#لارين_تحكي
خذيت نفس طويل وتلفتت على صوتو بجنبي.. عدا بعينيه علياا وغزرلي يحكي
نزار :" مدموازال سافاا ؟"
هزيتلو براسي اي نحكي
انا :" وي سافاا مرسي.. وسامحني مرة أخرى بلحق ماقصدتش "
تكا بظهرو لتالي وتبسم يحكي
نزار :" عالظاهر ساعتين بش نعديوهم وانت تطلب ف السماح وانا نقلك ماصار شي "
تبسمت نحكي
انا :" لا لا هاني سكتت.. انا جيست قلت هكا خاطر خفت لا نكون قلقتك "
ضحك يحكي
نزار :" والله كان ماجيتش متعود راني ممكن تقلقت "
ضيقت عينيا فيه نحكي
انا :" كيفاه متعود ؟"
نزار :" اختي كيفك.. bon هي اصغر منك.. اما كل ماتطلع بجنبي يدي تتشل منهاا.. فبالي ليوم بش نرتاح ياخي لقيتك انت.. ظاهر مكتوب على يدي ف كل سفرة تتضغط "
شديت ضحكتي بالسيف نحكي
انا :" انت تو زدت حسستني بالذنب "
نزار :" لا نفدلك معاك..لي صار عادي هاني قتلك اختى كيفك.. خوف طبيعي "
تبسمت وهزيتلو براسي اي من غير حتى كلمة.. خذيت تاليفوني حطيت غناية ام كلثوم وجبدت كراسة الرسم متاعي والقلم من الساك بش نعدي الوقت.. طبست راسي وبقيت نكمل فرسمة بديت فيها عندي ايامات وهي عبارة على تصميم فستان كيما لي كانت ترسم فيهم نور حبيت نتعلم كيفها.. عضيت على شفايفي بقيت نسترجع ف دروس نور لياا وطريقتها ف الرسم وين غطست اكثر مع التصميم وفرد وقت ندندن ف الغناية لي سرحت معاها
انا :" الزمن حيدوقك في البعد ناري.. الزمن هوا الي هيخلصلي تاري..كل هجر وكل ليل سهرتهولي..وكل غدر وكل جرح تركتهولي..كله هترده الليالي.. الليالي عليك بدالي والزمن.. اشكي مش هسال عليك.. ابكي مش حرهم عينيك.... "
سكتت وقت ضميت على شفايفي ك رجعت تفكرتو وين لقيتو رجع استحوذ على تفكيري هو وكلامو غير اخر غزرة شافني ووجعني بيهاا.. تلفتت على صوتو بجنبي يحكي
نزار :" ام كلثوم تأثيرها قوي حتى خلاتك تخرج قطعة كيف هاذي "
ريتو ك غزر للفستان لي قدامي ورجع غزرلي.. تبسمت نحكي
انا :" عجبتك ؟"
مد يديه ناحيتي يحكي
نزار :" ميسالش نشوفها ؟"
هزيتلو براسي اي وعطيتو الكراسة.. عقدت بحواجبي مستغربة وانا نشوف فيه كيفاه يغزرلها بكل تركيز ويقلب فيهاا.. تلفتلي يحكي
نزار :" التصميم هذا متاعك انت ؟"
انا :" اي "
نزار :" مميز.. عجبني.. عندك تصاميم اخرى خليني نشوفهم "
مطيت شفايفي وخذيت من يديه لكراسة.. بقيت نقلب فالأوراق حتى وصلت لزوز تصاميم لي سبق ورسمتهم نحكي
انا :" فما هاذم.. عندي قداه من لي رسمتهم.. مازلت قاعدة نتعلم "
خذا الكراسة من يدي وعدا بعينيه علاهم.. هز بحاجبو وغزرلي درا كيفاه يحكي
نزار :" قاعده تتعلم ؟صدقني مش مجامله اما تفاصيل التصاميم متاعك متاع انسانة محترفة وعندها خبرة سنين طويلة ف مجال الازياء "
انا :" هو تنجم تقول كلامك صحيح.. انا لياا سنين فالمجال هذاا.. نور.. نقصد امي كانت رسامة ومصممة ازياء زادة.. هي علمتني كل قواعد الرسم "
تبسم يحكي
نزار :" تشوقت نشوف رسم نور.. يعني كان الطفلة خرجت القطع الفنية هاذم ياترى الام كيفاه.. ساعة قبل كل شي خليني نعرفك بروحي انا نزار "
عديت بعينيا عليه وتبسمت على كلامو.. حطيت يدي ف يديه وين كبس علياا بالوقت نحكي
انا :" وانا لارين "
عدا بعينيه عليا وغزرلي درا كيفاه يحكي
نزار :" حتى اسمك مميز.. تشرفت بمعرفتك لارين "
تبسمت وجبدت يدي من يديه..رجعت غزرت للرسمة لي كانت ف يديه ورجعت غزرتلو نحكي
انا :" سامحني ف السؤال.. اما انت منين تفهم فالتصاميم؟ ياخي انت رسام ولا مصمم؟"
ضحك وهزلي براسو لا يحكي
نزار :" هههه لاهذا ولاهذا.. اماانا نخدم ف مجال الازياء..كنت فنخدم مع دار ازياء ***** اكيد تعرفهم"
حليت عينيا على وسعهم نحكي
انا :" bien sur نعرفهم..هاذي أشهر دار ازياء فباريس.. انت بلحق تخدم غادي ؟"
نزار :"اي بلحق.. اما كنت حالياا معادش معاهم "
شهقت بالشوي نحكي
انا :" علاش ؟ مستحيل تلقى دار ازياء كيفهم.. ساعة انت شنوة تخدم ؟"
نزار :" انا كنت رئيس تنفيذي غادي واكيد بش تقلي كيفاه تسلم ف منصب كيف هذا ولي انا راجل مانفهمش وضيعت فرصة حياتي "
هزيتلو براسي اي وضحكت نحكي
انا :" بصراحة هذا لي خممت فيه.. يعني انا فبلاصتك مستحيل كنت نتخلى على منصب كيما هذا "
تنهد بالشوي يحكي
نزار :" الظروف تخليك تتخلى ساعات.. انا ضيعت أكثر من 10سنين من عمري ففرنسا وجا الوقت لي حسيت روحي تعبت فيه من الغربة والوحدة.. عندي مسؤوليات ف تونس منهم هوما اضطريت نتخلى "
عديت بعينيا عليه وهزيتلو براسي اي نحكي
انا :" فهمتك.. وعذرتك زادة خاطرني تعديت بالموقف هذا.. كلنا مرينا بظروف خلاتنا نتخلاو على حاجات"
عدا بعينيه عليا وغزرلي درا كيفاه يحكي
نزار :" اما انشالله الظروف هاذي ماخلاتكش تاقف "
عقدت بحواجبي مستغربة نحكي
انا :" مفهمتكش؟"
دارلي بكلو يحكي
نزار :" مثلا انا.. كنت خايف ديما من النهار لي نوصل فيه للمرحلة هاذي متاع التخلي.. وليت حضرتplan b.. بش نهار لي ظروف تحكم فيا وتكون أقوى مني.. نلقى حاجة وراياا ناقف بيهاا بش انجم نتجاوز الظروف هاذم.. انت حضرت plan b متاعك ولا الظروف وقفتك ف بلاصتك ؟"
عديت بعينيا عليه وين ركزت مع كلامو مليح.. للحظة حسيت روحي بلحق اني واقفة ف بلاصتي..حكاية
" إلياس " وخوفي منو لي خلاوني نسلم ف قرايتي اول مرة..اصلا عمري ماخممت فخطة بديلة خاطرني كنت نرا حياتي مع نور عمري لا تخيلت نهار لي هي تمشي فيه وتخليني..نور كانت هى خطتي الأبدية لي ضاعت مني بعد موتها وين لقيت روحي وقفت وضعت وحدي..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
