#عيسى_يحكي
خرجت من السالدون بعد ماعملت دوش وريقلت أموري.. غزرت للوقت وين لقيت العشرة فاتت.. عديت بيديا على وجهي وكبست على جبيني من لوجيعة الي بقات ف راسي من قلة النوم.. لبارح بعد مارجعناا كلمني خالد وشد صحيح بش نهبط نسهر معاه.. نفخت بالشوي ك تفكرتها.. كيفاه بقات فبيتها ماخرجتش..اكيد راي متغششة وهازة خشمها اما خلاها هكاكا بش تفهم انو لي تعمل فيه مايجيش.. الف مرة نوصيها تنقص من الضحك والحديث مع خالد.. غير تصرفاتها متاع الصغار.. لميت البيت كيما جا وهزيت تاليفوني حطيتو فجيب الشورط وخرجت.. عقدت بحواجبي مستغرب حسها لي مفماش وهي لبارح قالت بش تقوم بكري.. لحظتهاا قربت لباب بيتها بش نفيقها تخرج ماتبقاش حابسة روحهاا هكا.. دقيت الباب مرة وثنين وشي صوتها مفماش.. رجعت دقيت نحكي
انا :" لارين.. لارين حل الباب "
دقيت بالقوي اكثر ورجعت نحكي انا
انا :" لارين نحكي معاك "
قربت اكثر للباب وين الحس كان بايت.. لحظتهاا فكرت انو ممكن تكون ف السالدون.. خليتها ونزلت عديت بعينيا عالشاليه وين كان فارغ.. مشيت فيسع للكوجينة عملت قهوة وخرجت لتراس لي مقابل لبحر.. عملت رشفة من الفنجان وحطيتو عالطاولة.. قربت لدربوز وعديت بعينيا عالبحر.. حليت عينيا على وسعهم اول ماغزرت للشط وين قابلتني هياا.. رسيت على سنيا بالقوي من لعصب لي خضني.. الفر/خة ف بالي بيها فبيتهاا وهي لبراا.. كيفاه تخرج من غير ماتخبرني.. غزرتلها كيفاه تحكي مع شكون ولا على بالهاا.. لحظتهاا خرجت فيسع بش نمشيلهاا.. اول ماخرجت ريتها ك كملت حديث ومروحة.. غزرتلها ك هزت راسها معاياا وحلت عيناها فيا.. وقفت ف بلاصتهاا وباقي تغزرلي على اساس تخاف هي ولا تقدر.. قدمتلي شوي ورجعت وقفت.. مانعرفش كيفاه وصلت قدامها.. عليت ف صوتي شوي نحكي حكي
انا :" يااااخي انت شتعمل هناا ؟"
بلعت ريقها تحكي
لارين:" عيسى بالشوي تو نفهمك.. برحمة بوك لاتعيط"
حليت عينيا فيهاا نحكي
انا:" قتلك شتعمل هنا؟؟ كيفاه تخرج بلا ماتخبرنييي "
عضت على شفايفها تحكي
لارين:"حبيت نتمشى شوي وحدي وكنت راجعة والله"
قحرتلها نحكي
انا :" قدامي "
هزتلي براسها باهي وقربتلي.. اول ماتحركناا وقفت على صوت ورايا تحكي
جيهان:" بونجور مسيو "
تلفتت وراياا وغزرتلها.. عديت بعينيا عليها نشبه عالوجه هذا نحكي
انا :" تفضل "
ضحكت تحكي
جيهان :" كانك نسيتني ؟"
هزيت بحاجبي نحكي
انا :" علاش نعرفك انا اصلا حتى ننساك؟"
غزرت للارين ك دورت بيداها على مرفقي قربتلي تحكي
لارين:" تتفكرها الشعباطة لي عرضتنا فالطيارة.. هاذي هي "
رجعت غزرتلها وين تفكرتها..قربتلي شوي تحكي
جيهان :" فرحت اني شفتك مسيو.. سألت عليك الصغرونة قتلي ماجيتش معاها "
انا :" باهي "
غزرت للارين نحكي
انا :" هياا لارين "
نفخت بالقوي ك رجعت وقفتني تحكي
جيهان :" ماتخافش علاهاا..اختك كانت معايا "
انا :" باهي "
ريتها ك غزرت وراناا وضحكت تحكي
جيهان:" خالود.. بونجور "
تلفتت بالوقت وين شفت خالد قربلناا.. للحظة حسيت روحي مش فاهم شي عالصباح.. ريتو ك قرب وضحك يحكي
خالد :" بونجور.. شتعملو هناا ؟"
جيهان :" شي قاعدة نسلم عالمسيو "
غزرلي ورجع غزرلها يحكي
خالد:" ياخي تعرفو بعضكم ؟"
جيهان :" اي تنجم تقول "
لارين :" لااا مانعرفوش بعضنا..عرضتنا فالطيارة من تونس لباريس كهو "
خالد:" باهي مالا خليني نعرفكم ببعضكم.. هاذي جيهان.. جيجي صحاب انا وهي عرفتها فليون وصلت مع الفجر.. وهذا عيسى صاحبي وخوياا عشرة سنين وهاذي لارين...."
قصت عليه وقربتلي مدت يداها تحكي
جيهان :" تشرفت بمعرفتك مسيو عيسى.. ياسر فرحت بالصدفة هاذي "
غزرت ليداها ورجعت غزرتلها نحكي
انا :" نكمل نعرفك انا مالا "
غزرت للارين لي كانت تقحرلها ورجعت غزرتلها نحكي
انا :" لارين بنت خالي "
عدات بعيناها علينا وهزت بحاجبها تحكي
جيهان :" صار مش اختك؟"
لارين:" لا مانيش اختو.. ميسالش ماهو "
ضحكت تحكي
جيهان :"هههه اكيد ميسالش..اصلا مفماش فرق بنت خالو يعني اختو "
قحرتلها وغزرت لخالد ك قربلناا يحكي
خالد :" هيا مدام كملتو تعارف خليناا نقعدو شوي "
انا :" انا ولارين راجعين للشاليه "
خالد :" شاليه شنوة؟ مش تفاهمناا بش نعملو غطسة "
انا :" خلي بعد... "
خالد:" ياولدي توخير.. مدام لبحر فارغ "
عديت بيديا على وجهي نحكي
انا :" باهي نمشي للشاليه فيسع ونجي "
خالد:" خليني نجي معاك نبدل حوايجي انا زادة "
غزرت للارين وين شفتها واقفة ساكتة ووجها مقلوب.. شديتهاا من مرفقها وجبدتها على جنب نحكي
انا :" شبيك ؟"
عدات بعيناها علياا تحكي
لارين :" عيسى المنظر هاذي وترتني.. شبيها مازالت واقفة معانا "
تبسمت على جنب نحكي
انا :" مش لبارح تسالي على صحاب خالد.. هاي جاتك هاذي اهوكا بدلي الجو مليح "
قحرتلي تحكي
لارين :" ياخي تفدلك ؟"
انا :" شتحبني نعمل..كان جات ف دار بابا راني طردتها"
نفخت بالشوي تحكي
لارين:" ياريتها جات ف دار ف بوك "
قحرتلها نحكي
انا :" هياا خلينا نمشيو "
غزرت لخالد ك قربلنا يحكي
خالد :"خلاها لارين هاني وصيتهم يحضرولها فطورها"
غزرتلها نحكي
انا :" تحب تفطر ولا تمشي معايا؟"
لارين:" خليني نفطر وانت ماتبطاش "
انا :" اي دقيقة ونرجع..ابقى ف الريستو ماتتحركش.. برا امشي اقعد مدامني هناا "
هزتلي براسها باهي ومشات.. نفخت بالقوي ك ريت لخرى تبعتها.. غزرت لخالد نحكي
انا :" هياا فيسع "
رجعت فيسع لشاليه بش نبدل حوايجي ونرجع فيسع قبل ما لخرى تعمل حاجة تستفز لارين وتخلاها تغزل..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
