#لارين_تحكي
حطيت المغرفة من يدي وغزرت لمايا لي شدتني من يدي.. قربتلي شوي تحكي
مايا :" رينو انت مليحة ؟ كان تحب خلينا نقومو "
هزيتلها براسي لا وتبسمت نحكي
انا :" لا ياروحي.. خلينا نكملو عشاء"
هزتلي براسها باهي ورجعت تاكل.. هزيت صحني وغزرت لعمتي نحكي
انا :" عمتي ميسالش تحطلي شوي سلاطة "
غالية :" اي ياماما هات "
خذات الصحن من يدي غرفتلي ورجعتهولي.. اول مامديت يدي بش ناخذ قطعة خبز جبدتها فيسع ك شفت يديه تحطت بش ياخذ هو زادة.. ريت ماايا كيف هزت ف بلاصتي وعطاتني.. تبسمتلهاا ورجعت ناكل..نفخت بالشوي ك سمعتها رجعت تحكي
سميحة:" اي شبيكم ساكتين.. احكولنا شعملتو ف فرنساا.. ووين مشيتو؟"
تبسمت وهزيت بحاجبي نحكي
انا :" زعمة كان نقلك وين مشينا بش تعرفهم انت لبلايص؟؟"
قحرتلي تحكي
سميحة :" مانعرفهمش..يكفيني نعرف بلادي الحمدلله ياربي ماتغربتش ف بلاد الغير..عديت عمري عايشة بين أهلى وناسي "
رسيت على سنيا بالقوي وهزيت بحاجبي نحكي
انا :" بلحق الحمدلله ولا راك تعبت بش تعلمت لغة أخرى.. خاطر مش لي يجي ينجم يتاقلم ف بلاد اخرى ويتعلم لغتهاا ويعيش 20سنة بين اهلها وناسهاا.. لازم عبد ذكي "
سميحة :" قصدك لي انا مش ذكية ؟"
تبسمت على جنب وهزيت كاسة الماء نحكي
انا :" مانعرفش "
عملت رشفة من الكاسة وتلفتت لجابر يحكي
جابر :" رينو كمل عشاك "
هزيتلو براسي باهي وهزيت معرفتي.. تلفت لعمتي كيف ضحكت تحكي
غالية :" تعرف رينو ماعندكش فكرة قداشني فرحانة و فخورة بيك وفت تفرجت ف الفيديو لي بعثهولي عيسى وانت فالمعرض.. راك طلعت محلاك مشالله على بنتي والمعرض يهبل خمسة وخميس"
تبسمت نحكي
انا :" عيشك عمتي.. فرحت انو عجبك "
غالية :" والله عجبنا لكل.. بقيت نهارين ولا اكثر انا وجابر نعاودو فيه ماشبعناش منو.. مبروك عليك النجاح ياماما "
انا :" يبارك فيك.. هذاكا ف الأصل نجاح نور.. رسمها هي ومعرضها هي.. الناس لي جاو لكل على خاطرها هي "
ريت جابر كيف عدا بعينيه عليا وطبس راسو.. تلفتت لعمتي كيف تبسمت ورجعت تحكي
غالية :" باهي قلي شعملت فالمعرض قبل ماتجي؟ خليت حد ثقة يشدو؟ ريقلت امورك لكل مش هكا؟"
انا :" تهنى عمتي.. قبل مانجي انا صفيت أموري لكل غادي وسكرت حساباتي لكل زادة..أموري لكل مريقلة ماتخافش "
ريتو كيف هز راسو معايا وغزرلي درا كيفاه.. تبسمت على صوت جابر يحكي
جابر :" الحمدالله ياربي..نعرف بنتي ذكية ويتعمل علاهاا "
انا :" عيشك جابر "
سميحة:" مالا معادش ناوية ترجع لفرنسا ؟ بش تستقرو هنا ؟"
عديت بعينيا علاهم لكل ورجعت غزرتلها نحكي
انا :" حتى كان بش نرجع لفرنسا مش تو "
جابر :" شمعناها؟ ياخي انت ناوية ترجع غادي ؟"
رجعت شعري وراء وذنياا نحكي
انا :" مانعرفش جابر.. ف الوقت الحالي انا ناوية نستقر هناا.. عندي حاجات ف مخي ناوية نبدأ فيهم كان أموري مشات ممكن نبقى على طول حذاكم وفرنسا نمشيلها كان وقت المعارض "
عدا بعينيه عليا وغزرلي درا كيفاه بش يحكي اما سبقتو عمتي تحكي
غالية:" رينو شنوة الجرح لي ف خدك هذاكا ؟"
نزلت شعري فيسع وين حسيت روحي تربثت ودخلت بعضي نحكي
انا :" جرح صغير عمتي ماتخافش "
دورت وجهي فيسع اول ماشفتو هز راسو وغزر لخدي.. سمعتها تحكي
غالية :" كيفاه مانخاقش تراه هز شعرك خليني نشوف"
انا :" عمتي والله ماهوش حاجة كبيرة... "
قصت علياا وقت غزرت للاخر تحكي
غالية:" عيسى شبيها لارين ؟ شكوون جرحهاا هكاكا ؟"
ريتو كيف هز راسو وعدا بعينيه علينا ساكت.. سبقتو ماياا تحكي
مايا :"عمتي لارين ماتحبش تحكيلك بش ماتضحكوش علاها..لبارح وهي تدور شافت كلب.. قربت هزتو وبقات تلعب معاه ياخي خبشها "
خذيت نفس مرتاح وتبسمت لماياا.. غزرت لعمتي تحكي
غالية:" هكا رينو ياخي صغيرة انت.. قلي عقمت الجرح؟"
انا :" اي عمتي.. عقمتو "
خذيت نفس طويل وحطيت لمغرفة نحكي
انا :" الحمدلله شبعت "
جابر :" صحة لبنتي.. قوم ارتاح راك تعبت ليوم "
تبسمت نحكي
انا :" تو ك نجي نرتاح "
عقد بحواجبو يحكي
جاب :" منين تجي؟ ياخي خارجة "
مسحت يدي وغزرتلو نحكي
انا :" اي Joseph يستنى فياا.. بش نمشي نقابلو انا ومايا "
سمعتها كيف ضحكت تحكي
سميحة:" هانا رجعنا "
قحرتلها نحكي
انا :" شتقصد بهانا رجعنا ؟.. كان رجوعي قلقك قلي تو نخرج "
سميحة :" علاش بش يقلقني.. انا قصدي رجعنا لدخول والخروج ف الليل "
قمت من بلاصتي وقحرتلها نحكي
انا :" والله انا هكا.. عجبك عجبك ماعجبكش أمورك "
ريت جابر كيف وقف قدامي يحكي
جابر :" لارين بنتي.. وجودك هناا عمرو لا قلق حد فيناا.. اما الوقت مخر تو.. مايجيش تخرج وحدك "
انا :" مانيش وحدي ماياا معاياا "
جابر :" يعني هكا المفروض نطمن ؟ زوز بنات وحدكم بش تخرجو؟ استنى وغدوة قابلو "
انا :" désolé جابر انا وعدت Joseph وهو يستنى فياا.. بش نخرج نشوفو الليلة.. ومذابياا تخليوني على راحتي.. خاطرني مانيش مستعدة نبدل من روحي ف حتي شي.. كيف ماجيت اول مرة بش نبقى هكاكا.. أمور لبستي وخروجي وصحابي هاذم أموري اذا تنجم تتقبلني هكا قلي كان لا زادة قلي خليني نمشي "
شدني من يدي يحكي
جابر :" ماعندك وين تمشي..من اول ماجيت قتلك لي انا واثق فيك.. اعمل لي يريحك "
هزيتلو براسي باهي وغزرت للاخر كيف وقف وخرج من غير حتى كلمة.. خذيت نفس طويل وغزرت لمايا كيف وقفت نحكي
انا :" هيا خلينا نحضرو رواحناا "
هزتلي براسها باهي ورجعنا للبيت.. سكرت الباب وراياا وتكيت بظهري عليه.. غمضت عينيا بالقوي و رجعت حليتهم محاولة مني بش نسيطر على بدني لي بقى يرعش..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
