#عيسى_يحكي
طلعت فيسع لدار لفوق بعد ماخليت ادم يهبط ويسبقني للورشة خاطر فاللحظة هاذي مانجمت نعمل شي.. كل لي كنت بحاجتو اني نبقى وحدي شوي.. دخلت للدار ولطخت الباب وراياا من لعصب لي بقى يهز فياا ويحط.. عديت بيديا الزوز على وجهي وبقيت ماشي جاي نخمم ف لي سمعتو منها بكري.. رغم الغزول لي بقى ماكني نهار كامل خاطر خبات اما وقت ريتها قالت الحق عالطاولة حسيت روحي ارتحت وبردت خاطرني نعرفهاا مليح ماتكذبش وماتعملش حاجة غالطة وين ثقتي فيها زادت على اول مرة اما وقت سمعت باقي حديثها ماعرفتش كيفاه شديت روحي عالطاولة قدامهم.. كيفاه تاخذ قرار كيف هذاا وحدهاا من غير ماترجع لحد..دمي فور مني ووقت تفكرت اسم الراجل لي بش تخدم معاه وين استرجعت نهار الطيارة كيفاه كانت تحكي معاه وتضحك غير انو طلب منها قدامي يوصلهااا.. من وقتهاا وانا نغلي عليه اما لحظتهاا هديت روحي خاطر كنت عارفها متغششة وانا السبب.. ف بالي عملت هذاكا لكل بش توترني كيما العادة ماتوقعتش لحكاية بش توصل لهناا وانو بش يحكي معاها ف موضوع كيف هذا وتبقى على تواصل معاه لتو وتوصل حتى تخدم معاه..كان ف بالي هذاا لكل بش يصير راني مستحيل خليتهاا تبقى حذاه لحظة وحدة اصلا ندمت كيفاه ماكسرتلوش وجهو وقت طلب منهاا يوصلهاا..كبست عالبونية متاعي بالقوي وقت تفكرت طريقة حديثها عليه وكيفاه تجبد ف اسمو كاني تعرفو عندها سنين.. اصلا للحظة هاذي مانيش فاهم كيفاه تاثق ف عبد عرفتو ف نهار.. عديت بيديا على شعري وكبست على رقبتي من لعصب لي حسيتو من اكا الطحان خالد..حسابو قاعد يكبر معايا كان مانخليهوش يندم كيفاه عمل هذا لكل من وراياا انا مانتسماش.. نفخت بالشوي وترميت عالفوتاي تكيت براسي لتالي وبقيت نخمم شنوة بش نعمل تو كيفاه بش نتحمل موضوع خدمتهااا هذاا مع الكلب لي طلعلي كيفاه بش نطمن علاهاا مع حد اخر وبعيدة علياا رغم كل شي انا مانحبش نحرمهاا من الحاجة لي تحبها خاطرني انا اكثر واحد ريت فرحتها ف فرنساا بالمعرض كيما كنت حاضر على دموعهااا وقت خلاتو هو والمرسم وجات هناا.. تنهدت بالشوي وقت تفكرت كلامها بكري وضحكتهاا وهي تحكي عالخدمة وين حسيت روحي بلحق رغم غشي فرحت مع فرحتها.. للحظة حسيت اني مش فاهم روحي انا فاش نحس بالضبط.. من جهة مانيش منجم ناثق ف الراجل لي طلع فجأة هذاا و من مقابلة وحدة قدملهاا خدمة كبيرة كيف هاذي لا وفوقها بش يعاون صاحبتها.. حسيت روحي مش منجم نأمن علاهاا معاه ولاحتى مع غيرو حاجة أقوى مني مخليتني نخاف علاهاا خاطر انا اكثر واحد صرت نعرفهاا كيفاه تتعامل مع الناس ساعات كان نلقى نخلاها تحت عينيا بش حد مايضرهاا رغم اني عارف انو هذا مازال مش من حقي تو وأنها مستحيل تخليني حتى نسأل اما زادة مانجمش نبقى مربع يدي هكاا خاطر ساايي لارين صارت خط أحمر سوى هي قبلت ولا لا شي ماينجم يبدل لحقيقة هاذي..مستحيل نقبل انهاا تتضر حتى كان مني انا اصلا يزي لي عملتو فيها ولي بقيت نادم عليه لتو مانحبش نزيد الطين بلة ونخلى غشي يفسد الأمور اكثر ونخلاهاا تنفرني اكثر واكثر وقتلي نخمم كيفاه نصلح هذاا لكل..ومن جهة اخرى مانحبهاش تتحرم من الحاجة لي تحبهاا بالعكس نحب نراها ناجحة وتعمل لي تحب عليه لكل المهم عندي نرا فرحتها.. عديت بيديا الزوز على وجهي واستويت ف قعدتي نفكر شنوة بش نعمل تو.. حسيت الفكرة صعيبة علياا يمكن خاطرني جاتني على غفلة هكاا وماكنتش متوقع هذا لكل رغم اني مرتاح انهاا مش بش تراه ديما كان نهارين ف الجمعة اما حسيتهم برشة خاطرني وقتها بش نكون متحير علاهاا خاطرني مانعرفوش الكلب هذاا ومانعرفش كيفاه يخمم.. لي ريتو ف حياتي خلاني مستحيل ناثق بسهولة ف عبد مازلت ك عرفتو ف مابالك بهذا لي مانعرف على والديه شي اما مصيري نعرفو مليح وعينيا بش تكون عليه ونشوف اذا انا غالط خاطرني مارتحتش حتى للاسمو ولا بش نطلع صحيح.. خذيت نفس طويل وغزرت للوقت وين لقيت مازالت ساعة على صلاة لعشا.. قمت من بلاصتي ودخلت لتوالات قربت لرخامة حليت السبالة وبقيت نغسل ف وجهي برشة مرات بش نبرد شوي ونهدي روحي.. سكرت السبالة بعد ماريقلت أموري لكل ومشيت للبيت بدلت حوايجي فيسع ورجعت للصالة.. هزيت تاليفوني لي كان فوق الفوتاي وحطيت رقم كمال التاكسيستي وين كتبتلو ميساج خاطر عارفو يخرج يعمل ضربات بالتاكسي تو مانجمش نراه..
" صحة شريبتك كمال.. كان تعمل مزية ابعثلي العنوان لي وصلت ليه بنت خالي ليوم بش نوصلهاا انا غدوة "
سكرت التاليفون وخبيتو ف جيبي.. هزيت مفاتحي وخرجت بش نشوف ادم ونمشيو نصليو.. اول ماخرجت وسكرت الباب وقفت على صوت خطواتها لي كانت طالعة رغم اني ماريتهاش اما عرفتها هي لحظتهاا بقيت واقف ف بلاصتي نستنى فيهاا تطلع رغم اني مش عارف شنوة بش نحكي معاهاا تو اما مانجمش نبقى ساكت هكاا بش نحاول نبرد دمي وعصابي قدام كلامهاا لي متأكد بش توترني بيه ونحكي معاهاا..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
