#لارين_تحكي
طبست راسي شوي وغزرت لمايا كيفاه سارحة.. عقدت بحواجبي مستغربة نحكي
انا :" مايا وين سارحة؟"
هزت روحها شوي وهزتلي براسها لا تحكي
مايا :" لا مانيش سارحة.. قاعدة نتفرج ف الحمام "
عديت بعينيا عليها مستغربة وجهها كيفاه متبدل.. تبسمت نحكي
انا :" كمل كول قبل مايبرد لفريسكاسي بنتو سخون "
عضت شوي وغزرتلي تحكي
مايا :" ياسر بنين هذاا وحار "
انا :" اي شفت يهبل "
هزتلي براسها اي وبقات تاكل.. درتلها بكلي نحكي
انا :" احكيلي شصار بينك انت وادم ؟ وشبيك على عصابك بكري معاه ؟"
غزرتلي على جنب تحكي
ماايا :" ماتفكرنيش فيه.. واحد مايحشمش مش متربي.. تتصور قال علياا انا مهبولة.. على شوي والله كنت بش نهز يدي ونضربو..ف بالي مشيت لعيسى بش نشكي بيه ياخي طلع صاحبو.. زوز مايحشموش "
دوب تبسمت نحكي
انا :" وهو علاش قلك مهبولة لي مايحشمش ؟ شعمتلو انت ؟"
مسحت يداها وفمهاا وغزرتلي تحكي
مايا :" ماعندي ماعمتلو.. انا طلعت فالتاكسي قلي اهبط كنت بش نهبط على روحي اما هو طول لسانو معاياا و ف بالو انا بش نسكتلو..تعرف ندمت اني ماضربتوش بش نعلمو كيفاه يطول لسانو معايا "
ضحكت على شكلها كيفاه متغششة وتحكي بيداها.. نحكي
انا :" المرة جاية اضربو وانا معاك.. وزيد نخلطو عليه لآخر.. اصلا مانيش عارفة انا علاش يدخل فروحو ويقلو وصلناا "
عضت على شفايفها تحكي
ماايا :" تحب لحق رينو انا قتلو اول وحدة.. يا توصلنا ياا نشكي بيك لعمو جابر "
عديت بعينيا عليها وضحكت نحكي
انا :" يعني صار لي حبيتي عليه ومازلتي متغششة "
مايا :" اي والله مازلت نغلي عليه "
انا :" كهو شيهمك فيه.. انساه وراو بلحق كان جا يعرفك راو ماقالش هكاكا.. اصلا شنوة تستنى منو مدامو صاحب لاخر.. الزوز جلطامين وحديثهم ك منظرهم "
ضحكت تحكي
مايا :" هههه صحيح الزوز مناظر "
ضحكت وغزرت لتاليفوني لي نوقز وين شفت رقم Joseph.. رديت عليه فيسع نحكي
انا :" وينك نستناو فيك ؟"
يوسف :" هاني وصلت.. قولولي انتوما وين قاعدين؟"
انا :" احنا وين لي يبيع فريكاسي لي جيتو انا وانت وقت مشينا للسفارة "
يوسف :" باهي خليكم غادي.. دقيقة ونجي "
انا :" باهي فيسع "
علقت عليه وغزرت لمايا خبرتها بأنو Joseph وصل.. شوي وقت وريتو جاي يجري مقابلناا.. تبسمت وقمت من بلاصتي ك وصل حذانا نحكي
أنا :" وينك Joseph لتو ؟"
حط يديه على شعري نعكشهولي يحكي
يوسف :" هاني جيت دڤلتي الله غالب تشديت مع لولاد "
غزر لماايا وقرصها من خدها يحكي
يوسف :" وينك عسلتي توحشتك "
قامت من بلاصتها وضحكت تحكي
مايا :" حتى انا توحشتك برشة.. ايا قلنا وين بش تهزنا ؟"
عدا بعينيه علينا يحكي
يوسف :" شرايكم نمشيو للمدينة العربي..فما قهوة اسمها "العنبة" محلاها "
غزرت لمايا ورجعت غزرتلو نحكي
انا :" اي خلينا نشميو "
هزلي براسو باهي ودور بيديه علياا وبقينا نتمشاو.. عديت بعينيا علي نهج الاسواق لي دخلنا فيه.. خذيت نفس من ريحة لبخور لي كانت تعجعج ف الشارع مخلطة بريحة لماكلة لبنينة.. غزرت لمايا وين شفتها سارحة هي زادة مع المحلات العربي وين يبيعو الجبايب والشواشي والكساوي التقليدية.. تلفتت على صوتو يحكي
يوسف :" شرايك دڤلتي مش السبادري جاني قد قد "
طبست راسي غزرت لساقيه ورجعت غزرتلو نحكي
انا :" صحة لخويا جاك يهبل "
باسني من راسي يحكي
يوسف :" عيشك دڤلتي.. اما تعرفي ذوقك عجبني.. هذا احلى من لي انا بعثتهولك "
تبسمت ورجعت غزرت قدامي وين تفكرت نهار لي مشيت انا وهو للبوتيك وكيفاه هو اختار معايا.. حسيت شوي ودموعي يغلبوني وقت استرجعت النهار هذاكا من أولو..من وقت مشينا للمرسم حتى للمطعم.. على قد ماكنت حاسة بفرحة وقتها على قد ماحاسة روحي نتوجع تو ك نتفكرهم الايامات هاكم..ياريتني انجم ننسى اما مانجمتش.. نلقى روحي من اقل حاجة نتفكرو ونتفكرهم.. للحظة هاذي مانيش مصدقة كيفاه كان معايا كيفاه خلاني ننسى وجهو الحقيقي وفجأة ظهرو قدامي بالطريقة هذيكا.. غصة شدتني فحلقي وقت تفكرت كلامو ليا..عمري ماتوقعت انو بش يطلع كذاب بالطريقة والدرجة هاذي.. خذيت نفس طويل وحاولت ننسى كيما كل شي وكل يوم اما شي أقوى مني مخلي النسيان صعيب علياا.. قداه نكره روحي وقت نلقى عقلي يخمم فيه رغم كل شي عملو معاياا وقت نلقى روحي مازلت متذكرة كل شي عشتو معاه بالتفصيل.. كلامو ووعودو لياا.. حتى ضحكتو وغزرتو مانجمت ننسى شي من هذاا.. فقت من سرحتي على صوت ماايا تحكي
ماياا :" واووو تهبل القهوة "
هزيت راسي وغزرت للقهوة لي كانت ف وسط نهج ضيق وكراسيها على برا.. عديت بعينيا على شجرة العنب لكبير لي كانت مظللة عالكراسي.. تبسمت ك ريتو شدني من يدي وتبسم يحكي
يوسف :" ك تبدأ معاياا مانحبك تسرح ف شي.. هياا ايجاا خلينا نقعدو "
هزيتلو براسي باهي من غير حتى كلمة..حسيت روحي مازالت غارقة فدوامتو ومانجمتش نخرج منهاا.. لقيت كلامي ضاع علياا وتفكيري تشتت معاه مرة اخرى..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
