطيارة ولا تعرفها "
قحرلها يحكي
ادم :" خليتهالك.. اشبعي بيها "
قحرتلو تحكي
ماايا :" بش توصلنا ولا لا ؟"
ادم :" شعندي نعمل.. برا لا تباركلك ياكمال "
ريتو ك حط يديه على كتفو يحكي
عيسى :" عيشو الديزل "
ادم :" نعيش بش تكرهوني فحياتي.. ماعينيش "
ضحك وغزرلي لحظتهاا عطيتو بظهري وشديت ف مرفق ماياا سبقناه لتاكسي لي كانت واقفة وطلعنا.. سكرت الباب ورايا وغزرتلها نحكي
انا :" احكيلي شصار بينك انت وادم "
اشرتلي بعيناها عالبلار تحكي
مايا :" تو بعد.. هاو جا "
اول ماتلفتت عينيا قابلت عينيه وين شفتو كيفاه مازال واقف يغزرلي.. لحظتهاا تكيت بظهري لتالي هاربة منوو..
VOUS LISEZ
#مُتمردة_العيسى ❤️🔥 (الستاتي الثاني)
Storie d'amore#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
