#لارين_تحكي
استندت بيديا عالدربوز وبقيت نغزر قدامي سارحة مع تصويرة نور وصوتهاا.. ايامات قليلة ونور تعمل 5شهور غايبة عليا..5شهور تعداو كانهم دهرماعرفتش كيفاه عشتهم من غيرها وكيفاه مازلت بش نعيش.. للحظة هاذي مانيش مصدقة انها مشات واني بعدت علاهاا المسافة هاذي لكل.. هذا اول رمضان وهي مش معايا فيه.. كيفاه بش نتلم على طاولة وهي مش موجودة.. غصة شدتني فحلقي وفت تفكرتها كيفاه كانت تحضرلي شهوتي.. رغم انو كنا ف بلاد اخرى ووحدناا اما كانت تعمل كل شي بش تحسسني بجو رمضان واللمة.. اصلا وجودها كان كافي بالنسبة ليااا.. بلاصتها هي عالطاولة يعوض الف لمة كنت نحس كانو الدنيا لكل معايا.. عكس تو رغم انو دايرين بياا برشة عباد اما حاسة بفراغ كبير..حاسة كاني وحدي بيناتهم.. تبسمت مع دمعتي لي نزلت وقت استرجعت صوتهاا وخيالهاا قدامي
#فلاش_باك
حطيت صحفة الشربة ف نص الطاولة وتلفتت عليت فصوت أذان المغرب.. تبسمت ك ريتها خلطت علياا وحطت صحن لبريك..جبدت الكرسي وقعدت نحكي
انا :" ليوم جعت عاللخر انا "
قعدت بجنبي وسكبتلي شوي شربة وضحكت تحكي
نور :" تستاهل بش تعود تفيق معايا وقت السحور "
انا :" حرام عليك نوري.. ليوم والله كنت بش ندوخ "
عدات بعيناها علياا وضحكت تحكي
نور :" اللطف على بنتي.. هاني طيبتلك كل شي تحبو.. كول وشبع كرشك "
اول ماهزيت لمغرفة بش ناكل..وقفت على صوتها تحكي
نور :" رينوو شعلمتك انا.. شنوة نقولو قبل "
عضيت على شفايفي نحكي
انا:" نسيت والله.. اللهم لك صمت وعلى رزقك أفطرت وبك آمنت..وعليك توكلت..ذهب الظمأ وابتلت العروق وثبت الأجر إن شاء الله..صحيحة هكا ؟"
تبسمت تحكي
نور :" اي صحيحة.. ومعادش تنسى رينو "
انا :" ك ننسى انت ارجع فكرني.. هاك معايا "
عدات بعيناها علياا وطبطبت على يدي تحكي
نور :"رينو انت كبرت تو ولازمك تبقى متفكرة وحدك.. فما حاجات انا ربيتك علاهم نحبك تبقى تعمل بيهم سوى انا معاك ولا غايبة عليك "
شديتها من يداها وبستها منها نحكي
انا :" انت ماعندك وين تغيب عليا.. بش تبقى ديما بجنبي نور "
تبسمت تحكي
نور :" بش نبقى ديما بنتي.. مانخليهاش جملا.. ايا تعشى "
عضيت على شفايفي نحكي
انا :" ميسالش ناخذ شوي فريت؟"
نور :" ك تكمل شربتك لكل وقتها ميسالش "
عوجت شفايفي نحكي
انا :" راني مانحبهاش برشة "
نور :" رينو يزي من الدلال واشربها.. ماكانش ماتاكلش من البسبوسة "
حليت عينيا على وسعهم وضحكت نحكي
انا :" نور انت عمتلي البسبوسة لي انا نحبها؟"
حطت مغرفتها وهزتلي براسها اي.. قمت من بلاصتي وبستها من خدهاا بالقوي نحكي
انا :" انت احلى نوري ف الدنياا.. ربي يخليك ليا.. هاني بش نكمل الشربة وأعطيني بسبوسة "
ضحكت وهزتلي براسها باهي تحكي
نور :" باهي مالا نحب تحسابني بالصحفة هذيكا "
هزيتلها براسي باهي وبقيت ناكل ف الشربة لكل وفرد وقت نحكي معاها.. رغم اني كليت برشة ماكلات اما تبقى ماكلة نور أبن ماكلة انا ذقتها يكفي انها من يداها هي...
#باك_اند
مسحت دموعي لي نزلو.. وحطيت يدي فوق قلبي لي حسيتو وجعني..كان ف بالي كلامها وقتها بش يصير وأنها بش تغيب علياا هكاا راني ماضيعت حتى ثانية وهي بعيدة علياا..راني بقيت بجنبها ليل ونهار نغزرلها ونسمع ف صوتهاا رغم اني عارفة حتى كام هذا صار مستحيل نشبع بيهاا.. عديت بيديا الزوز على وجهي وتلفتت على صوت جابر لي دخل.. رجعت قصتي لتالي وخرجت بش نستقبلو.. وقفت ف بلاصتي ك ريت لآخر معاه وين حسيت روحي ندمت خاطر خرجت.. اول ماجيت بش نرجع للبلكونة وقف على صوتو يحكي
جابر :" رينو "
دوب تبسمت وقربتلو نحكي
انا :" الحمدلله على سلامتك جابر "
عدا بعينيه عليا وحط يديه على خدي يحكي
جابر :" شبي بنتي؟ ياخي كنت تبكي ؟"
ريت لآخر كيف غزرلي وعدا بعينيه عليا.. رجعت غزرت لجابر نحكي
انا :" لا جابر مانيش نبكي "
جابر :" لارين ماتخبيش علياا.. مالا شبيه وجهك احمر وعينيك مدمعين هكا؟"
تبسمت بالسيف نحكي
انا :" لااا كنت ف الكوجينة نفرغ فالافاحات مع عمتي ياخي طلع بيناتهم قرفة وزنجبيل وانا عندي حساسية منهم ياخي عينيا دمعت وحليت نعطس ونكح كهو "
طبس باسني من راسي يحكي
جابر :" اللطف على ضي جابر.. تو نوصيهم لكل يخرجو القرفة والزنجبيل من الدار مدام يقلقوك هكا"
انا :" عيشك ربي يخليك "
غرزتلو ك تلفت للاخر يحكي
جابر :" عيسى افطر هناا واهبط "
غزرلي ورجع غزر لجابر يحكي
عيسى :" لا خالي ادم يستنى فياا.. بش نفطرو مع بعضنا ونبقى انا ف الورشة هو بش يوصل تاكسي عم كمال "
جابر :" باهي ولدي.. ربي عينكم "
غزرلي ورجع يحكي
جابر :" رينو بنتي برا لعمتك شوفها حضرت فطور لاولاد ولا لا ؟"
ضغطت على يدي بالقوي وهزيتلو براسي باهي.. اول ماتلفت ريتو كيف عدا بعينيه عليا وغزرلي درا كيفاه.. دورت وجهي عليه ومشيت نجري للكوجينة وين شفت عمتي تحضر فالقفة.. نفخت بالشوي نحكي
انا :" عمتي القفة حضرت ؟"
غالية :" عيسى جاء ؟"
انا :" اي هاو لبرا "
هزت القفة وعطاتهلي تحكي
غالية :" رينو عيش بنتي شد اعطيه انت.. انا غاطسة ومايا أكثر مني مسكينة "
ريتها ك ضحكت تحكي
مايا :" والله علمت جو معاك ياعمتي "
تبسمت من غير مانشعر وانا نشوف فيها كيفاه غاطسة مع الخضرة.. كبست عالقفة لي خذيتها من يداها وبقيت واقفة نخمم كيفاه بش نعطيه وحتى مايا مافهمتش عليا ماهيش مركزة معاياا جملاا..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
