#عيسى_يحكي
تلفتت على جنب وين شفتها غفات..حتى هي الفر_خة قريب 4 سوايع عدتهم تحكي ولاسكتت.. راكيت الكرهبة على جنب وقربتلها.. تبسمت ك ريتها معنقة باكو الشيبس.. نحيتو من يداها حطيتو على جنب مع باقي الماكلة.. الكرهبة رجعتها كوجينة.. نفخت بالشوي ك ريتها كيفاه مفتفتة تحتها وروبتها توسخت بالشكلاطة.. حسيت كانو معاياا طفلة صغيرة.. رجعت قربتلها وخذيت منديل مسحتلها يداها وفمها لي كانو بفتفات الشيبس..هبطتلها الكرسي متاعها شوي بش تبدأ مرتاحة.. وطيت فالغناء وشديت الثنية.. نزلت عالفيتاس شوي بش نوصلو فيسع.. حتى خالد ماحبيتش نفيقو.. حبيت انا نكمل الثنية مدام هوما ساكتين انا مرتاح.. نفخت بالشوي ك ضربتني بيداها على جنبي وقت تحركت.. ساعات نحس ماغلب علياا حد ف دنياا قداهاا..عديت بيديا على وجهي وكملت الثنية.. مانعرفش قداه تعدا وقت وانا نسوق حتى ريتو من لمراياا ك قام يحكي
خالد:" ياخي وين وصلنا ؟"
انا :"صحة النوم..احنا تو فTurin وقريب نخرجو منها "
خالد :"مشالله على خوياا.. ساعة شبيك قصيت منا ؟"
انا :" هكا أقرب "
خالد :' باهي أقف خليني نكمل انا.. برشة عليك "
انا :" ساعة كلم الراجل متاع المركب.. قلو يحضرها بش مانبقاوش نستناو "
خالد :" باهي هاني بش نكلمو "
هزيتلو براسي باهي من غير حتى كلمة وبقيت نسوق ونسمع فيه يحكي مع الراجل.. اول ماكمل غزرلي يحكي
خالد:" يرحم بوك أقف فالاستراحة الجاية "
نفخت بالقوي من لعصب لي حسيتو منهم الزوز.. كل مرة وحد يوقفني هكا..شوي وقت وراكيت الكرهبة.. غزرتلو نحكي
انا:"اسمع ماتبطاش..مانيش ناوي نبات فالشارع انا "
ضحك يحكي
خالد :" باهي نمشي فيسع ونجي وسع بالك "
اول ماهبط تلفتتلها وين شفتها مازالت راقدة.. طبطبت على كتفها بالشوي نحكي
انا :" لارين..لارين اياا فيق "
تململت شوي وحليت عين وحده تحكي
لارين :" وصلنا ؟ "
انا :" لا مازلنا "
لارين :" مالا علاش تفيق فياا "
خذيت نفس طويل نحكي
أنا :" لارين فيق بش تطلع من تالي.. خالد فاق "
هزت روحها وتكسلت تحكي
لارين:" باهي.. ساعة قلي قداه مازاللنا؟"
انا :" ساعة ونص ونوصلو للميناء لي فgènes.. نطلعو فالمركب نبقاو 7 سوايع بش نوصلو "
نفخت بالقوي تحكي
لارين:" مطولها الثنية تعبت "
رسيت على سنيا بالقوي نحكي
انا :" شوفي انا من ربي عصابي بدأت توتر من طول الثنية.. مالا انت تسكتي كلمة لااا "
عدات بعيناها علياا وهزتلي براسها باهي تحكي
لارين:' باهي هاني سكتت "
اشرتلها بعينيا نحكي
انا :" هزي كوجينتك هاذي معاك واطلعي من تالي.. وكلمة لااا.. التفوريخ متاع بكري مانحبش نشوفو قدام الراجل "
هزتلي براسها باهي تحكي
لارين:" باهي ماكش بش تشوفو "
ريتها ك تلفتت تلم فكل شي وهبطت.. طلعت من تالي وغزرتلي تحكي
لارين:" ياخي خالد وينو؟"
انا :" تو يجي "
لارين:" باهي انت فطرت ؟"
انا :" ماعينيش "
لارين :" خير مالا تو نكملهم انا "
قحرتلها من لمرايا نحكي
انا :" خلي معاك للراجل "
لارين :" جبتو ونسيتو انا "
دورتلها بالوقت وقحرتلها نحكي
انا :" يعني كنتي ف دارهم.. راكبة فكرهبتو وماشية لدارو تو وتتقبحي هكا "
ذبلت عيناها ووطات ف صوتها تحكي
لارين :"والله وراسك ياعيسى نفدلك..كنت بش نخليلكم الزوز "
عديت بعينيا عليها نغزر لترهدينهاا كيفاه فيسع ماتتقلب.. قحرتلها ورجعت غزرت قدامي وين شفت خالد جا.. نزلت وبدلت الكرسي.. ريتو ك طلع بجنبي وغزرلنا يحكي
خالد :" شدو هاني جبتلكم ماكلة "
خذيت من يديه نحكي
انا :" سوق "
خدم الكرهبة وشد الثنية..حليت الساشي بش ناكل حاجة.. غمضت عينيا بالقوي ورجعت حليتهم على صوابعها لي قرصوني من كتفي من تالي.. تلفتتلها نحكي
انا :" شبيك ؟"
قربتلي شوي وهمست ف وذنيا تحكي
لارين :" شنوة جابلك خالد "
تبسمت وخذيت سندويتش شديتو وعطيتها الساشي نحكي
انا:" شوف وحدك "
خذاتها من يدي ورجعت قعدت..غزرتلها من لمرايا وين شفتها نزلت البلار وبقات تاكل وتغزر للثنية.. تنهدت بالشوي ورجعت غزرت قدامي ناكل حتى كملت.. بقيت نحكي مع خالد كل مرة ف موضوع حتى وصلناا للميناء.. سمعتها تحكي
لارين:" وصلنا سايي ؟"
انا :" اي "
هبطت وين هي هبطت معايا.. قربت مع خالد نزلت الفاليزات وخليتو بش يراكي الكرهبة ويرجع.. دوب تبسمت كريتها واقفة تغزر للبحر وشعرها يتطاير وراهاا.. اول ماقربتلها غزرتلي وتبسمت تحكي
لارين:" تعرف حاسة روحي فرحانة خاطر بش نطلع ف يخت اول مرة.. ساعة اناهو هو؟ "
اشرتلها بيدي عليه نحكي
انا:" هذاكا "
ضحكت وغزرتلي تحكي
لارين :" محلاه كيما لي نراه ف الأفلام.. متاع خالد ؟"
انا :" لاا.. مش متاعو "
هزتلي براسها باهي ورجعت غزرتلو..غزرت لخالد ك رجع.. وقف بجنبنا وعيط لراجل لي يسوق فالمركب.. طلعوا الفاليزات وطلع يحكي
خالد:" اياا اطلعوا.. الجو بدااا "
دوب تبسمت وقربت لليخت طلعت وغزرتلها.. مديتلها يدي نحكي
انا :" ايا اطلع "
عدات بعيناها علياا تحكي
لارين :" عيسى نخاف لا نطيح "
انا :" لارين ماتخافش.. شد ف يدي واطلع "
عضت على شفايفها ومدت يداها.. شدتني وين انا كبست علاها.. اول ماطلعت ساقيهاا طبست ودورت بيدي لخرى على جنبها وطلعتها ف لحظة.. ريتها ك ضحكت وغزرتلي وين وجهها قابل وجهي.. عدات بعيناها عليا وغزرتلي درا كيفاه تحكي
لارين:"مدام انت طلعتني حط فبالك انت بش تهبطني "
تبسمت نحكي
انا :" باهي "
رخفت يدي منها وغزرتلها ك قربت لنص اليخت.. تبسمت ك شفتها حلت يداها وطلعت راسها.. غمضت عينياها وبقات تستحلى ف نسمة لبحر..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
