#لارين_تحكي
حطيت لمغرفة من يدي وخذيت كاسة الماء عملت رشفة وحطيتها هي زادة وين حسيت روحي شبعت.. مسحت يدي وغزرتلو وين شفتو باقي قاعد.. هزيتلو براسي بمعنى شنوة نحكي
انا :" شمازلت قاعد تعمل هنا ؟"
استوا ف قعدتو وغزرلي يحكي
عيسى :" قاعد نعس عليك حتى تكمل عشاك.. مدامك كيما الصغار ماتسمعش لكلام "
انا :" وهاني تعشيت تنجم تتفضل تو "
قربلي شوي وعدا بعينيه عليا يحكي
عيسى :" هاني بش نتفضل.. قوم اعمل دوش وارقد بش الصباح تفيق بكري "
عقدت بحواجبي نحكي
انا :" علاش بش نفيق بكري زادة؟ ناوية تحكم فيا حتى فنومي.. ياسيدي بش نصبح راقدة ونقوم فعقلي.. باهي هكاا "
عيسى :" على كيفك..انا قلت هكا خاطر ورانا سفر "
فركت يديا ف بعضهم نحكي
انا :" ياخي انت سايي قصيت billets؟"
عيسى :" لا سفرتنا ماتستحقش تذاكر "
عديت بعينيا عليه حاولت نستوعب كلامو لي وصلني لفكرة وحدة.. عضيت على شفايفي نحكي
انا :" مفهمتش ؟ شمعناها ماتستحقش ؟"
بدني رجف على يديه لي تهزت وبعدتلي خصلة شعري لي طاحت فوق عينيا.. عدا بعينيه علياا وغزرلي درا كيفاه يحكي
عيسى :" يعني أحنا غدوة ماشين لسانتا جوليا "
شديت ضحكتي بالسيف ودورت وجهي نحكي
انا :" اما انا معادش نحب نمشي "
عيسى :" سايي تفاهمت مع خالد.. غدوة بش نمشيو "
تلفتتلو وحليت عينيا فيه نحكي
انا :" ياخي تحب كل شي يمشي على كيفك ؟ بكري تقول لا وتحبني نسمعك وتو تقول اي وتحبني نسمعك..انا ماعنديش رأيي معاك ؟"
تنهد بالشوي يحكي
عيسى :" قلي رايك وانا تو نسمعو "
ربعت يدي نحكي
انا :" رايي اني معادش نحب نمشي "
عيسى :" علاش؟ مش قلت تحب تمشي تشوف الشط ؟"
غزرتلو وشديت دمعتي بالسيف نحكي
انا :" هذاكا قبل ماتنغصلي فرحتي وتنقصلي من قيمتي قدام الناس "
عقد بحواجبو يحكي
عيسى :" انا عمري لاخممت انقص من قيمتك.. لارين انت كيفاه تخمم هكاا ؟"
مسحت عيني بكف صوابعي نحكي
انا :" انت وصلتني نخمم هكاا.. انت ليوم خليتني نخمم ف برشة حاجات عيسى "
عدا بعينيه عليا يحكي
عيسى:" حاجات كيما شنوة ؟"
دورت وجهي وضميت على شفايفي نحكي
انا :" مش لازم تعرف "
قلبي ضرب بقوة على يديه لي شدتني من يدي وين حسيت بدقات قلبي تسارعت خاصة قدام ريحتو لي ملأت عروش صدري.. يحكي
عيسى :" لارين اغزرلي..ديما نقلك ك تحكي معايا اغزرلي "
تلفتتلو نحكي
انا :" اما انا معادش نحب نغزرلك..خاطر كل مانغزرلك نتفكر عياطك عليا وقتها نزيد نتغشش اكثر"
عيسى:" لارين انا وعدتك معادش بش نعيط علياا "
عضيت على شفايفي نحكي
انا :" احلف والله.. واحلف برحمة بوك زادة "
تبسم يحكي
عيسى :" والله ورحمة بابا لاعاد نعيط عليك "
انا :" ومعادش تقلي كلام يوجع ومعادش تشدني من مرفقي خاطر يدك كبيرة ويابسة توجعني "
طبس راسو وغزر لمرفقي.. بدني رعش على صوابعو لي تعدات وين البقعة الزرقة لي بقات.. تنهد بالشوي ورجع غزرلي يحكي
عيسى :" مازالت توجع فيك ؟"
هزيتلو براسي لا نحكي
انا :" هآه "
عيسى:"تونجيب نعملك عليها ثلج بش تخف الزروقية"
انا :" لا خلاها مانحملش الثلج بارد "
هزلي براسو باهي من غير حتى كلمة.. عديت بعينيا عليه نحكي
انا :" انا مرة قتلك من بعد نور لقيتك انت.. ديما نرا الباهي لي عملتو معايا..ديما نقول عيسى معايا مانخافش..وين مانكون نحس روحي نطمن بوجودك.. مهما تعمل نلقى روحي مسامحتك..انت اكثر واحد من بعد نور حسبتو عيلتي..انت الوحيد لي بعد نور لي شاركتو دموعي وضحكي..انا كان نتصرف هكا خاطرني نرتاحلك.. هذا لكل انت خليتو يطيح فالماء ليوم..خليتني نحس اني غلطت ك حسبتك هكا..خاطر نور عمرها ماعملت معاياا هكا..خليتني نحس روحي وحدي كأني ضايعة..خليتني نحس كانو ماعنديش قيمة وقدر عندك ولي انامش مهمة عندك..خليتني نندم على كل شي..خليتني نحس اني نكرهك عيسى وانا مانحبش نحس هكا..كان تحبني نسامحك بلحق اوعدني انك معادش تخليني نحس هذا لكل "
قربلي وحط يديه على خدي مسحلي دموعي يحكي
عيسى:" نوعدك معادش نخليك تحس حتى شي من هذاا..لارين رد بالك تندم على حتى حاجة من هاذم.. انت بش تلقاني ديما..عمري لانخليك وحدك ضايعة.. نوعدك اني بش نكون عيلتك من بعد نور..لي صار ليوم وقبلو انساه..خاطر معادش بش يتعاود "
عديت بعينيا عليه نحكي
انا :" هاذي آخر مرة بش نصدقك فيها "
تبسم يحكي
عيسى :" هاذي آخر مرة نحكيو فيه فالموضوع هذا اصلا "
مسحت دموعي نحكي
انا :" غدوة وقتاه بش نمشيو؟"
حك على جبينو يحكي
عيسى:" مش قلت معادش تحب تمشي؟"
حليت عينيا فيه وقربتلو وجهي نحكي
انا :" بدلت رأيي ميسالش مسيو عيسى؟"
عيسى :" اكيد ميسالش "
انا :" قداه بش نبقاو غادي ؟"
تنهد بالشوي يحكي
عيسى:"4 ايام مانفوتوش.. لارين رمضان بقى عليه أقل من جمعتين لازمنا نرجعو "
هزيتلو براسي باهي وفركت عينيا من النعاس لي بدأ يغلبني نحكي
انا :" امم باهي "
عيسى:" جاك النوم ؟"
حطيت راسي على كتفو نحكي
انا :" اي "
عيسى:" قوم شد فرشك مالا "
هزيت راسي وغزرتلو نحكي
انا :" انت بش تمشي ترقد؟"
طبس راسو وغزرلي يحكي
عيسى:" ممكن نهبط نشوف خالد.. علاش تستحق حاجة ؟"
رجعت تكيت راسي على كتفو وغمضت عينيا نحكي
انا :" خليك شوي "
غمضت عينيا بالوقت وين حسيت براحة وانا بجنبو.. رغم كل شي صار وغشي منو لقيت روحي سامحتو خاطر حاجة داخلي صدقتو..كيما حسيت روحي معادش نتحمل بعدو اكثر..مهما يصير لقيت انو راحتي ف قربو هو..نتعاركو ونعاتبو اما بلا مايبعد..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
