#مايا_تحكي
عديت بعينيا عليها نغزرلها ك تكات بظهرها عالفرش وغمضت عيناها..تنهدت بالشوي وقربتلهاا.. قعدت بجنبهاا وشديتهاا من يداها نحكي
انا :" رينو كيفاه تحس ف روحك تو ؟"
حلت عيناها وغزرتلي ساكتة..دورت بيديا علاهاا اول ماقربتلي وجبدتها عندي..حشات راسها ف صدري تحكي
لارين :" ماياا انا خفت برشة.. وحاسة روحي مازلت خايفة.. كل مانغمض عينيا نتخيل كان جيت وحدي بكري وانت مش معاياا شنوة كان بش يصير فياا "
كبست علاهاا وبستها من راسها نحكي
انا :" رينو يزي امان معاد تخمم ف شي تو كان انك لباس واحنا كلناا معاك..مانحبكش تبقى خايفة هكاا "
دورت بيداها عليا تحكي
لارين :" حاجة أقوى مني والله.. مانيش منجمة ننسى لا صوت الخبطات لقوية ولاصوت خطواتو "
بعدت علاها شوي وحاوطتلهاا وجهها بيديا الزوز.. غزرتلها ف عيناها نحكي
انا :" بش تنسى.. بش تحاول تنسى لارين.. لي صار قبل معادش بش يتعاود ولي صار الليلة كيفكيف.. عيسى هناا وادم معاه اكيد بش يعرفو شكون لي خوفناا هكا.. نحب اختي تكون قوية "
عدات بعيناها علياا وهزتلي براسها باهي من غير حتى كلمة.. قربت بستها من جبينهاا نحكي
انا :" هياا اشرب كاس لحليب قبل مايبرد "
هزت بكتافهاا تحكي
لارين :" ماعينيش... "
قصيت علاهاا وقت قمت هزيت كاسة لحليب ورجعت حذاهاا نحكي
انا :" لا عينك.. هياا حل فمك بش تشربو لكل "
قربتلهاا شوي الكاسة وين خذات رشفة صغيرة.. بقيت نتبع فيهاا بعينيا كيفاه تشرب بالسيف علاهاا حتى كملت شطرو.. بعدت شوي تحكي
لارين:" مايا امان يزيني "
تنهدت بالشوي وهزيتلها براسي باهي نحكي
انا :" باهي ياروحي "
ريتها ك هزت راسها وغزرت للباب ورايا.. تلفتت معاها وين شفت عيسى دخل.. رجعت غزرتلها نحكي
انا :" انا بش نقوم... "
قصت عليا تحكي
لارين :" لا خليك "
قربتلها شوي نحكي
انا :" رينو خليني نهز الكاس ونمشي نغسل وجهي.. وزيد ميسالش احكي معاه شوي خليه يطمن هو بكري خاف عليك "
عدات بعيناها عليا وغزرتلي درا كيفاه ساكتة.. تبسمت وقمت من بلاصتي وين شفت عيسى ك قربلهاا شوي.. خذيت نفس طويل وخرجت طول للكوجينة.. حطيت الكاسة على جنب واستندت بيديا عالرخامة نرد فالنفس وراء بعضو محاولة مني نهدي روحي شوي ونضبط دقات قلبي لي بقات تضرب من الخوف لي حسيتو الليلة هاذي ولقيت روحي مجبورة مانظهروش.. غصة شدتني فحلقي وقت تخيلت شنوة كان ممكن يصير لو ماكلمتش عيسى فالوقت المناسب.. شنوة كنت بش نعمل ولارين معايا الفكرة وحدهاا خلاتني نترعب.. اصلا للحظة هاذي مازلت دخلة بعضي شوفت رينو وهي دايخة هكاكا خلات قلبي يطيح بين ساقياا مارتحت شوي كان وقت ريتهاا حلت عيناها.. فقت من سرحتي على صوتو ورايا يحكي
ادم:" ماياا ؟"
مسحت دمعتي فيسع ودورت وجهي الناحية لخرى اول ماقربلي.. شدني من مرفقي يحكي
ادم :" مايا انت مليحة ؟"
ضميت على شفايفي شديت دمعتي لي خنقتني من وراء سؤالو خاطرنيوف اللحظة هاذي بعيدة كل البعد على كلمة مليحة.. خذيت نفس طويل وتلفتتلو وين شفتو قدامي.. هزيتلو براسي اي نحكي
انا :" اي سافاا "
عدا بعينيه عليا مستغرب يحكي
ادم :" متأكدة؟ وجهك يبان تاعب "
غمضت عينيا بالقوي ورجعت حليتهم نحكي
انا :" انا لباس صدقني.. جيست مازلت مفجوعة شوي كهو "
هزلي براسو باهي يحكي
ادم :" باهي ايجاا اقعد "
هزيتلو براسي باهي وقدمت وين الطاولة.. دوب تبسمت ك ريتو جبدلي الكرسي يحكي
ادم :" اقعد ارتاح "
قعدت وتكيت بظهري لتالي نغزرلو ك رجع وين الرخامة سكبلي كاسة ماء ورجع حذايا عطهالي وقعد بجنبي يحكي
ادم :" شد اشرب "
خذيتها من يديه عملت رشفة وحطيتهاا من غير حتى كلمة.. عدا بعينيه علياا يحكي
ادم :" نعرف لي صار بكري يخوف ويفجع اما سايي وفات لحكاية احنا معاكم تو.. مخلوق معاد ينجم يعفس لبلاصة ولايقربلكم"
عديت بعينيا عليه نحكي
انا :" ادم حسب رايك شكون ينجم يعمل هكا؟"
هزلي براسو لا يحكي
ادم :" مانعرفش.. امامصيري نعرفو وورحمة بابا مانحاسبو بيدياا على لي عملو معاكم تو تشوف "
عديت بيديا الزوز على وجهي نحكي
انا :" كيفاه بش تعرفوه.. انا وقت طليت شفت كان لخيال هفّ... "
قص علياا يحكي
ادم :" كان واحد برك ؟"
هزيتلو براسي اي نحكي
انا :" اي..حتى صوت الخطوات متاع واحد كهو.. بقى طالع من طاق لطاق وكل طاق ياقف يضرب الباب متاعو بالقوي.. حتى وصل للسطح "
عدا بعينيه عليا وغزرلي درا كيفاه ساكت.. غمضت عينيا بالقوي نحكي
انا :" للحظة هاذي مانيش مصدقة لي صار والله "
حليت عينيا على يديه لي تحطت فوق يدي.. عدا بعينيه علياا يحكي
ادم :" يزي ماتبقاش تخمم ف لي صار بش ماترجعش تخاف "
ضميت على شفايفي شديت دمعتي بالسيف نحكي
انا :" انا بكري خفت على لارين..خفت كان عيسى مايهزش كيما عم جابر ونلقى شكون واقف قدامناا.. شنوة كنت بش نعمل وحدي مش عارفة.. شنوة كان بش يعمل فيناا... "
كبس على يدي بالقوي وقص علياا يحكي
ادم :"اشش يزي مايا..خمم انك تو معايا واحنا نحكيو ولارين لداخل لباس.. لي صار اليلة احسبو كابوس وتعدا وانا نوعدك انو معادش بش يتعاود.. حد ماينجم يعمل فيكم حاجة والله "
عديت بعينيا عليه وطبست راسي غزرت ليديه لي مازالت شادة ف يدي.. لقيت روحي كنت بحاجة لحد يطمني حتى شوي ويخفف عليا الخوف لي بقى ياكل فياا من داخل وماتوقعتش الحد هذا بش يكون هو و الغريب اني حسيت روحي بلحق ارتحت شوي قدام كلامو لياا ولوجودو بجنبي ف اللحظة هاذي..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
