#لارين_تحكي
عديت بعينيا عالبيت لي كانت متبدلة بكلهاا من الموبيلياا الجديدة للون الحيط لي كان ف اللون الأزرق.. بقيت واقفة ف بلاصتي مانجمتش ندخل.. تلفتت على صوتو بجنبي يحكي
جابر :" ماعجبتكش ؟"
غمضت عينيا بالقوي و رجعت حليتهم شديت دمعتي بالسيف نحكي
انا :" لا عجبتني.. محلاهاا عيشك جابر "
حلي الباب اكثر ودخل يحكي
جابر :" ادخل شوفهاا "
هزيتلو براسي باهي ودخلت.. كبست على ساكي أكثر عديت بعينيا عليهاا نغزر للفرش لي كان كبير ومفروش جديد.. تلفتت على صوت عمتي حذايا تحكي
غالية :" انشالله عجبك ذوقي.. مشيت اناوجابر هو حب يختار اما انا شديت صحيح قتلو انا ناخذ لبنتي "
قربت ناحيتها وطبست بستها من خدها نحكي
انا :" ربي يخليك ليا عمتي..تهبل البيت عجبتني والله.. حتى اللون نفس اللون لي انا نحبو "
ضحكت تحكي
غالية :" اي ماني سألت عيسى قتلو اسألي رينو شنوة أكثر لون تحبو.. عاد هو قلي الأزرق الفاتح "
عديت بعينيا عليها من غير حتى كلمة حسيت روحي شوي ودموعي يغلبوني.. تلفت لجابر كيف حل البلكونة يحكي
جابر :" شوف حتى لكراسي هناا بدلتهم..رانية قتلي لكراسي هاذم طالعين كيما الدرجيحة ياخي خذيت منهم زوز ليك انت وماايا.. نعرفك تحب السهرية ف البلكونة "
عديت بكف صوابعي على عيني وقربتلو.. عديت بعينيا عالبلكونة.. قلبي وجعني اول ماتفكرت كيفاه كنت نسهر هناا ونحكي معاها.. شديت دمعتي بالسيف نحكي
انا:" محلاها.. كل شي محلاه.. عيشكم "
مسح على شعري يحكي
جابر :" البيت حلات برجوعك.. صحة وفرحة لبنتي "
تبسمت بالسيف نحكي
انا :" ربي يخليك جابر "
عدا بعينيه عليا وطبس باسني من راسي يحكي
جابر :" نخليك تو ارتاح "
هزيتلو براسي باهي وتلفتت نغزرلو كيف خرج هو وعمتي.. اول ما الباب تسكر رميت ساكي على جنب وقربت سكرت البلكونة.. نزلت الريدو وتلفتت على صوت مايا تحكي
ماايا :" هانا وحدنا.. تنجم تبكي "
على كلمتها قربت فيسع وعنقتها.. حشيت راسي ف رقبتهاا وطرشقت بالبكاء.. حسيت روحي ضغطت روحي نهار كامل لين معادش أنجم.. مسحت على شعري تحكي
مايا :" كل شي بش يتعدا ويكون مليح "
شهقت بالشوي نحكي
انا :" ماياا انا مانحبش نبقى هناا..مانيش متحملة الدار هاذي "
بعدت علياا وشدتني من يدي.. قعدتني عالفرش وقعدت بجنبي.. حطت يداها على خدي ومسحتلي دموعي تحكي
مايا :" علاش رينو ؟ هاو جابر طلع باهي معاك وعمتو غالية محلاهاا وتحبك..مالا علاش ماتحبش تبقى ؟"
عديت بعينيا عليها نحكي
انا :" مانعرفش.. مانعرفش.. من وقت لي وصلت هناا وانا مخنوقة.. نحب نمشي ونبعد علاهم لكل "
شدتني من يدي وكبست علياا تحكي
ماياا :" انت تحب تمشي من جرة عيسى مش هكا ؟"
جبدت يدي منهاا ومسحت دموعي نحكي
انا :" مانحبش نسمع اسمو.. انا معادش نعرف حد ب الاسم هذا "
عدات بعيناها علياا تحكي
ماياا :" لارين هو شعملك؟ احكيلي شعملك بش خلاك توصل تقول هكا ؟"
خذيت نفس طويل وغزرتلها نحكي
انا :" ماعمل شي غير انو طلعني لفووووق ورماني.. خلاني نتلطخ ف سابع أرض وحدي.. على قد ما الطيحة منو كانت قوية مانيش عارفة كيفاه بش نقوم.. من بارح لليوم وانا قاعدة نعافر وحدي بش ننسى لي صار اما مانجمتش "
حطت يداها على خدي وعدات بعيناها علياا تحكي
ماياا :" حتى لو كان بلحق الطيحة قوية.. انت قدها وبش تقوم منهاا وبش ترجع تاقف.. كيف ماوقفت قبل.. انت من ليوم ماكش وحدك بش تعافر.. اما معاك.. انا مانعرفش هو شعملك اما خليني نقلك كلمتين الضربة لي ماتقتل/كش تقويك..رد بالك تبكي عليه.. مدامو سيبك وخلاك تطيح وحدك هو مايستاهلش دموعك.. وعادي انت بش تبقى هناا هاذي دار بوك.. خليه يشوفك كيفاه انت قوية وقتلي بعدت عليه ونسيتو ونجمت تتجاوزو.. رد بالك تظهرلو ضعفك.. رد بالك تخليه يسخف عليك.. انا وانت بش نعطيو القوة لبعضنا هناا.. ابكي عندي ف البيت هاذي والباب مسكر.. اما رد بالك يا لارين تظهرلو انت مازلت غارقة ف الطيحة.. رد بالك "
هزيتلها براسي اي نحكي
انا :" مانيش بش نظهرلو.. اصلا مانيش ناوية نغزر حتى ف عينيه.. هو قلي ابعد من ثنيتي.. قلي يزي ماك لاااصقة فياا..كلامو بقى معلم فمخي وفقلبي..وانا بش نعمل بكلامو.. بعدت عليه ومازلت بش نبعد.. بش نبعد لدرجة اني معادش بش ننطق اسمو حتى بيني وبين روحي.. بش ننساه لدرجة اني ك نلمحو حتى من بعيد معادش نعرفو "
مايا :" هو الخاسر.. وهو لي بش يندم مش انت.. بوهالي لي يضيع رينو من بين يديه "
تبسمت وهزيتلها براسي اي.. مسحت على شعري تحكي
مايا :" اياا قوم وريني وين التوالات نحب نعمل دوش.. وخليك معاياا فالدوش لا تدخل علياا اكا سميحة العو "
ضحكت نحكي
انا :" هههه مازلت متفكرة لقبها "
ضحكت وقامت من بلاصتها تحكي
ماايا :" هو انا نسيتو اما ك شفتها تفكرتو "
عديت بيديا على وجهي وضحكت.. قمت من بلاصتي نحكي
انا :" خلينا نفرغو الفاليزات ونجبدو حوايجناا وتو نوريك التوالات "
هزتلي براسها باهي وقربت جابت الفاليز.. حطتتها عالفرش وحلتها تحكي
ماايا :" تحب لحق.. عجبتني لبيت والخزانة كبيرة هكا تكفي حوايجنا "
انا :" اي حتى انا عجبتني "
قربت حذاها وبقينا نفرغو ف الدبش.. للحظة تخيلت كان جيت وحدي تو وماياا مش معايا شنوة كان بش يصير فياا.. حمدت ربي خاطرهاا معاياا خاطر هي الوحيدة لي تنجم تخفف عليا وانجم انا نفرغلهاا قلبي بكل شي.. معاها هي مانمثلش لي ف عندي نقولو كاني نحكي مع روحي ونكون متأكدة انها بش تسمعني وتشيل معاياا زادة..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
